Teegala Krishna Reddy
* రెండోసారి జాతీయ కౌన్సిల్ సభ్యుడిగా నియామకం..
* జర్నలిస్టుల హక్కుల కోసం చేసిన పోరాటానికి గుర్తింపు
ఆకేరు న్యూస్, తొర్రూరు: ఇండియన్ జర్నలిస్ట్స్ యూనియన్ (Indian Journalists Union – IJU) అనుబంధ తెలంగాణ యూనియన్ ఆఫ్ వర్కింగ్ జర్నలిస్ట్స్ (TUWJ H-143) జాతీయ కౌన్సిల్ సభ్యుడిగా తొర్రూరుకు చెందిన సీనియర్ జర్నలిస్ట్ తీగల కృష్ణారెడ్డి మరోసారి నియమితులయ్యారు. ఈ మేరకు సంఘం రాష్ట్ర అధ్యక్షుడు అల్లం నారాయణ, ప్రధాన కార్యదర్శి మారుతీ సాగర్ అధికారికంగా ప్రకటించారు.
సంఘం కార్యకలాపాల్లో చురుకైన పాత్ర పోషించడంతో పాటు జర్నలిస్టుల హక్కులు, సంక్షేమం కోసం నిరంతరం కృషి చేస్తున్న కృష్ణారెడ్డికి రాష్ట్ర నాయకత్వం రెండోసారి జాతీయ కౌన్సిల్లో అవకాశం కల్పించింది. ఆయన సేవలను గుర్తించి మరోసారి బాధ్యతలు అప్పగించడంపై జర్నలిస్టు వర్గాల్లో హర్షం వ్యక్తమవుతోంది.
మూడు దశాబ్దాలుగా జర్నలిస్టుల కోసం పోరాటం
తొర్రూరు కేంద్రంగా గత మూడు దశాబ్దాలుగా పత్రికా రంగంలో సేవలందిస్తున్న తీగల కృష్ణారెడ్డి జర్నలిస్టుల సమస్యల పరిష్కారం కోసం అనేక ఉద్యమాల్లో భాగస్వాములయ్యారు. మలిదశ తెలంగాణ ఉద్యమ సమయంలో జర్నలిస్టులను ఏకతాటిపైకి తీసుకొచ్చి పలు పోరాటాలు నిర్వహించారు. జర్నలిస్టులకు అక్రిడిటేషన్ కార్డులు (Accreditation Cards), హెల్త్ కార్డులు (Health Cards), ఇళ్ల స్థలాలు, గృహ నిర్మాణ సదుపాయాల కల్పన కోసం జరిగిన ఉద్యమాల్లో కీలకంగా వ్యవహరించారు.
బాధ్యతను మరింత పెంచిన పదవి
తనకు రెండోసారి జాతీయ కౌన్సిల్ సభ్యుడిగా అవకాశం కల్పించిన రాష్ట్ర నాయకత్వానికి తీగల కృష్ణారెడ్డి కృతజ్ఞతలు తెలిపారు. రాష్ట్ర అధ్యక్షుడు అల్లం నారాయణ, ప్రధాన కార్యదర్శి మారుతీ సాగర్, ఉపాధ్యక్షుడు బి.ఆర్. లెనిన్కు ప్రత్యేక ధన్యవాదాలు తెలియజేశారు.
ఈ సందర్భంగా ఆయన మాట్లాడుతూ.. తనపై నమ్మకంతో మరోసారి జాతీయ స్థాయిలో బాధ్యతలు అప్పగించడం ఆనందంగా ఉందన్నారు. ఈ నియామకం తన బాధ్యతను మరింత పెంచిందని, భవిష్యత్తులోనూ జర్నలిస్టుల సమస్యల పరిష్కారం కోసం, జాతీయ స్థాయిలో యూనియన్ బలోపేతానికి నిబద్ధతతో కృషి చేస్తానని తెలిపారు.
జర్నలిస్టుల నుంచి అభినందనలు
తీగల కృష్ణారెడ్డికి రెండోసారి జాతీయ స్థాయిలో గుర్తింపు లభించడంపై తొర్రూరు మండల అధ్యక్షుడు ఆకుతోట యాకన్న, ప్రధాన కార్యదర్శి ఎడ్ల మహేష్తో పాటు పలువురు జర్నలిస్టులు, వివిధ జర్నలిస్టు సంఘాల నాయకులు హర్షం వ్యక్తం చేశారు. ఆయనకు అభినందనలు తెలియజేస్తూ భవిష్యత్తులో మరిన్ని ఉన్నత బాధ్యతలు చేపట్టాలని ఆకాంక్షించారు.
Please tell us what is wrong. Your report will be sent to the website team.

