Venugopal Dhoot| అప్పుల ఊబిలో ధూత్!

Published: 06 Nov 2026 • 04:49 PM

* రూ.12,668 కోట్ల బకాయిలు

* రూ.600 కోట్ల రీపేమెంట్ ప్లాన్ తిరస్కరణ

* దివాలా ప్రక్రియకు ఎన్‌సీఎల్‌టీ గ్రీన్ సిగ్నల్

Venugopal Dhoot| ఆకేరు న్యూస్, డెస్క్: వీడియోకాన్ సంస్థ మాజీ ప్రమోటర్, డైరెక్టర్ వేణుగోపాల్ నందలాల్ ధూత్ దివాలా తీసినట్లు నేషనల్ కంపెనీ లా ట్రిబ్యునల్ (NCLT) ప్రకటించింది. స్టేట్ బ్యాంక్ ఆఫ్ ఇండియా (SBI)కి చెల్లించాల్సిన రూ.12,668.06 కోట్ల రుణ బకాయిలకు సంబంధించి ముంబై బెంచ్ ఈ కీలక నిర్ణయం తీసుకుంది. నవంబర్ 5న ఈ మేరకు ఉత్తర్వులు జారీ చేసింది.

రూ.12,668 కోట్లకు పైగా బకాయిలు

వీడియోకాన్ ఇండస్ట్రీస్, దాని గ్రూప్ సంస్థలు ఎస్‌బీఐ, ఇతర బ్యాంకుల నుంచి వివిధ రుణ సదుపాయాలు పొందాయి. ఈ రుణాలకు వేణుగోపాల్ ధూత్ వ్యక్తిగత హామీలు ఇచ్చారు. అయితే సంస్థలు రుణాలను తిరిగి చెల్లించడంలో విఫలం కావడంతో 2018 ఫిబ్రవరిలో బ్యాంకులు ఆయనకు ఇచ్చిన వ్యక్తిగత హామీలను అమల్లోకి తీసుకొచ్చాయి. ఎస్‌బీఐ పిటిషన్ ప్రకారం 2026 సెప్టెంబర్ 30 నాటికి వడ్డీ, జరిమానాలతో కలిపి బకాయిలు రూ.12,668.06 కోట్లకు చేరాయి.

రూ.600 కోట్ల రీపేమెంట్ ప్లాన్ తిరస్కరణ

రుణ బకాయిల పరిష్కారం కోసం వేణుగోపాల్ ధూత్ రూ.600 కోట్ల రీపేమెంట్ ప్రణాళికను ప్రతిపాదించారు. సిలిగురిలో చేపట్టనున్న రియల్ ఎస్టేట్ ప్రాజెక్టు ద్వారా 36 నెలల్లో ఈ మొత్తాన్ని చెల్లిస్తామని ప్రతిపాదించారు. అయితే భవిష్యత్తులో ప్రాజెక్టుకు అనుమతులు రావడం, నిర్మాణం పూర్తవడం, ఆదాయం సమకూరడం వంటి అంశాలపై ఆధారపడిన ఈ ప్రతిపాదనను రుణదాతలు అంగీకరించలేదు. దీంతో గతంలో వ్యక్తిగత దివాలా పరిష్కార ప్రక్రియను ముగించిన ఎన్‌సీఎల్‌టీ, తాజాగా ఎస్‌బీఐ దాఖలు చేసిన దివాలా పిటిషన్‌ను ఆమోదించింది.

ఆస్తుల నిర్వహణకు ట్రస్టీ నియామకం

ఈ ప్రక్రియలో భాగంగా అసిష్ నారాయణ్‌ను బ్యాంక్రప్టసీ ట్రస్టీగా ఎన్‌సీఎల్‌టీ నియమించింది. ధూత్‌కు సంబంధించిన ఆస్తులు ట్రస్టీ ఆధీనంలోకి వెళ్లనున్నాయి. ఆస్తులను నిర్వహించి, చట్ట ప్రకారం రుణదాతలకు బకాయిల పంపిణీ చేసే బాధ్యతను ట్రస్టీ చేపట్టనున్నారు. తన పూర్తి ఆర్థిక స్థితిగతుల వివరాలను ఏడు రోజుల్లో ట్రస్టీకి సమర్పించాలని ధూత్‌ను ట్రిబ్యునల్ ఆదేశించింది. ట్రస్టీ రుణదాతల నుంచి క్లెయిమ్‌లను స్వీకరించి, 90 రోజుల్లో ప్రాథమిక నివేదికను సమర్పించాల్సి ఉంటుంది. ఈ పరిణామంతో వీడియోకాన్ గ్రూప్ రుణ సంక్షోభంలో మరో కీలక మలుపు చోటుచేసుకుంది.