* నిరుద్యోగుల గొంతు నొక్కుతున్న ‘జీవో’ల సర్కార్
* అస్మదీయుల కోసమే జీవో నంబర్ 4.. గ్రూప్-1 తరహాలోనే డిగ్రీ లెక్చరర్ పోస్టుల్లోనూ కుట్ర!
* రేషన్ కార్డుల ఏరివేత పైశాచిక చర్య.. నిరుద్యోగులను తొక్కుకుంటూ అధికారంలోకి వచ్చారా? – కవిత నిలదీత
* ఆరు గ్యారెంటీల పేరుతో మోసం.. మూసీకి వేల కోట్లు, ఫీజు రీయింబర్స్మెంట్కు పైసల్లేవా?
ఆకేరు న్యూస్, హైదరాబాద్: తెలంగాణ రాష్ట్రంలో నిరుద్యోగ యువత ఆశలపై కాంగ్రెస్ ప్రభుత్వం నీళ్లు చల్లుతోందని, జీవోల పేరుతో ఉద్యోగ నియామకాలకు అడ్డంకులు సృష్టిస్తోందని తెలంగాణ జాగృతి అధ్యక్షురాలు కల్వకుంట్ల కవిత తీవ్రస్థాయిలో మండిపడ్డారు. గురువారం జాగృతి కార్యాలయంలో ఏర్పాటు చేసిన మీడియా సమావేశంలో ఆమె మాట్లాడుతూ.. ప్రభుత్వం అనుసరిస్తున్న నిరుద్యోగ వ్యతిరేక విధానాలను, రేషన్ కార్డుల ఏరివేత కుట్రలను ఆధారాలతో సహా ఎండగట్టారు.
* జీవో నంబర్ 4: అస్మదీయులకు కట్టబెట్టే కుట్ర!
డిగ్రీ లెక్చరర్ల ఉద్యోగాలను తమ పార్టీ అనుచరులకు, కార్యకర్తలకు ఇప్పించుకోవాలనే దురుద్దేశంతోనే ప్రభుత్వం జీవో నంబర్ 4ను తీసుకువచ్చిందని కవిత ఆరోపించారు. 2011 తర్వాత అంటే దాదాపు 15 ఏళ్ల సుదీర్ఘ నిరీక్షణ అనంతరం వచ్చిన ఈ నోటిఫికేషన్లో అనేక నిబంధనలను అడ్డంకులుగా మార్చారని ఆమె విమర్శించారు.
వెయిటేజీ మాయాజాలం: పీహెచ్డీ (PhD) చేసిన వారికి ఏకంగా 25 మార్కుల వెయిటేజీ ఇవ్వడం వెనుక పెద్ద కుట్ర దాగి ఉందని, గత కొన్నేళ్లుగా పీహెచ్డీ అడ్మిషన్లే లేని పరిస్థితుల్లో ఈ నిబంధన ఎవరి కోసం తెచ్చారని ప్రశ్నించారు.
ఇంటర్వ్యూల పేరిట అవినీతి: పది మార్కుల ఇంటర్వ్యూ నిబంధన ద్వారా తమకు కావాల్సిన వారిని ఎంపిక చేసుకునేందుకు మార్గం సుగమం చేసుకున్నారని ఆరోపించారు.
సెట్ (SET) నిర్వహణలో విఫలం: గత మూడేళ్లుగా స్టేట్ ఎలిజిబిలిటీ టెస్ట్ నిర్వహించకపోవడంతో వేలమంది అభ్యర్థులు అనర్హులుగా మారిపోతున్నారని ఆవేదన వ్యక్తం చేశారు.
* నోటిఫికేషన్ ఏదైనా.. జీవో అడ్డంకే!
కాంగ్రెస్ ప్రభుత్వం ఇచ్చిన ప్రతి నోటిఫికేషన్లోనూ ఒక వివాదాస్పద జీవోను జొప్పించి నిరుద్యోగుల జీవితాలతో ఆడుకుంటోందని కవిత విమర్శించారు.
డీఎస్సీ (DSC): జీవో నంబర్ 104
గ్రూప్స్ (Groups): జీవో నంబర్ 29
పోలీస్ ఉద్యోగాలు: జీవో నంబర్ 46
గురుకులాలు: జీవో నంబర్ 81
మహిళా రిజర్వేషన్లు: ఆడబిడ్డలకు అన్యాయం చేసేలా జీవో నంబర్ 4.
ఈ జీవోలన్నింటినీ తక్షణమే రివ్యూ చేసి రద్దు చేయాలని ఆమె డిమాండ్ చేశారు. లేనిపక్షంలో రాష్ట్రవ్యాప్తంగా నిరుద్యోగులను ఏకం చేసి ప్రభుత్వంపై పెద్ద ఎత్తున పోరాటం చేస్తామని హెచ్చరించారు.
* రాహుల్ గాంధీ సాక్షిగా మోసం!
“నిరుద్యోగులను కాంగ్రెస్ కేవలం రాజకీయ లబ్ధి కోసమే వాడుకుంది. రేవంత్ రెడ్డి, ఉత్తమ్ కుమార్ రెడ్డి మాటలు నమ్మరనే ఉద్దేశంతో అశోక్ నగర్ వీధుల్లో రాహుల్ గాంధీతో హామీ ఇప్పించారు. రెండు లక్షల ఉద్యోగాలు, జాబ్ క్యాలెండర్ ఏమైంది?” అని కవిత నిలదీశారు. ముఖ్యమంత్రి రేవంత్ రెడ్డి ‘తొక్కుకుంటూ పైకి వచ్చాను’ అని చెబుతుంటారని, కానీ వాస్తవానికి నిరుద్యోగుల నెత్తి మీద కాలు పెట్టి తొక్కుకుంటూ ఆయన అధికారంలోకి వచ్చారని ఎద్దేవా చేశారు.
* సంక్షేమ పథకాలకు మంగళం – మూసీకి నిధుల వరద!
ప్రభుత్వ ప్రాధాన్యతలు అస్తవ్యస్తంగా ఉన్నాయని కవిత విమర్శించారు.
ఫీజు రీయింబర్స్మెంట్ కోసం రూ. 7,000 కోట్లు బకాయిలు చెల్లించలేక విద్యార్థులను ఇబ్బంది పెడుతున్న ప్రభుత్వం, మూసీ ప్రాజెక్టుకు మాత్రం రూ. 7,000 కోట్లు కేటాయించడం దారుణమన్నారు.
బాలింతలకు ఇచ్చే కెసిఆర్ కిట్లను, ఆర్థిక సాయాన్ని నిలిపివేశారని మండిపడ్డారు.
అంగన్వాడీలకు జీతాలు సరిగా ఇవ్వడం లేదని, 9 నెలల క్రితం జరిగిన నర్సింగ్ పరీక్షల ఫలితాలను కూడా విడుదల చేయలేని అసమర్థ స్థితిలో ప్రభుత్వం ఉందని ధ్వజమెత్తారు.
* రేషన్ కార్డుల ఏరివేతపై హెచ్చరిక!
పేదవాడి కడుపు కొట్టేలా రేషన్ కార్డులను ఏరివేసే ప్రయత్నం చేస్తే ఊరుకోబోమని కవిత హెచ్చరించారు. “గత ప్రభుత్వం కార్డులు ఇవ్వలేదని విమర్శించిన మీరు, ఇప్పుడు ఐటీ రిటర్న్స్, చిన్న ప్రైవేటు ఉద్యోగాల నెపంతో 10 నుంచి 15 లక్షల కార్డులను రద్దు చేయాలని చూడటం పైశాచికం. కొత్తగా 5 లక్షల కార్డులు ఇచ్చి, పాతవి 15 లక్షలు తీసేయడం ఏ రకమైన న్యాయం?” అని ప్రశ్నించారు.
చివరగా, నిరుద్యోగుల కన్నీటి గాథలను పట్టించుకోకుండా ఎమ్మెల్యేలు, మంత్రులు ఆటపాటల్లో మునిగిపోవడం సిగ్గుచేటని, ఇప్పటికైనా ప్రభుత్వం కళ్లు తెరిచి జీవోలను రద్దు చేయాలని, లేదంటే ప్రజా క్షేత్రంలో నిలదీస్తామని కల్వకుంట్ల కవిత స్పష్టం చేశారు.
About the Author
