Graduate MLC Elections | గ్రాడ్యుయేట్లలో తగ్గిన ‘ఆసక్తి’

Published: 27 Oct 2026 • 01:27 PM

* ఎమ్మెల్సీ ఓటరు నమోదు మందకొడి
* 2021తో పోలిస్తే సగానికి పడిపోయిన ఓటర్ల నమోదు..
* నవంబర్ 6 చివరి గడువు

ఆకేరు న్యూస్, వరంగల్ : తెలంగాణలో ఉత్కంఠ రేపుతున్న పట్టభద్రుల (Graduate) ఎమ్మెల్సీ ఎన్నికలకు సంబంధించి ఓటరు నమోదు ప్రక్రియ ఆశించిన స్థాయిలో ముందుకు సాగడం లేదు. వరంగల్-ఖమ్మం-నల్గొండ అలాగే హైదరాబాద్-రంగారెడ్డి-మహబూబ్ నగర్ ఉమ్మడి జిల్లాల పరిధిలో పట్టభద్రుల ఓటరు నమోదు ప్రక్రియ చాలా మందకొడిగా సాగుతున్నట్లు అధికారిక గణాంకాలు స్పష్టం చేస్తున్నాయి. గడువు ముగియడానికి కేవలం కొన్ని రోజులు మాత్రమే మిగిలి ఉన్నప్పటికీ, అర్హులైన గ్రాడ్యుయేట్లు పెద్దగా ఆసక్తి కనబరచకపోవడం గమనార్హం.

* 2021తో పోలిస్తే భారీగా తగ్గిన దరఖాస్తులు..

గతంతో పోలిస్తే ఈసారి పట్టభద్రుల ఓటరు నమోదు గణనీయంగా పడిపోయింది. గతంలో 2021 ఎన్నికల సమయంలో సుమారు 10.36 లక్షల మంది ఓటర్లుగా నమోదు చేసుకున్నారు. కానీ ప్రస్తుత ఏడాది మాత్రం ఇప్పటివరకు కేవలం 5.24 లక్షల మంది మాత్రమే దరఖాస్తు చేసుకున్నట్లు సమాచారం.

* సమీపిస్తున్న గడువు..

ఓటరు నమోదుకు నవంబర్ 6వ తేదీతో గడువు ముగియనుంది. గడువు దగ్గర పడుతున్న కొద్ది వేలాది దరఖాస్తులు ఇంకా పరిశీలన దశలోనే ఉండటం అధికారులకు తలనొప్పిగా మారింది.

హైదరాబాద్-రంగారెడ్డి-మహబూబ్ నగర్ నియోజకవర్గ పరిధిలో సుమారు 2.29 లక్షలు, వరంగల్-ఖమ్మం-నల్గొండ పరిధిలో సుమారు 2.93 లక్షల దరఖాస్తులు వచ్చాయి.

ఉమ్మడి వరంగల్ జిల్లాలోని వివిధ ప్రాంతాల్లో దరఖాస్తుల పరిశీలన మరియు ఆమోదం వివరాలు ఈ క్రింది విధంగా ఉన్నాయి.

జయశంకర్ భూపాలపల్లె (JN) : 17,567 దరఖాస్తులకు గాను 1,670 ఆమోదం పొందాయి.
మహబూబాబాద్ (MHBD) : 26,042 దరఖాస్తులకు 6,314 ఆమోదం పొందాయి.
హనుమకొండ (HNK) : 28,447 దరఖాస్తులకు 1,820 ఆమోదం పొందాయి.
ములుగు (MLG) : 7,702 దరఖాస్తులకు 899 ఆమోదం పొందాయి.
భద్రాద్రి కొత్తగూడెం (BHPL) : 7,277 దరఖాస్తులకు 1,503 ఆమోదం పొందాయి.
వరంగల్ (WGL) : 26,878 దరఖాస్తులకు 732 దరఖాస్తులు ఆమోదం పొందాయి.

* స్పందన తక్కువగా ఉండటానికి కారణాలు

పట్టభద్రులలో ఓటరు నమోదు పట్ల ఇంత నిరుత్సాహం ఉండటానికి ప్రధాన కారణం ఎన్నికల సంఘం (EC) తరఫున తగిన స్థాయిలో అవగాహన మరియు ప్రచారం కల్పించకపోవడమేనని రాజకీయ వర్గాలు అభిప్రాయపడుతున్నాయి. డిగ్రీ పూర్తి చేసిన యువత తమ ఓటు హక్కును నమోదు చేసుకోవడం ద్వారానే ప్రజాస్వామ్యంలో సరైన నాయకులను ఎన్నుకునే అవకాశం ఉంటుందని, తక్షణమే అర్హులైన ప్రతి ఒక్కరూ దరఖాస్తు చేసుకోవాలని నిపుణులు కోరుతున్నారు.