A.V Ranganath | హైడ్రా కమిషనర్ రంగనాథ్‌కు హైకోర్టులో ఊరట

Published: 01 Sep 2026 • 03:47 PM

* సింగిల్ బెంచ్ తొలగింపు ఆదేశాలపై స్టే..

* తదుపరి విచారణ సెప్టెంబర్ 3కు వాయిదా

* శాంతా శ్రీరామ్ కన్‌స్ట్రక్షన్స్ కేసులో కీలక మలుపు..

ఆకేరు న్యూస్, హైదరాబాద్ : హైడ్రా కమిషనర్ ఏవీ రంగనాథ్‌కు తెలంగాణ హైకోర్టులో భారీ ఊరట లభించింది. తనను హైడ్రా కమిషనర్ పదవి నుంచి తప్పించి మరో అధికారిని నియమించాలంటూ సింగిల్ బెంచ్ ఇచ్చిన ఆదేశాలను సవాల్ చేస్తూ రంగనాథ్ దాఖలు చేసిన అప్పీల్‌పై డివిజన్ బెంచ్ విచారణ చేపట్టింది. సింగిల్ బెంచ్ ఇచ్చిన ఆదేశాల అమలును తాత్కాలికంగా నిలిపివేస్తూ.. తదుపరి విచారణను సెప్టెంబర్ 3కు వాయిదా వేసింది. దీంతో రంగనాథ్ హైడ్రా కమిషనర్‌గా కొనసాగేందుకు మార్గం సుగమమైంది.

* అసలు వివాదం ఏంటి?

మేడ్చల్–మల్కాజిగిరి జిల్లా మల్కాజిగిరి మండలం లోతుకుంట గ్రామంలోని సర్వే నంబర్లు 1, 2లో సుమారు 40 ఎకరాల భూమికి సంబంధించిన వివాదం ఈ కేసుకు కేంద్రంగా ఉంది.
ఈ భూమిపై హైడ్రా చర్యలను సవాల్ చేస్తూ శాంతా శ్రీరామ్ కన్‌స్ట్రక్షన్స్ ప్రైవేట్ లిమిటెడ్ హైకోర్టును ఆశ్రయించింది. గతంలో కోర్టు ఇచ్చిన ఆదేశాలను హైడ్రా అధికారులు ఉల్లంఘించారంటూ సంస్థ కోర్టు ధిక్కరణ పిటిషన్లు దాఖలు చేసింది. ఈ వ్యవహారంలో హైడ్రా కమిషనర్ రంగనాథ్‌ను ప్రతివాదిగా చేర్చారు.ఈ కేసు విచారణ సందర్భంగా హైడ్రా అధికారులు సంబంధిత ప్రైవేటు ఆస్తిలోకి వెళ్లరాదని కోర్టు స్పష్టం చేసింది. హైడ్రా తరఫున న్యాయవాది కూడా ఇకపై అధికారులు, సిబ్బంది ఆస్తిలోకి వెళ్లరని కోర్టుకు హామీ ఇచ్చారు. ఆ ఆస్తి ప్రభుత్వ భూమి కాదని, ప్రైవేటు ఆస్తి అని కోర్టు తన ఆదేశాల్లో పేర్కొంది.

* జూలై 27న కీలక ఆదేశాలు

ఈ వ్యవహారం జూలై 27న కీలక మలుపు తిరిగింది. కోర్టు ధిక్కరణ కేసుల విచారణ సందర్భంగా సింగిల్ బెంచ్ తీవ్ర వ్యాఖ్యలు చేసింది. హైడ్రా కమిషనర్‌గా కొనసాగుతున్న అధికారిపై పెద్ద సంఖ్యలో కోర్టు ధిక్కరణ కేసులు పెండింగ్‌లో ఉన్నాయని పేర్కొంటూ, రంగనాథ్‌ను హైడ్రా కమిషనర్ బాధ్యతల నుంచి తప్పించాలని రాష్ట్ర ప్రభుత్వ ప్రధాన కార్యదర్శికి సూచించింది. కొన్ని నివేదికల ప్రకారం అప్పటికి రంగనాథ్‌పై 63 కోర్టు ధిక్కరణ కేసులు పెండింగ్‌లో ఉన్నాయని కోర్టు ప్రస్తావించింది.కోర్టు ఆదేశాలతో రంగనాథ్ పదవిపై అనిశ్చితి ఏర్పడింది. అయితే సింగిల్ బెంచ్ ఆదేశాలను తుది తీర్పుగా స్వీకరించకుండా ఆయన డివిజన్ బెంచ్‌ను ఆశ్రయించారు.

* రంగనాథ్ అప్పీల్ ఎందుకు?

సింగిల్ జడ్జి ఆదేశాలతో తనను కమిషనర్ పదవి నుంచి తప్పించే పరిస్థితి ఏర్పడటంతో రంగనాథ్ హైకోర్టు డివిజన్ బెంచ్‌లో అప్పీల్ దాఖలు చేశారు. సింగిల్ బెంచ్ ఆదేశాలను నిలిపివేయడంతో పాటు తనపై చేసిన కొన్ని వ్యాఖ్యలను కూడా సవాల్ చేసినట్లు తాజా సమాచారం. ముఖ్యంగా తనను పదవి నుంచి తప్పించి మరో అధికారిని నియమించాలన్న సూచనను రద్దు చేయాలని ఆయన కోరినట్లు తెలుస్తోంది.దీంతో మంగళవారం రంగనాథ్ దాఖలు చేసిన అప్పీల్‌పై డివిజన్ బెంచ్ విచారణ చేపట్టింది.సింగిల్ బెంచ్ ఇచ్చిన తొలగింపు ఆదేశాల అమలుపై తాత్కాలికంగా సస్పెన్షన్ ఇవ్వడంతో రంగనాథ్‌కు తక్షణ ఊరట లభించింది. కేసు తదుపరి విచారణను సెప్టెంబర్ 3కు వాయిదా వేసింది.అంటే సింగిల్ బెంచ్ ఆదేశాలు పూర్తిగా రద్దయినట్లు కాదు. వాటి అమలు మాత్రమే ప్రస్తుతానికి నిలిచిపోయింది. తుది నిర్ణయం డివిజన్ బెంచ్ తదుపరి విచారణలో తేలుతుంది .
—————————