HANAMKONDA | తెలంగాణ ప్రభుత్వ ఉత్తర్వులు

*పూలే జయంతి ఉత్సవాల కన్వీనర్‌గా డాక్టర్ సంగాని మల్లేశ్వర్

*కేయూ జర్నలిజం విభాగాధిపతికి కీలక బాధ్యతలు

*పూలే ఆశయ సాధనే లక్ష్యం: కన్వీనర్‌గా బాధ్యతలు స్వీకరించనున్న మల్లేశ్వర్.

ఆకేరు న్యూస్, హన్మకొండ: తెలంగాణ రాష్ట్ర ప్రభుత్వం ప్రతిష్టాత్మకంగా నిర్వహించ తలపెట్టిన మహాత్మా జ్యోతిరావు పూలే జయంతి ఉత్సవాల రాష్ట్ర స్థాయి కన్వీనర్‌గా కాకతీయ విశ్వవిద్యాలయ (KU) జర్నలిజం విభాగాధిపతి డాక్టర్ సంగాని మల్లేశ్వర్ నియమితులయ్యారు. ఈ మేరకు రాష్ట్ర ప్రభుత్వం తరపున బీసీ సంక్షేమ శాఖ ప్రిన్సిపల్ సెక్రటరీ ఉత్తర్వులు జారీ చేశారు.

*ఉత్సవ కమిటీ వివరాలు:

ఈ ఉత్సవాల నిర్వహణ కోసం ప్రభుత్వం ప్రత్యేక కమిటీని ఏర్పాటు చేసింది. ఈ కమిటీకి చైర్మన్‌గా మాజీ ఎంపీ, కాంగ్రెస్ సీనియర్ నేత వి.హనుమంతరావు వ్యవహరించనున్నారు. మల్లేశ్వర్ కన్వీనర్‌గా ఉత్సవాల సమన్వయ బాధ్యతలను పర్యవేక్షిస్తారు.

*డాక్టర్ మల్లేశ్వర్ ప్రస్థానం:

ప్రస్తుతం కాకతీయ యూనివర్సిటీలో జర్నలిజం విభాగం హెడ్ (HOD) గా పనిచేస్తున్న డాక్టర్ మల్లేశ్వర్, మొదటి నుంచీ బీసీల హక్కుల కోసం, అణగారిన వర్గాల అభ్యున్నతి కోసం నిరంతరం కృషి చేస్తున్నారు. బీసీ వాదాన్ని ప్రజల్లోకి బలంగా తీసుకెళ్లడంలో ఆయనది కీలక పాత్ర. ప్రస్తుతం ఆయన ‘పూలే ఆశయ సాధన సమితి’ వ్యవస్థాపక రాష్ట్ర అధ్యక్షుడిగా కూడా సేవలు అందిస్తున్నారు.

తనపై నమ్మకంతో ఈ కీలక బాధ్యతను అప్పగించినందుకు డాక్టర్ సంగాని మల్లేశ్వర్ రాష్ట్ర ప్రభుత్వానికి ప్రత్యేక కృతజ్ఞతలు తెలిపారు. పూలే ఆశయాలను స్ఫూర్తిగా తీసుకుని ఉత్సవాలను ఘనంగా నిర్వహిస్తామని ఆయన పేర్కొన్నారు. ఈ సందర్భంగా కేయూ అధ్యాపకులు, విద్యార్థులు మరియు బీసీ సంఘాల నేతలు ఆయనకు శుభాకాంక్షలు తెలియజేశారు.