HANAMKONDA | 12 మంది అరెస్ట్ - రూ. 1.06 లక్షల నగదు సీజ్

* ఆన్‌లైన్ క్రికెట్ బెట్టింగ్ స్థావరంపై టాస్క్ ఫోర్స్ మెరుపు దాడి.. నిర్వాహకుడు రాజేష్‌తో పాటు 11 మంది పందెం రాయుళ్లు కటకటాల్లోకి

ఆకేరు న్యూస్, హన్మకొండ: ఐపీఎల్ ఫీవర్ పరాకాష్టకు చేరుతున్న వేళ, దానిని అడ్డుపెట్టుకుని అక్రమంగా సొమ్ము చేసుకుంటున్న క్రికెట్ బెట్టింగ్ ముఠాల ఆటను వరంగల్ టాస్క్‌ఫోర్స్ పోలీసులు కట్టడి చేశారు.

హన్మకొండలోని కేయూసీ (KUC) పోలీస్ స్టేషన్ పరిధిలో గుట్టుచప్పుడు కాకుండా సాగుతున్న ఆన్లైన్ క్రికెట్ బెట్టింగ్ దందాను టాస్క్‌ఫోర్స్ బృందం సోమవారం రట్టు చేసింది. ఈ దాడుల్లో కీలక సూత్రధారి గట్ల రాజేష్‌తో పాటు మరో 11 మంది పందెం రాయుళ్లను పోలీసులు అదుపులోకి తీసుకున్నారు.

* ఆన్లైన్ వెబ్‌సైట్ ద్వారా నెట్‌వర్క్..
నిందితులు ‘క్రిక్666.లైవ్’ (Cric666.live) అనే వెబ్‌సైట్ ద్వారా పక్కా ప్రణాళికతో బెట్టింగ్‌లు నిర్వహిస్తున్నట్లు పోలీసులు గుర్తించారు. ముఖ్యంగా వరంగల్, హన్మకొండ, జనగామ ప్రాంతాలకు చెందిన అమాయక ఆటో డ్రైవర్లు, ప్రైవేట్ ఉద్యోగులు మరియు రోజువారీ కూలీలను లక్ష్యంగా చేసుకుని ఈ ముఠా వల విసురుతోంది. తక్కువ సమయంలో ఎక్కువ డబ్బు సంపాదించవచ్చని ఆశ చూపి వారిని అప్పుల ఊబిలోకి నెడుతున్నట్లు దర్యాప్తులో తేలింది.

* స్వాధీనం చేసుకున్న సొత్తు:
టాస్క్‌ఫోర్స్ పోలీసులు నిందితుల నుంచి , రూ. 1,06,000 నగదు, 12 స్మార్ట్ ఫోన్లను స్వాధీనం చేసుకున్నారు. పట్టుబడిన నిందితులను, స్వాధీనం చేసుకున్న నగదు మరియు మొబైల్ ఫోన్లను తదుపరి విచారణ నిమిత్తం కేయూసీ పోలీసులకు అప్పగించారు. వారిపై కేసు నమోదు చేసి లోతైన దర్యాప్తు చేపడుతున్నారు.

* ఏసీపీ హెచ్చరిక:
ఈ సందర్భంగా టాస్క్‌ఫోర్స్ ఏసీపీ ఏ. మధుసూదన్ మాట్లాడుతూ.. ఐపీఎల్ సీజన్‌లో ఆన్లైన్ బెట్టింగులకు పాల్పడితే ఎంతటి వారైనా ఉపేక్షించేది లేదని స్పష్టం చేశారు. యువత, పేద కార్మికులు ఇటువంటి వ్యసనాలకు బానిసై జీవితాలను నాశనం చేసుకోవద్దని హితవు పలికారు. బెట్టింగ్ నిర్వాహకులపై నిఘా నిరంతరం కొనసాగుతుందని, ఎవరైనా ఇలాంటి అక్రమాలకు పాల్పడితే కఠిన చర్యలు తప్పవని ఆయన హెచ్చరించారు.