Kacheguda Railway Station | రెప్పపాటులో తప్పిన ప్రమాదం

Published: 13 Oct 2026 • 02:25 PM

* కదిలే రైలు ఎక్కుతూ ప్రమాదంలో పడ్డ తండ్రీకూతురు..
* ప్రాణాలు కాపాడిన RPF కానిస్టేబుల్ రీనా కుమారి

ఆకేరు న్యూస్, హైదరాబాద్ : రైల్వే అధికారులు మరియు రైల్వే పోలీసులు ఎంత హెచ్చరిస్తున్నా, ప్రయాణికులు ప్రాణాలను పణంగా పెట్టి కదులుతున్న రైళ్లను ఎక్కేందుకు ప్రయత్నిస్తూనే ఉన్నారు. తాజాగా హైదరాబాద్‌లోని కాచిగూడ రైల్వే స్టేషన్‌లోనూ ఇటువంటి సంచలన ఘటనే చోటుచేసుకుంది.

* వివరాల్లోకి వెళ్తే..

కాచిగూడ రైల్వే స్టేషన్ ప్లాట్‌ఫామ్‌పై నుంచి కదులుతున్న విశాఖ ఎక్స్‌ప్రెస్ రైలులోకి ఓ వ్యక్తి తన చిన్నారితో కలిసి ఎక్కేందుకు తీవ్రంగా ప్రయత్నించాడు. ఈ క్రమంలో బ్యాలెన్స్ తప్పి, పట్టు కోల్పోయి రైలుకిందికి జారిపడిపోయాడు. తన చేతిలో ఉన్న చిన్నారితో సహా అతను పట్టాల పైకి జారిపడే ప్రమాదం ఏర్పడింది.

* సమయస్ఫూర్తితో కాపాడిన ఆర్పీఎఫ్ కానిస్టేబుల్

అక్కడే విధుల్లో ఉన్న RPF మహిళా కానిస్టేబుల్ రీనా కుమారి తక్షణమే స్పందించారు. సెకన్ల వ్యవధిలోనే అతను పట్టాల కింద పడకుండా గట్టిగా పట్టుకుని వెనక్కి లాగారు. అదే సమయంలో పరిస్థితిని గమనించిన లోకో పైలట్ కూడా అత్యవసర బ్రేకులు (Emergency Brakes) వేయడంతో పెను ప్రమాదం తప్పింది. ఆ తర్వాత సదరు వ్యక్తి తన భార్య, కుమార్తెతో కలిసి సురక్షితంగా రైలు ఎక్కడంతో అక్కడున్న ప్రయాణికులు ఊపిరి పీల్చుకున్నారు.

ఆ సమయంలో కానిస్టేబుల్ రీనా కుమారి చూపిన సమయస్ఫూర్తిని, ధైర్యాన్ని ప్రతి ఒక్కరూ అభినందించారు. ఈ ప్రమాద దృశ్యాలు స్టేషన్‌లోని సీసీటీవీ కెమెరాలో రికార్డవగా, ప్రస్తుతం సామాజిక మాధ్యమాల్లో (Social Media) వైరల్‌గా మారాయి.

* అధికారుల విజ్ఞప్తి

కదులుతున్న రైలు ఎక్కడంగానీ, దిగడంగానీ తీవ్రమైన ప్రమాదకరమని, తొందరపాటుతో జీవితాలను నాశనం చేసుకోవద్దని రైల్వే అధికారులు ప్రయాణికులకు మరోసారి హెచ్చరించారు.