HIMACHAL PRADESH | పసిపాపపై పాశవిక చర్య

* కనికరం లేని కసాయి

* తలదించుకుంటున్న మానవత్వం

ఆకేరు న్యూస్, డెస్క్: ఒక జామకాయ విలువ ఆ చిన్నారి ప్రాణం కన్నా ఎక్కువైందా? పసిపిల్లల ఏడుపులో దేవుడు కనిపిస్తాడు అంటారు.. కానీ ఆ దుర్మార్గుడికి మాత్రం తన చెట్టు కాయలే కనిపించాయి. కేవలం జామకాయలు కోసిందన్న చిన్న కారణంతో, మానవత్వాన్ని మంటగలిపి ఒక చిన్నారిని బందీని చేసిన అమానుష ఘటన నాగరిక సమాజాన్ని తలదించుకునేలా చేస్తోంది.

* కనికరం లేని కర్కశత్వం:
తమ చెట్టు జామకాయలు కోసిందన్న నెపంతో ఒక వ్యక్తి సదరు చిన్నారిని తాళ్లతో కట్టేసి హింసించాడు. “నన్ను వదిలేయండి.. కాపాడండి..” అంటూ ఆ పసిపాప గుక్కపెట్టి ఏడుస్తున్నా, ఆ కసాయి గుండె కరగలేదు. సరికదా, “నా చెట్టు కాయలు తుంచింది.. అందుకే ఈ శిక్ష” అంటూ నిస్సిగ్గుగా సమాధానం చెప్పడం అక్కడి వారిని విస్మయానికి గురిచేసింది.

* భయం లేని అహంకారం:
ఈ ఘోరాన్ని చూసి ఎవరో వీడియో తీస్తుంటే, కనీసం తప్పు చేశానన్న పశ్చాత్తాపం లేకుండా వారిపై కూడా దురుసుగా ప్రవర్తించాడు. చట్టం అన్నా, మానవత్వం అన్నా అతడికి ఏమాత్రం గౌరవం లేదని అతని ప్రవర్తన స్పష్టం చేస్తోంది.

* ప్రశ్నిస్తున్న సమాజం:
కడుపు నిండా ఆకలితోనో, సరదాకో ఒక కాయ కోస్తే అంతలా హింసించాలా? ఆ చిన్నారి పడుతున్న వేదన చూసి కూడా మనసు కరగని వాడు మనిషేనా? ఈ వీడియో చూసిన నెటిజన్లు సదరు వ్యక్తిపై కఠిన చర్యలు తీసుకోవాలని ఆగ్రహం వ్యక్తం చేస్తున్నారు. ఆ పసిపాప కన్నీళ్లకు సామాజిక మాధ్యమాలు చలించిపోతున్నాయి.