Tamil Nadu| వెట్రి పయనం

Published: 02 Oct 2026 • 08:53 PM

Tamil Nadu| ఆకేరు న్యూస్, చెన్నై: తమిళనాడులో మహిళలు, ట్రాన్స్‌జెండర్ వ్యక్తులకు ఉచిత బస్సు ప్రయాణ సౌకర్యాన్ని మరిన్ని ప్రభుత్వ బస్సులకు విస్తరిస్తూ ముఖ్యమంత్రి సి. జోసెఫ్ విజయ్ శుక్రవారం ‘వెట్రి పయనం’ పథకాన్ని ప్రారంభించారు. చెన్నై కోయంబేడు బస్ టెర్మినస్‌లో మహిళా ప్రయాణికులకు ఉచిత టికెట్లు అందించి ఈ పథకాన్ని ప్రారంభించారు.

12,692 బస్సుల్లో ఉచితం

ఇప్పటికే అమల్లో ఉన్న ‘మగళిర్ విడియల్ పయనం’ పథకాన్ని విస్తరిస్తూ ‘వెట్రి పయనం’ను అమలు చేస్తున్నారు. నగరాలు, పట్టణాల్లో నడిచే ఎక్స్‌ప్రెస్, లిమిటెడ్ స్టాప్, డీలక్స్ బస్సులతో పాటు మోఫస్సిల్ మార్గాల్లోని ఆర్డినరీ బస్సులు, 40 కిలోమీటర్లకు మించిన ఘాట్ మార్గాల్లో నడిచే ఆర్డినరీ బస్సుల్లోనూ మహిళలకు ఉచిత ప్రయాణం అందుబాటులో ఉంటుంది.

రాష్ట్రంలోని ఏడు ప్రభుత్వ రవాణా సంస్థలకు చెందిన 12,692 బస్సులను ఈ పథకం పరిధిలోకి తీసుకొచ్చారు. దీని ద్వారా రోజుకు సుమారు 84.32 లక్షల మంది మహిళలకు ప్రయోజనం కలుగుతుందని అంచనా వేస్తున్నారు.

ప్రయాణ భారం తగ్గించేందుకు

విద్య, ఉద్యోగం, వైద్యం, ఇతర అవసరాల కోసం మహిళలు ప్రజా రవాణాను ఎక్కువగా వినియోగించుకునేలా చేయడం పథకం ప్రధాన ఉద్దేశంగా ప్రభుత్వం పేర్కొంది. ఉచిత ప్రయాణ సౌకర్యం విస్తరణతో మహిళలపై రోజువారీ రవాణా ఖర్చు తగ్గనుంది.

ఆగస్టులో ప్రకటన

‘వెట్రి పయనం’ పథకం విస్తరణను ముఖ్యమంత్రి విజయ్ ఆగస్టు 24న తమిళనాడు అసెంబ్లీలో రూల్ 110 కింద ప్రకటించారు. అక్టోబర్ 2 నుంచి విస్తరించిన సౌకర్యాన్ని రాష్ట్రవ్యాప్తంగా అమల్లోకి తీసుకొచ్చారు.