JAGTIAL | బావిలో పడిన థార్

* యువకుడు మృతి

ఆకేరు న్యూస్, జగిత్యాల: జగిత్యాల జిల్లాలో విషాద ఘటన చోటుచేసుకుంది. ఐపీఎల్ ఫైనల్ మ్యాచ్‌ను మొబైల్ ఫోన్‌లో చూస్తూ వాహనం నడుపుతున్న సమయంలో థార్ వాహనం అదుపుతప్పి రోడ్డు పక్కనున్న బావిలోకి దూసుకెళ్లింది. ఈ ప్రమాదంలో ఓ యువకుడు మృతి చెందగా, మరో ఇద్దరు ప్రాణాలతో బయటపడ్డారు.

* ఎలా జరిగిందంటే..

జగిత్యాల రూరల్ మండలం మోరపెల్లి గ్రామంలో ఈ ఘటన జరిగింది. స్థానికుల సమాచారం ప్రకారం, ముగ్గురు యువకులు థార్ వాహనంలో ప్రయాణిస్తుండగా ఐపీఎల్ ఫైనల్ మ్యాచ్‌ను ఫోన్‌లో వీక్షిస్తున్నట్లు తెలుస్తోంది. ఈ క్రమంలో వాహనం అదుపుతప్పి రోడ్డు పక్కనున్న బావిలో పడిపోయింది.

* ఇద్దరిని కాపాడిన స్థానికులు

ప్రమాదం జరిగిన వెంటనే స్పందించిన స్థానికులు నివేష్, అశ్విన్ అనే ఇద్దరు యువకులను సురక్షితంగా బయటకు తీశారు. అయితే వాహనం నడుపుతున్న అరుణ్ బావిలో మునిగిపోవడంతో విషాదం చోటుచేసుకుంది.

* రెండు గంటల పాటు సహాయక చర్యలు

సమాచారం అందుకున్న పోలీసులు, రెస్క్యూ సిబ్బంది ఘటనాస్థలికి చేరుకుని సహాయక చర్యలు చేపట్టారు. దాదాపు రెండు గంటలపాటు సాగిన గాలింపు అనంతరం అరుణ్ మృతదేహాన్ని వెలికితీశారు.

ఈ ఘటనపై కేసు నమోదు చేసిన పోలీసులు దర్యాప్తు చేపట్టారు. కాగా, డ్రైవింగ్ సమయంలో మొబైల్ ఫోన్ వినియోగం ఎంత ప్రమాదకరమో ఈ ఘటన మరోసారి గుర్తు చేస్తోందని స్థానికులు పేర్కొంటున్నారు.