Gujarat Boy Surgery | వైద్యరంగంలో అద్భుతం

Published: 26 Aug 2026 • 08:26 PM

* మెడ నుంచి నోటిదాకా దిగబడ్డ రాడ్..

* బాలుడికి శస్త్రచికిత్స ద్వారా పునర్జన్మ

ఆకేరు న్యూస్, డెస్క్: అత్యంత క్లిష్టమైన ఘోర ప్రమాదం నుంచి ఒక బాలుడు ప్రాణాలతో బయటపడిన విస్మయకర సంఘటన గుజరాత్‌లోని సూరత్ నగరంలో జరిగింది. నిర్మాణంలో ఉన్న భవనం పైనుంచి పడిపోయి, మెడ వెనుక భాగం నుంచి నోటి వరకు 3 అడుగుల ఇనుప రాడ్ చొచ్చుకుపోయినప్పటికీ, ఆ బాలుడికి వైద్యులు అత్యంత సంక్లిష్టమైన శస్త్రచికిత్స చేసి కొత్త జీవితాన్ని ఇచ్చారు.

* ఘటన నేపథ్యం..

గుజరాత్‌లోని సూరత్ నగరం ఉన్న్ ప్రాంతంలో ఉన్న మిస్బాహున్ నగర్ ‘మహమ్మదియా మదర్సా’లో 10 ఏళ్ల నాజిష్ మొహమ్మద్ చదువుకుంటున్నాడు. మంగళవారం సాయంత్రం వేళ మదర్సా మూడో అంతస్తుపై ఆడుకుంటుండగా బాలుడు ప్రమాదవశాత్తు కిందకు పడిపోయాడు. సరిగ్గా పక్కనే నిర్మాణం జరుగుతున్న భవనంలోని పిల్లర్ నుంచి బయటకు వచ్చిన 3 అడుగుల ఐరన్ రాడ్‌పై అతడు బలంగా పడ్డాడు. ఈ తీవ్ర ప్రమాదంలో ఆ రాడ్ బాలుడి భుజం, మెడ వెనుక భాగం గుండా శరీరంలోకి దిగి నోటి గుండా బయటకు వచ్చింది.

* స్థానికుల సమయోచిత స్పందన..

వెంటనే గమనించిన స్థానిక ప్రజలు ఏమాత్రం తడబడకుండా కట్టర్ సాయంతో రాడ్ మిగిలిన భాగాన్ని కత్తిరించారు. శరీరంలో ఇరుక్కుపోయిన ఇనుప రాడ్‌తోనే బాలుడిని వెంటనే ఆంబులెన్స్‌లో స్థానిక ‘సూరత్ న్యూ సివిల్ హాస్పిటల్’ అత్యవసర విభాగానికి తరలించారు.

* వైద్యుల శ్రమ.. పునర్జన్మ..

ఆసుపత్రికి చేరే సమయానికి బాలుడి పరిస్థితి అత్యంత విషమంగా ఉందని, అతను బతికే అవకాశాలు 20 శాతం మాత్రమే ఉన్నాయని వైద్యులు గుర్తించారు. మత్తు మందు అందించడానికి గొంతులో ట్యూబ్ అమర్చడం పెద్ద సవాలుగా మారినా అనస్థీషియా వైద్యులు సమర్థంగా పూర్తి చేశారు.

అనంతరం డాక్టర్ దివ్యాంగ్ దవే, డాక్టర్ ప్రకాష్ పటేల్, ప్లాస్టిక్ సర్జన్ డాక్టర్ నీలేష్ కాచ్ఛియా, డాక్టర్ దీప్ షా, డాక్టర్ రుత్విక్, డాక్టర్ కౌశల్, డాక్టర్ హార్దిక్ నేతృత్వంలో ఈఎన్టీ (ENT), సర్జరీ నిపుణుల బృందం గంటపాటు శస్త్రచికిత్స చేసి ఇనుప రాడ్‌ను సురక్షితంగా బయటకు తీసింది.

అదృష్టవశాత్తూ ప్రధాన రక్తనాళాలకు ఎలాంటి నష్టం జరగకపోవడం, గొంతులోని కండరాలు, లాలాజల గ్రంథుల గాయాలను వెంటనే కుట్లు వేసి బాగు చేయడంతో బాలుడు ప్రాణాపాయం నుంచి బయటపడ్డాడు. ప్రస్తుతం అతడిని ఐసీయూలో ఉంచి పర్యవేక్షిస్తున్నారు. ప్రమాదంపై పూర్తి వివరాల కోసం సీసీటీవీ దృశ్యాలను తనిఖీ చేస్తున్నట్లు స్థానిక పోలీసులు తెలిపారు.