LB Nagar Hayathnagar Double Decker Corridor
* ఎల్బీనగర్ – హయత్నగర్ “డబుల్డెక్కర్ కారిడార్”
* కేంద్ర మంత్రి గడ్కరీ కీలక నిర్ణయాలు
ఆకేరు న్యూస్, డెస్క్: భాగ్యనగరంలో కీలకమైన విజయవాడ జాతీయ రహదారిపై ట్రాఫిక్ సమస్యలకు శాశ్వత పరిష్కారం చూపే దిశగా మరో భారీ మౌలిక వసతుల ప్రాజెక్టు పట్టాలెక్కనుంది. ఎల్బీనగర్ నుంచి హయత్నగర్ వరకు ప్రతిపాదించిన అత్యంత ప్రతిష్టాత్మక ‘డబుల్డెక్కర్ ఎలివేటెడ్ కారిడార్’ నిర్మాణానికి కేంద్ర రహదారి రవాణా, జాతీయ రహదారుల శాఖ మంత్రి నితిన్ గడ్కరీ సూత్రప్రాయంగా ఆమోదం తెలిపారు.
న్యూఢిల్లీలో కేంద్ర మంత్రి నితిన్ గడ్కరీతో రాష్ట్ర రోడ్లు, భవనాల శాఖ మంత్రి కోమటిరెడ్డి వెంకట్‌రెడ్డి మంగళవారం మర్యాదపూర్వకంగా భేటీ అయ్యారు. ఈ సమావేశంలో తెలంగాణలోని కీలక జాతీయ రహదారులు, ఎక్స్‌ప్రెస్ వేలు, మౌలిక వసతుల ప్రాజెక్టుల పురోగతిపై ఇరువురు నేతలు సుదీర్ఘంగా చర్చించారు.
* కీలక నిర్ణయాలు
ఎల్బీనగర్ – హయత్నగర్ డబుల్డెక్కర్ కారిడార్ : హైదరాబాద్ నగరం నుంచి విజయవాడ వైపు వెళ్లే నిత్యం అత్యంత రద్దీగా ఉండే ఎల్బీనగర్ – హయత్నగర్ మార్గంలో డబుల్డెక్కర్ ఎలివేటెడ్ కారిడార్‌ను నిర్మించేందుకు కేంద్రం సుముఖత వ్యక్తం చేసింది. కింది స్థాయిలో వాహనాల రాకపోకలు, పైన మెట్రో రైల్ / ఎలివేటెడ్ రహదారి ఉండేలా ఈ ఐకానిక్ ప్రాజెక్టు రూపుదిద్దుకోనుంది.
కృష్ణా నదిపై ‘ఐకానిక్ కేబుల్‌ బ్రిడ్జ్‌’ శంకుస్థాపన: సోమశిల – సిద్ధేశ్వరం వద్ద కృష్ణా నదిపై ప్రతిపాదించిన ప్రతిష్టాత్మక ‘ఐకానిక్ కేబుల్‌ బ్రిడ్జ్‌’ శంకుస్థాపనకు సంబంధించిన ప్రతిపాదనకు కేంద్ర మంత్రి గడ్కరీ ఆమోదం తెలిపారు. త్వరలోనే ఈ ప్రాజెక్టుకు భూమిపూజ నిర్వహించనున్నారు.
ఎన్‌హెచ్‌-765 ఎలివేటెడ్ కారిడార్ డీపీఆర్‌ : హైదరాబాద్ – శ్రీశైలం ఎన్‌హెచ్‌-765 (NH-765) పరిధిలోని కల్వకుర్తి – కందుకూరు మార్గంలో రద్దీ నివారణకు గాను ఎలివేటెడ్ కారిడార్ నిర్మాణానికి తక్షణమే సమగ్ర ప్రాజెక్టు నివేదిక (DPR) సిద్ధం చేయాలని సంబంధిత జాతీయ రహదారుల అధికారులను నితిన్ గడ్కరీ ఆదేశించారు.
* ఇండియన్‌ రోడ్‌ కాంగ్రెస్‌కు ఆహ్వానం..
వరంగల్‌, హైదరాబాద్ వేదికగా రాబోయే రోజుల్లో (నవంబర్‌ 19 నుంచి 22 వరకు) ప్రతిష్టాత్మకంగా జరగనున్న 83వ ‘ఇండియన్‌ రోడ్‌ కాంగ్రెస్‌’ (IRC) వార్షిక సమావేశాలకు ముఖ్య అతిథిగా హాజరుకావాలని కేంద్ర మంత్రి నితిన్ గడ్కరీని మంత్రి కోమటిరెడ్డి వెంకట్‌రెడ్డి అధికారికంగా ఆహ్వానించారు.
ఈ సందర్భంగా మంత్రి కోమటిరెడ్డి వెంకట్‌రెడ్డి మాట్లాడుతూ.. తెలంగాణలో మౌలిక వసతుల కల్పనకు, జాతీయ రహదారుల విస్తరణకు కేంద్ర ప్రభుత్వం పూర్తిగా సహకరిస్తోందని తెలిపారు. ఎల్బీనగర్ – హయత్నగర్ డబుల్డెక్కర్ కారిడార్ పూర్తయితే తూర్పు హైదరాబాద్ ప్రాంతంలో రవాణా వ్యవస్థ పూర్తిగా రూపురేఖలు మారిపోతాయని, సమయం ఆదా కావడంతో పాటు ట్రాఫిక్ చిక్కులు తప్పుతాయని ధీమా వ్యక్తం చేశారు.
About the Author
Please tell us what is wrong. Your report will be sent to the website team.
