(From L-R) Sudha Yadav, Dhal Singh Bisen, Dushyant Gautam, and Braj Mohan Ram.
* నాలుగు రాష్ట్రాలకు కొత్త గవర్నర్ లు
* రాజకీయ ప్రస్థానం నుంచి రాజ్‌భవన్‌కు..
ఆకేరు న్యూస్‌, డెస్క్ : కార్గిల్ యుద్ధంలో భర్తను కోల్పోయి ఎన్నికల రాజకీయాల్లోకి అడుగుపెట్టిన విద్యావేత్త.. ఆయుర్వేద వైద్యం నుంచి ప్రజాప్రతినిధిగా ఎదిగిన నాయకుడు.. వరుసగా మూడుసార్లు లోక్‌సభకు ఎన్నికైన నేత.. నగరపాలక సంస్థ నుంచి పార్లమెంటుకు చేరిన సంస్థాగత నాయకుడు.. భిన్నమైన నేపథ్యాలున్న ఈ నలుగురు ఇప్పుడు గవర్నర్ బాధ్యతలు చేపట్టనున్నారు.
సుధా యాదవ్‌కు కర్ణాటక, ఢాల్‌సింగ్‌ బిసేన్‌కు ఉత్తరాఖండ్‌, బ్రజ్‌మోహన్‌ రామ్‌కు ఒడిశా, దుష్యంత్‌ గౌతమ్‌కు సిక్కిం బాధ్యతలు అప్పగిస్తూ రాష్ట్రపతి ద్రౌపది ముర్ము అక్టోబర్‌ 12న ఉత్తర్వులు జారీ చేశారు. బాధ్యతలు స్వీకరించిన రోజు నుంచి నియామకాలు అమల్లోకి వస్తాయి.
* కార్గిల్ వీరుడి సతీమణి కర్ణాటక గవర్నర్
సుధా యాదవ్‌.. జీవితాన్ని కార్గిల్ వార్ మలుపు తిప్పింది. కర్ణాటక గవర్నర్‌గా నియమితులైన డాక్టర్‌ సుధా యాదవ్‌ స్వస్థలం హరియాణా. రాజకీయాల్లోకి రాకముందు ఆమెకు విద్యా రంగంతో అనుబంధం ఉంది. రూర్కీ విశ్వ విద్యాలయం-ప్రస్తుత భారతీయ సాంకేతిక సంస్థ రూర్కీ (IIT Roorkee)-నుంచి రసాయన శాస్త్రంలో మాస్టర్స్‌, పీహెచ్‌డీ పూర్తిచేశారు.
ఆమె భర్త సుఖ్‌బీర్‌సింగ్‌ యాదవ్‌ సరిహద్దు భద్రతా దళం (BSF)లో డిప్యూటీ కమాండెంట్‌. కార్గిల్ యుద్ధ సమయంలో ఆయన అమరుడవడంతో సుధా యాదవ్‌ జీవితంలో కీలక మలుపు వచ్చింది. 1999 లోక్‌సభ ఎన్నికల్లో మహేంద్రగఢ్‌ నుంచి బీజేపీ అభ్యర్థిగా బరిలోకి దిగారు. అప్పట్లో హరియాణా బీజేపీ వ్యవహారాలు చూసిన నరేంద్ర మోదీ ఆమె అభ్యర్థిత్వాన్ని ప్రతిపాదించారు. తొలి పోటీలోనే రావు ఇంద్రజిత్‌సింగ్‌పై సుమారు 1.39 లక్షల ఓట్ల ఆధిక్యంతో గెలిచారు.
ఎన్నికల రాజకీయాలతోపాటు పార్టీ సంస్థాగత బాధ్యతల్లోనూ పనిచేశారు. 2015లో బీజేపీ ఓబీసీ మోర్చా జాతీయ ఇన్‌చార్జిగా నియమితులయ్యారు. 2019–2022 మధ్య జాతీయ వెనుకబడిన తరగతుల కమిషన్‌ సభ్యురాలిగా సేవలందించారు. 2022లో బీజేపీ అత్యున్నత నిర్ణయ వేదికల్లో ఒకటైన పార్లమెంటరీ బోర్డులో చోటు పొందారు. ఇప్పుడు థావర్‌చంద్‌ గెహ్లోత్‌ స్థానంలో కర్ణాటక గవర్నర్ బాధ్యతలు స్వీకరించనున్నారు.
*బ్రజ్‌మోహన్‌ రామ్‌.. పలామూ నుంచి ఒడిశాకు
ఒడిశా కొత్త గవర్నర్ బ్రజ్‌మోహన్‌ రామ్‌ రాజకీయ ప్రస్థానం ఉమ్మడి బిహార్‌లో ప్రారంభమైంది. ప్రస్తుతం ఝార్ఖండ్‌లో ఉన్న పలామూ ప్రాంతానికి చెందిన ఆయన వయస్సు 68 సంవత్సరాలు. 1991–1995 మధ్య బిహార్‌ శాసనసభ సభ్యుడిగా పనిచేశారు. అనంతరం జాతీయ రాజకీయాల్లోకి ప్రవేశించి పలామూ లోక్‌సభ స్థానం నుంచి 1996, 1998, 1999 ఎన్నికల్లో వరుసగా విజయం సాధించారు.
వ్యవసాయ కుటుంబం నుంచి వచ్చిన రామ్‌.. ప్రజాప్రతినిధి బాధ్యతలతోపాటు దళిత వర్గాల సంస్థాగత కార్యక్రమాల్లో పనిచేశారు. ఝార్ఖండ్‌ బీజేపీ ఎస్సీ మోర్చా, ధోబీ మహాసంఘ్‌ కార్యకలాపాలతో ఆయనకు అనుబంధం ఉంది. చంద్వా ప్రాంతంలో విద్యాసంస్థల ఏర్పాటుకు కృషిచేశారు. ఒడిశాలో కంభంపాటి హరిబాబు స్థానంలో ఆయన బాధ్యతలు చేపట్టనున్నారు.
* ఆయుర్వేద వైద్యుడికి రాజ్యాంగ బాధ్యతలు
ఉత్తరాఖండ్‌ గవర్నర్‌గా నియమితులైన డాక్టర్‌ ఢాల్‌సింగ్‌ బిసేన్‌ వృత్తిరీత్యా ఆయుర్వేద వైద్యుడు. మధ్యప్రదేశ్‌కు చెందిన ఆయనకు శాసనసభ, రాష్ట్ర మంత్రివర్గం, లోక్‌సభలో పనిచేసిన అనుభవం ఉంది. నాలుగుసార్లు ఎమ్మెల్యేగా ఎన్నికయ్యారు. 2003–2005 మధ్య మధ్యప్రదేశ్‌ ప్రభుత్వంలో కేబినెట్‌ మంత్రిగా పనిచేశారు. బాలాఘాట్‌ లోక్‌సభ స్థానానికీ ప్రాతినిధ్యం వహించారు. 1952లో జన్మించిన ఆయన వయస్సు 74 సంవత్సరాలు.
పాఠశాల విద్య, అటవీ, రవాణా, గనుల వంటి శాఖల నిర్వహణలో బిసేన్‌కు అనుభవం ఉంది. భారతీయ వైద్య విధానాలపై ఆసక్తి కలిగిన ఆయన.. ఆయుర్వేదం, ఆధునిక వైద్యం మధ్య సమన్వయంపై కూడా దృష్టిపెట్టారు. ఉత్తరాఖండ్‌లో లెఫ్టినెంట్‌ జనరల్‌ గుర్మీత్‌సింగ్‌ స్థానంలో బిసేన్‌ బాధ్యతలు చేపట్టనున్నారు.
*దుష్యంత్‌ గౌతమ్‌.. కౌన్సిలర్‌ నుంచి గవర్నర్ వరకు..
సిక్కిం గవర్నర్‌గా నియమితులైన దుష్యంత్‌ గౌతమ్‌ ఢిల్లీకి చెందిన దళిత నాయకుడు. ఢిల్లీ నగరపాలక సంస్థలో కౌన్సిలర్‌గా పనిచేసిన ఆయన తర్వాత రాజ్యసభకు ఎన్నికయ్యారు. బీజేపీ జాతీయ ప్రధాన కార్యదర్శిగా, పార్టీ ఎస్సీ మోర్చా జాతీయ అధ్యక్షుడిగా బాధ్యతలు నిర్వహించారు. రాష్ట్రీయ స్వయంసేవక్‌ సంఘ్‌ (RSS), బీజేపీ సంస్థాగత కార్యక్రమాలతో దాదాపు ఐదు దశాబ్దాల అనుబంధం ఉంది. దళిత వర్గాల్లో పార్టీ విస్తరణ, సంస్థాగత నిర్మాణంలో పనిచేశారు.
ఇప్పటివరకు సిక్కిం గవర్నర్‌గా ఉన్న ఓం ప్రకాశ్‌ మాథుర్‌ను కేరళకు బదిలీ చేయడంతో ఆ స్థానంలో గౌతమ్‌ను నియమించారు. కేరళ గవర్నర్ రాజేంద్ర విశ్వనాథ్‌ అర్లేకర్‌ను తమిళనాడుకు మార్చారు. దీంతో నాలుగు కొత్త నియామకాలు, రెండు బదిలీలతో ఆరు రాష్ట్రాల గవర్నర్ బాధ్యతల్లో మార్పులు చోటుచేసుకున్నాయి.
About the Author
Please tell us what is wrong. Your report will be sent to the website team.
