ప్రాథమిక వ్యవసాయ సహకార సంఘం (ఫైల్ ఫోటో)
* ఆరు జిల్లాల్లో కొత్త పీఏసీఎస్ల ఏర్పాటు..
* రైతులకు మరింత చేరువ కానున్న సేవలు
* గ్రామగ్రామాన సహకార సేవలు
ఆకేరు న్యూస్, వరంగల్ : ఉమ్మడి వరంగల్ జిల్లాలో వ్యవసాయ రంగాన్ని మరింత బలోపేతం చేసేందుకు ప్రభుత్వం కీలక నిర్ణయం తీసుకుంది. జిల్లాలో కొత్తగా 27 ప్రాథమిక వ్యవసాయ సహకార సంఘాల (Warangal New PACS) ఏర్పాటుకు అనుమతులు మంజూరు చేసింది. దీంతో ఇప్పటివరకు సహకార సేవలకు దూరంగా ఉన్న పలు గ్రామాల రైతులకు ఇకపై స్థానికంగానే సేవలు అందుబాటులోకి రానున్నాయి.
* ఆరు జిల్లాల్లో కొత్త పీఏసీఎస్లు..
హనుమకొండ జిల్లాలో నడికూడ, దామెర, వేలేరు ప్రాంతాలకు కొత్త సహకార సంఘాలు (Warangal New PACS) కేటాయించారు. జనగామ జిల్లాలో చిల్పూర్, తరిగొప్పుల ప్రాంతాలకు మంజూరు చేశారు. జయశంకర్ భూపాలపల్లి జిల్లాలో దామెరకుంట, పంబాపూర్, మొట్లపల్లి తదితర ప్రాంతాల్లో కొత్త సంఘాలు ఏర్పాటు కానున్నాయి.
ఇదే విధంగా మహబూబాబాద్, ములుగు, వరంగల్ జిల్లాల్లోనూ కొత్త ప్రాథమిక వ్యవసాయ సహకార సంఘాల (Primary Agricultural Cooperative Societies) ఏర్పాటుకు అనుమతులు లభించాయి. మొత్తంగా ఉమ్మడి వరంగల్ జిల్లాలో 27 కొత్త సంఘాలు అందుబాటులోకి రానున్నాయి.
* రైతులకు మరింత చేరువగా సేవలు..
ప్రాథమిక వ్యవసాయ సహకార సంఘాలు (PACS Services) గ్రామీణ ప్రాంతాల్లో రైతులకు ఆర్థిక, వ్యవసాయ సేవలు అందించే కీలక వ్యవస్థలు. వీటి ద్వారా రైతులకు పంట రుణాలు, ఎరువులు, విత్తనాల సరఫరా, ధాన్యం కొనుగోలు వంటి సేవలు అందుతాయి. వ్యవసాయ అవసరాలకు సంబంధించిన సహకార సేవలను స్థానికంగానే పొందే అవకాశం ఉంటుంది.
ఇప్పటికే ఉన్న సంఘాల పరిధిలో గ్రామాల సంఖ్య ఎక్కువగా ఉండటంతో రైతులు సేవలు పొందేందుకు ఇబ్బందులు ఎదుర్కొంటున్న పరిస్థితులు ఉన్నాయి. కొత్త సంఘాల ఏర్పాటుతో ఈ భారం తగ్గడంతో పాటు రైతులకు సేవలు మరింత వేగంగా అందే అవకాశం ఉంది.
* రాష్ట్రవ్యాప్తంగా 240 కొత్త సంఘాలు..
తెలంగాణ ప్రభుత్వం (Telangana Government) రాష్ట్రవ్యాప్తంగా 240 కొత్త ప్రాథమిక వ్యవసాయ సహకార సంఘాల (New PACS) ఏర్పాటుకు అనుమతిస్తూ నవంబర్ 11న ప్రభుత్వ మెమో జారీ చేసింది. ఇప్పటికే ఉన్న సహకార సంఘాల పునర్వ్యవస్థీకరణకు కూడా తదుపరి చర్యలు చేపట్టాలని వ్యవసాయ, సహకార శాఖ అధికారులను ఆదేశించింది.
నిబంధనల ప్రకారం అవసరమైన ప్రక్రియను పూర్తి చేయాలని సూచించింది. ఈ నిర్ణయంతో గ్రామీణ ప్రాంతాల్లో సహకార వ్యవస్థను బలోపేతం చేయడంతో పాటు రైతులకు ప్రభుత్వ వ్యవసాయ సేవలను మరింత చేరువ చేయాలన్న లక్ష్యంతో ప్రభుత్వం ముందుకు సాగుతోంది.
Also Read : 22న ప్రత్యేక పల్స్ పోలియో..!

Please tell us what is wrong. Your report will be sent to the website team.

