* హిట్‌పై నరేష్ ధీమా
* ఈ నెల 16న ప్రపంచవ్యాప్తంగా విడుదల
* ట్రైలర్ లాంచ్‌లో చిత్ర బృందం
Crazy Kalyanam| ఆకేరు న్యూస్, సినిమా: దసరా పండుగ సందర్భంగా ప్రేక్షకులను నవ్వులు, భావోద్వేగాలతో అలరించేందుకు క్రేజీ కల్యాణం సిద్ధమవుతోంది. హైదరాబాద్‌లో ట్రైలర్ లాంచ్ కార్యక్రమాన్ని ఘనంగా నిర్వహించారు. ప్రముఖ నిర్మాతలు దిల్ రాజు, బన్నీ వాస్, దర్శకురాలు నందినీ రెడ్డి ముఖ్య అతిథులుగా హాజరై చిత్ర బృందానికి శుభాకాంక్షలు తెలిపారు. ట్రైలర్‌కు వస్తున్న స్పందన, సినిమాలోని వినోదం, భావోద్వేగాలు ప్రేక్షకులను ఆకట్టుకుంటాయని చిత్ర యూనిట్ ఆశాభావం వ్యక్తం చేసింది.
దసరా బరిలో కుటుంబ కథా చిత్రం
‘క్రేజీ కల్యాణం’ ట్రైలర్‌పై నిర్మాత బన్నీ వాస్ ప్రశంసలు కురిపించారు. తాను సినిమా చూశానని, మంచి వినోదాన్ని అందించిందని తెలిపారు. దసరా పండుగకు కుటుంబ ప్రేక్షకులు ఈ చిత్రాన్ని ఆస్వాదిస్తారని, ముఖ్యంగా ఇంటర్వెల్ సన్నివేశం ప్రేక్షకులకు గుర్తుండిపోతుందని పేర్కొన్నారు. అనుపమ పరమేశ్వరన్ తెలంగాణ యాసలో నటించడం ప్రత్యేక ఆకర్షణగా నిలుస్తుందని అన్నారు.
నిర్మాత దిల్ రాజు మాట్లాడుతూ.. పెద్ద సినిమాలతో పాటు చిన్న చిత్రాలకూ ప్రేక్షకుల ఆదరణ లభించినప్పుడే చిత్ర పరిశ్రమ మరింత అభివృద్ధి చెందుతుందని అభిప్రాయపడ్డారు. ట్రైలర్ చూసిన తర్వాత సినిమా బాగుంటుందనే నమ్మకం కలిగిందని, చిత్ర బృందానికి మంచి విజయం దక్కాలని ఆకాంక్షించారు.
దర్శకురాలు నందినీ రెడ్డి సైతం ట్రైలర్‌ను ప్రశంసించారు. నరేష్, అనుపమ, తరుణ్ భాస్కర్, అఖిల్ ఉడ్డెమారి తమ పాత్రలతో సినిమాకు బలంగా నిలిచారని పేర్కొన్నారు.
కాలేజీ రోజుల అనుభవాల నుంచి కథ
దర్శకుడు బద్రప్ప గాజుల తన కాలేజీ రోజుల్లో చూసిన కొన్ని అనుభవాలే ఈ కథకు స్ఫూర్తిగా నిలిచాయని వెల్లడించారు. చదువుకునే వయసులోనే పెళ్లిళ్లకు అంగీకరించే అమ్మాయిల మనసులో ఎన్నో ఆశలు, ఆకాంక్షలు ఉంటాయని, కుటుంబ పరిస్థితులు, పెద్దల నిర్ణయాల మధ్య వారి భావోద్వేగాలు ఎలా ఉంటాయనే ఆలోచనతో కథను రూపొందించినట్లు వివరించారు.
నిర్మాత జగన్ మోహన్ రెడ్డి తనకు మొదటి నుంచి ఎంతో మద్దతుగా నిలిచారని, సినిమాను ఎంతో ప్యాషన్‌తో నిర్మించారని తెలిపారు. అనుపమ ఈ పాత్రకు చక్కగా సరిపోయారని, నరేష్ ఈ చిత్రానికి ప్రధాన బలమని పేర్కొన్నారు. సురేష్ బొబ్బిలి సంగీతం సినిమాకు ప్రత్యేక ఆకర్షణగా నిలుస్తుందని చెప్పారు.
‘ఇది నా అత్యుత్తమ ప్రదర్శనల్లో ఒకటి’
డా. నరేష్ విజయ కృష్ణ మాట్లాడుతూ.. ‘క్రేజీ కల్యాణం’ సహజమైన వినోదంతో పాటు భావోద్వేగాలను పంచే చిత్రమని అన్నారు. తాను ఇప్పటివరకు 300 సినిమాల్లో నటించానని, వాటిలో తన అత్యుత్తమ నటన కనిపించే చిత్రాల్లో ఇదొకటని పేర్కొన్నారు. తెలంగాణ నేపథ్యంలో తెరకెక్కినప్పటికీ, ఇందులోని భావోద్వేగాలు అన్ని ప్రాంతాల ప్రేక్షకులకు కనెక్ట్ అవుతాయని ధీమా వ్యక్తం చేశారు.
ఈ దసరాకు సినిమా గన్‌షాట్‌లా హిట్ అవుతుందని ఆశిస్తున్నట్లు తెలిపారు. ప్రేమ, వినోదం, భావోద్వేగాలు, సంగీతంతో సాగే ఈ చిత్రాన్ని ప్రేక్షకులు ఆదరిస్తారని నమ్మకం వ్యక్తం చేశారు.
తెలంగాణ యాసలో అనుపమ.. బాలరాజుగా తరుణ్ భాస్కర్
హీరోయిన్ అనుపమ పరమేశ్వరన్ మాట్లాడుతూ.. ‘శతమానం భవతి’ తర్వాత కుటుంబ ప్రేక్షకులకు నచ్చే మరో మంచి కథతో వస్తున్నానని తెలిపారు. ‘క్రేజీ కల్యాణం’ కథ తనకు ఎంతో నచ్చిందని, ఇందులో నటించడం మంచి సంతృప్తినిచ్చిందని చెప్పారు. వినోదం, భావోద్వేగాలతో కూడిన ఈ చిత్రం పండుగ ఉత్సాహాన్ని రెట్టింపు చేస్తుందని ఆశాభావం వ్యక్తం చేశారు.
నటుడు తరుణ్ భాస్కర్ ఈ సినిమాలో బాలరాజు అనే అమాయకమైన పాత్రలో కనిపించనున్నారు. ఆ పాత్రలోని ప్రత్యేకతలు ప్రేక్షకులను నవ్విస్తాయని, థియేటర్లలో తన పాత్రను ప్రేక్షకులు బాగా ఆస్వాదిస్తారని ఆయన తెలిపారు. హీరో అఖిల్ ఉడ్డెమారి కూడా ట్రైలర్‌కు వస్తున్న స్పందన పట్ల సంతోషం వ్యక్తం చేస్తూ, ఈ నెల 16న ప్రేక్షకుల ముందుకు రానున్న సినిమాను థియేటర్లలో చూసి ఆదరించాలని కోరారు.
నరేష్ విజయ కృష్ణ, అనుపమ పరమేశ్వరన్, తరుణ్ భాస్కర్, అఖిల్ ఉడ్డెమారి ప్రధాన పాత్రల్లో నటించిన ఈ చిత్రం ఈ నెల 16న ప్రపంచవ్యాప్తంగా థియేటర్లలో విడుదల కానుంది. యారో సినిమాస్ బ్యానర్‌పై బూసం జగన్ మోహన్ రెడ్డి నిర్మిస్తుండగా, బద్రప్ప గాజుల దర్శకత్వం వహిస్తున్నారు.
About the Author
Please tell us what is wrong. Your report will be sent to the website team.
