Konda Surekha | ఆ టెండర్లు ఉంటాయా ? ఊడుతాయా ?

Published: 04 Sep 2026 • 03:32 PM

* కొండా అనుచరుల ఆర్థిక మూలాలపై ఆరా ?

* టెండర్ల వ్యవహారంపై చర్చ

ఆకేరు న్యూస్, వరంగల్ : మాజీ మంత్రి కొండా సురేఖ రాజకీయ పరిణామాల నేపథ్యంలో ఆమెకు సన్నిహితంగా ఉన్న నేతలు, అనుచరులకు సంబంధించిన వ్యాపార, టెండర్ వ్యవహారాలపై రాజకీయ వర్గాల్లో కొత్త చర్చ మొదలైంది. కొండా వర్గానికి చెందిన కొందరి ఆర్థిక మూలాలపై ఆరా తీస్తున్నారనే ప్రచారం ఉమ్మడి వరంగల్ జిల్లా రాజకీయాల్లో వినిపిస్తోంది. ఈ అంశంపై ఇప్పటివరకు సంబంధిత ప్రభుత్వ శాఖల నుంచి ఎలాంటి అధికారిక ప్రకటన వెలువడలేదు. దీంతో రాజకీయ వర్గాల్లో వినిపిస్తున్న సమాచారం, ఆరోపణలపై స్పష్టత రావాల్సి ఉంది.

* 510 మంది ఔట్ సోర్సింగ్ ఉద్యోగుల పరిస్థితి ఏంటి ?

ఇటీవల 510 మంది ఔట్ సోర్సింగ్ ఉద్యోగుల నియామకానికి సంబంధించిన టెండర్ వ్యవహారం కూడా చర్చనీయాంశంగా మారింది. వరంగల్ పరిధిలోని ఒక ప్రభుత్వ ఆసుపత్రిలో ఔట్‌సోర్సింగ్ ఉద్యోగుల నియామకానికి సంబంధించిన టెండర్‌ను కొండా సురేఖకు సన్నిహితుడిగా భావిస్తున్న వ్యక్తికి కేటాయించినట్లు రాజకీయ వర్గాల్లో ప్రచారం జరుగుతోంది. ఈ టెండర్ కేటాయింపుపై మరో వర్గం అభ్యంతరం వ్యక్తం చేస్తూ, ప్రభుత్వానికి ఫిర్యాదు చేసినట్లు సమాచారం. టెండర్ ప్రక్రియను సమీక్షించి అవసరమైతే రద్దు చేయాలని వారు కోరినట్లు ప్రచారం సాగుతోంది. అయితే ఫిర్యాదులో ఉన్న ఆరోపణలపై అధికారికంగా నిర్ధారణ కావాల్సి ఉంది. కొండా సురేఖ రాజకీయంగా ప్రస్తుతం ఎదుర్కొంటున్న పరిణామాల నేపథ్యంలో, ఆమె అనుచరులకు సంబంధించిన పలు వ్యవహారాలు ఇప్పుడు రాజకీయ చర్చకు వస్తున్నాయి. కొందరు నేతలు దీనిని రాజకీయ కోణంలో చూస్తుండగా, మరికొందరు మాత్రం టెండర్ల కేటాయింపు ప్రక్రియలో పారదర్శకత ఉండాలనే డిమాండ్ చేస్తున్నట్లు తెలుస్తోంది.

మరోవైపు, కొండా వర్గం అనుచరులపై ఉద్దేశపూర్వకంగా ఒత్తిడి తీసుకురావడానికి ప్రయత్నాలు జరుగుతున్నాయనే వాదనలు కూడా వినిపిస్తున్నాయి. అయితే ఈ ఆరోపణలకు సంబంధించి స్పష్టమైన ఆధారాలు, అధికారిక ప్రకటనలు వెలువడాల్సి ఉంది. ఈ టెండర్ వ్యవహారం వరంగల్ రాజకీయాల్లో కొత్త చర్చకు దారితీసింది.