Nandana YouTuber Arrest | ప్రముఖ యూట్యూబర్ నందన అరెస్ట్..

Published: 07 Sep 2026 • 04:52 PM

* లండన్ జాబ్స్ పేరుతో కోట్లలో మోసం..

* కోట్లలో డిపాజిట్లు.. అమాయకులకు వల

* ఎయిర్‌పోర్టులోనే నందన అరెస్ట్

ఆకేరు న్యూస్, హైదరాబాద్: ప్రముఖ యూట్యూబర్, ‘నందూస్ వరల్డ్’ (Nandhu’s World) ఛానెల్ నిర్వాహకురాలు నందనను పోలీసులు అరెస్ట్ చేశారు. విదేశాలలో ఉద్యోగాలు ఇప్పిస్తామంటూ అమాయకులకు ఎర వేసి, రూ.కోట్లలో మోసాలకు పాల్పడినట్లు ఆరోపణలు రావడంతో పోలీసులు నంద‌న‌ను అరెస్ట్ చేశారు.

* కేసు పూర్వాపరాలు

నందన విదేశీ ఉద్యోగాలపై ఆసక్తి ఉన్న నిరుద్యోగులను లక్ష్యంగా చేసుకుంది. లండన్‌లో వర్క్ పర్మిట్, స్పాన్సర్‌షిప్‌లు ఇప్పిస్తామని నమ్మబలికి పలువురి నుంచి భారీగా డబ్బులు వసూలు చేసినట్లు బాధితులు తెలిపారు. డబ్బులు ఇచ్చినప్పటికీ ఉద్యోగాలు రాకపోవడం, సమయం దాటుతుండడంతో నందనను నిలదీయగా ఆమె నుండి సరైన సమాధానం రాలేదు. బాధితులు చివరకు పోలీసులను ఆశ్రయించడంతో ఈ మోసం వెలుగులోకి వచ్చింది.

* శంషాబాద్ ఎయిర్‌పోర్టులో అరెస్ట్..

ఈ ఘరానా మోసంపై ఇబ్రహీంపట్నం పోలీస్ స్టేషన్‌లో కేసు నమోదు కాగా, పోలీసులు దర్యాప్తు వేగవంతం చేశారు. అరెస్టు నుంచి తప్పించుకునేందుకు నందన పరారవ్వగా, పోలీసు యంత్రాంగం ఆమెపై ‘లుకౌట్ నోటీసులు’ (Lookout Notices) జారీ చేసింది. ఈ క్రమంలో శంషాబాద్‌లోని రాజీవ్ గాంధీ అంతర్జాతీయ విమానాశ్రయం (RGIA) నుండి ఇతర ప్రాంతాలకు వెళ్లేందుకు లేదా విదేశాలకు పారిపోయేందుకు యత్నిస్తుండగా, ఎయిర్‌పోర్ట్ ఇమిగ్రేషన్ అధికారులు గుర్తించి ఆమెను అదుపులోకి తీసుకున్నారు.

* దర్యాప్తు వేగవంతం..

అనంతరం ఎయిర్‌పోర్ట్ అధికారులు ఆమెను ఇబ్రహీంపట్నం పోలీసులకు అప్పగించారు. ఈ మోసంలో ఎంతమంది బాధితులు ఉన్నారు, ఎంత మొత్తంలో డబ్బులు చేతులు మారాయి అనే కోణంలో పోలీసులు లోతుగా విచారణ జరుపుతున్నారు. సోషల్ మీడియా ఫాలోయింగ్‌ చూసి ఇలాంటి ఫేక్ స్పాన్సర్‌షిప్‌లను, విదేశీ ఉద్యోగ ఆఫర్లను నమ్మవద్దని పోలీసులు ప్రజలకు విజ్ఞప్తి చేస్తున్నారు.