Karimnagar ATM Robbery| కరీంనగర్‌లో ఏటీఎం చోరీలు

Published: 20 Sep 2026 • 03:21 PM

Karimnagar ATM Robbery| ఆకేరు న్యూస్, కరీంనగర్: కరీంనగర్ జిల్లాలో తెల్లవారుజామున దొంగలు రెండు ఎస్‌బీఐ ఏటీఎంలను లక్ష్యంగా చేసుకుని చోరీలకు పాల్పడ్డారు. కరీంనగర్ రూరల్ పోలీస్ స్టేషన్ పరిధిలోని దుర్షేడు, ఎల్‌ఎండీ పోలీస్ స్టేషన్ పరిధిలోని తిమ్మాపూర్‌లో ఈ ఘటనలు చోటుచేసుకున్నాయి. గ్యాస్ కట్టర్లతో ఏటీఎం యంత్రాలను ధ్వంసం చేసి నగదును అపహరించినట్లు పోలీసులు గుర్తించారు.

8 నిమిషాల్లో చోరీ

దుర్షేడు ఎస్‌బీఐ ఏటీఎంలో తెల్లవారుజామున 3:35 గంటల సమయంలో దొంగలు ప్రవేశించినట్లు సీసీ కెమెరాల్లో నమోదైంది. స్కార్పియో వాహనంలో వచ్చిన నిందితులు ముందుగా ఏటీఎంలోని సీసీ కెమెరాలపై స్ప్రే చల్లినట్లు తెలుస్తోంది. అనంతరం అలారం, కెమెరాలకు సంబంధించిన కేబుళ్లను కట్ చేసి నిఘా వ్యవస్థను నిర్వీర్యం చేసినట్లు సమాచారం. ఆ తర్వాత గ్యాస్ కట్టర్లతో ఏటీఎం యంత్రాన్ని ధ్వంసం చేసి నగదును తీసుకుని పరారైనట్లు పోలీసులు గుర్తించారు. మొత్తం చోరీ ప్రక్రియ సుమారు ఎనిమిది నిమిషాల్లో పూర్తయినట్లు ప్రాథమికంగా తెలుస్తోంది.

నగదు ఎంతంటే?

చోరీకి గురైన నగదు మొత్తం ఎంతన్నది ఇంకా స్పష్టంగా తెలియలేదు. బ్యాంకు అధికారులు ఏటీఎంలోని నగదు వివరాలను పరిశీలించిన అనంతరం పూర్తి మొత్తాన్ని వెల్లడించే అవకాశం ఉంది.

ఢిల్లీ నుంచి సమాచారం

దుర్షేడు ఏటీఎంలో చోరీ జరిగిన సుమారు పది నిమిషాల తర్వాత ఢిల్లీ నుంచి స్థానిక పోలీసులకు సమాచారం అందినట్లు తెలుస్తోంది. పోలీసులు ఘటనాస్థలానికి చేరుకునేలోపే నిందితులు అక్కడి నుంచి పరారయ్యారు.

తిమ్మాపూర్‌లోనూ చోరీ

ఎల్‌ఎండీ పోలీస్ స్టేషన్ పరిధిలోని తిమ్మాపూర్‌లో ఉన్న ఎస్‌బీఐ ఏటీఎంలోనూ చోరీ జరిగినట్లు పోలీసులు గుర్తించారు. రెండు ఘటనల్లోనూ ఏటీఎం యంత్రాలను ధ్వంసం చేసిన విధానంలో సారూప్యత కనిపించడంతో ఒకే ముఠా చోరీలకు పాల్పడిందా? అనే కోణంలో పోలీసులు దర్యాప్తు చేస్తున్నారు.

సీసీ కెమెరాలతో గాలింపు

ఘటనాస్థలాలను పరిశీలించిన పోలీసులు ఆధారాలను సేకరిస్తున్నారు. పరిసర ప్రాంతాల్లోని సీసీ కెమెరాల దృశ్యాలను పరిశీలిస్తూ నిందితుల కదలికలు, వారు ఉపయోగించిన వాహనం వివరాలను సేకరిస్తున్నారు. చోరీకి గురైన నగదు మొత్తం, నిందితుల సంఖ్య, రెండు ఘటనల మధ్య సంబంధంపై దర్యాప్తు అనంతరం స్పష్టత వచ్చే అవకాశం ఉంది. నిందితులు వినాయక నవరాత్రుల సమయంలో రాత్రివేళల్లో జన సంచారం ఎక్కువగా ఉండటాన్ని గమనించి, తెల్లవారుజామున రాకపోకలు తగ్గిన సమయంలో చోరీలకు పాల్పడి ఉండవచ్చని పోలీసులు అనుమానిస్తున్నారు. అయితే దీనిపై అధికారిక నిర్ధారణ రావాల్సి ఉంది.