Cotton Farmers | పత్తి రైతులకు దళారుల దెబ్బ..!

Published: 02 Nov 2026 • 03:10 PM

* చిల్లర కాంటాలతో దళారుల దోపిడీ..
* క్వింటాకు ₹12,000 మద్దతు ధర ఇవ్వాల్సిందే
* ప్రభుత్వాలకు రైతు సంఘం డిమాండ్

ఆకేరు న్యూస్, వరంగల్ జిల్లా : గ్రామీణ ప్రాంతాల్లో చిల్లర కాంటాల పేరుతో పత్తి రైతులను నిలువునా దోచుకుంటున్న మధ్య దళారుల ఆగడాలను తక్షణమే అరికట్టాలని, మార్కెట్‌లో ధరల వ్యత్యాసాన్ని తగ్గించి పత్తి పండించిన రైతులకు న్యాయం చేయాలని అఖిల భారత రైతు సమాఖ్య (AIKF) రాష్ట్ర ప్రధాన కార్యదర్శి పెద్దారపు రమేష్ తీవ్రస్థాయిలో డిమాండ్ చేశారు. అలాగే కేంద్ర, రాష్ట్ర ప్రభుత్వాలు వెంటనే స్పందించి పత్తికి క్వింటాకు రూ. 12,000 కనీస మద్దతు ధర (MSP) ప్రకటించి రైతాంగాన్ని ఆదుకోవాలని ఆయన కోరారు.

సోమవారం ఏఐకేఎఫ్ ఆధ్వర్యంలో ఒక ప్రతినిధి బృందం ఆసియాలోనే రెండో అతిపెద్ద ధాన్యపు మార్కెట్ అయిన వరంగల్ ఏనుమాముల వ్యవసాయ మార్కెట్‌ను సందర్శించింది. ఈ సందర్భంగా మార్కెట్‌కు పత్తిని తీసుకువచ్చిన రైతుల సమస్యలను, వారికి జరుగుతున్న తూకం మోసాలను, మద్దతు ధర లభించక ఎదుర్కొంటున్న ఇబ్బందులను నేరుగా అడిగి తెలుసుకున్నారు.

* పంట దిగుబడి తగ్గినా పడని ధరలు : దళారుల దగా

ఈ సందర్భంగా ఏఐకేఎఫ్ రాష్ట్ర ప్రధాన కార్యదర్శి పెద్దారపు రమేష్ మాట్లాడుతూ.. అంతర్జాతీయంగా పత్తి పంట విస్తీర్ణం మరియు దిగుబడి గణనీయంగా తగ్గిందని తెలిపారు. ఇదే క్రమంలో తెలంగాణ రాష్ట్రంలో సుమారు 49 లక్షల ఎకరాల్లో పత్తి సాగు చేసినప్పటికీ, ప్రతికూల పరిస్థితుల వల్ల ఎకరానికి 4 నుండి 5 క్వింటాళ్లకు మించి దిగుబడి రాలేదని ఆవేదన వ్యక్తం చేశారు. మార్కెట్‌లో పత్తికి భారీగా డిమాండ్ ఏర్పడాల్సిన ఇలాంటి సమయంలో, ధర పెరగాల్సింది పోయి రోజురోజుకూ తగ్గించుకుంటూ రావడం వ్యాపారుల అన్యాయమైన వైఖరికి నిదర్శనమన్నారు.

ఆసియాలోనే రెండో అతిపెద్ద మార్కెట్ అయిన ఏనుమాములలో ఈ సీజన్‌లో ఇతర ప్రాంతాల మార్కెట్లతో పోల్చితే ఒక్కసారి కూడా అత్యధిక ధర (హై రేట్) పలకపోవడం విచారకరమన్నారు. ‘జెండా పాట’ పేరుతో కేవలం కొద్దిమంది రైతుల పత్తికే మంచి ధర కేటాయించి, మిగిలిన రైతులకు క్వింటాకు రూ. 500 నుండి రూ. 600 వరకు తగ్గించి కొనుగోలు చేస్తూ ఆర్థికంగా నష్టం కలిగిస్తున్నారని మండిపడ్డారు.

* పనిచేయని వే-బ్రిడ్జిలు.. అధికారుల నిమ్మకు నీరెత్తిన వైఖరి..

మార్కెట్ ప్రాంగణంలో ఉన్న 4 వే-బ్రిడ్జి (Way Bridge) కాంటాలు పనిచేయకపోవడం దేనికి సంకేతమని అధికారులను ప్రశ్నించారు. లూజుగా వాహనాల్లో పత్తిని తీసుకువచ్చినప్పుడు మార్కెట్‌లో ధర నిర్ణయిస్తున్నప్పటికీ, బయట తూకం వేసే సమయంలో ధర తగ్గించడం దారుణమన్నారు.
మరోవైపు గ్రామాల్లో మధ్య దళారులు పత్తి రైతులను మభ్యపెట్టి, మార్కెట్ ధర కంటే తక్కువకు పత్తిని కొనుగోలు చేస్తూ తూకాల్లో మోసాలకు పాల్పడుతున్నా మార్కెట్ యంత్రాంగం పట్టించుకోకపోవడం సమంజసం కాదన్నారు.

* రైతు సమాఖ్య ప్రధాన డిమాండ్లు

గ్రామాల్లో నిబంధనలకు విరుద్ధంగా సాగుతున్న చిల్లర కాంటాలను తక్షణమే అరికట్టాలి.
మార్కెట్‌లో జెండా పాట ధరను నాణ్యమైన పత్తి తెచ్చిన రైతులందరికీ వర్తింపజేయాలి.
మార్కెట్ ప్రాంగణంలో నిలిచిపోయిన వే-బ్రిడ్జిలను వెంటనే అందుబాటులోకి తీసుకురావాలి.
పత్తికి క్వింటాకు రూ. 12,000 చొప్పున కనీస మద్దతు ధర ఖరారు చేయాలి.
మార్కెట్‌కు వచ్చే రైతులకు, శ్రామిక కార్మికులకు నాణ్యమైన ఉచిత భోజనాన్ని అందించి, కనీస సౌకర్యాలను మెరుగుపరచాలి.

* చైర్మన్, కార్యదర్శులకు మెమోరాండం సమర్పణ..

అనంతరం రైతులు మరియు ప్రజాసంఘాల నేతలతో కలిసి మార్కెట్ చైర్మన్ శ్రీమతి ఎర్ర ప్రియాంక, మార్కెట్ సెక్రటరీ నిషాని శ్రీనివాస్‌లకు వినతిపత్రం (మెమోరాండం) అందజేశారు. సమస్యల తీవ్రతను వివరించి తక్షణ పరిష్కారం చూపాలని కోరగా, అధికారులు సానుకూలంగా స్పందించి సమస్యల పరిష్కారానికి కృషి చేస్తామని హామీ ఇచ్చారు.

ఈ కార్యక్రమంలో ఏఐకేఎఫ్ రాష్ట్ర సహాయ కార్యదర్శి ఎన్.రెడ్డి హంసారెడ్డి, వ్యవసాయ కార్మిక సంఘం రాష్ట్ర కార్యదర్శి గోనె కుమారస్వామి, జిల్లా కార్యదర్శి కుసుంబ బాబురావు, రాష్ట్ర నాయకులు సింగతి సాంబయ్య, జిల్లా కోశాధికారి సింగతి మల్లికార్జున్, ప్రజా సంఘాల నాయకులు వంగల రాగసుధ, గడ్డం నాగార్జున, ముక్కెర రామస్వామి, మాస్ సావిత్రి, మాలి ప్రభాకర్, అప్పనపురి నర్సయ్య, ఏఐకేఎఫ్ జిల్లా నాయకులు ఐతం నాగేష్, మహమ్మద్ ఉస్మాన్, మంద భద్రయ్య, గోనె రామచంద్రు మరియు పెద్ద సంఖ్యలో రైతులు పాల్గొన్నారు.