Street Vendors Shops Hanamkonda
* టీబీ హాస్పిటల్ వద్ద షాపులు నేలమట్టం!
* రోడ్డున పడ్డ చిరు వ్యాపారులు
ఆకేరు న్యూస్, హన్మకొండ : హనుమకొండ జిల్లా కేంద్రంలో చిరు వ్యాపారుల పొట్టకొట్టే ఘటన చోటుచేసుకుంది. నగరంలోని ప్రసిద్ధ టీబీ హాస్పిటల్ సెకండ్ గేటు సమీపంలో ఫుట్‌పాత్‌ను ఆనుకుని ఎన్నో ఏళ్లుగా జీవనోపాధి పొందుతున్న చిరు వ్యాపారుల షాపులను మున్సిపల్ అధికారులు ఎలాంటి ముందస్తు సమాచారం ఇవ్వకుండానే తొలగించారు. రాత్రికి రాత్రే జరిపిన ఈ కూల్చివేతల పట్ల బాధితులు తీవ్ర ఆవేదన వ్యక్తం చేస్తున్నారు.
* ముందస్తు సమాచారం లేదు : బాధితుల ఆరోపణ
రోజువారీ కూలీలు, చిరు వ్యాపారులు పండ్లు, చిన్నపాటి తినుబండారాలు విక్రయిస్తూ తమ కుటుంబాలను పోషించుకుంటున్నారు. అయితే, సంబంధిత అధికారులు ఎలాంటి నోటీసులు ఇవ్వకుండా, కనీసం తమ షాపుల్లోని వస్తువులు, విక్రయానికి సిద్ధంగా ఉంచిన పండ్లు, ఇతర సామగ్రిని కూడా తీసుకోకుండానే జేసీబీలతో దుకాణాలను నేలమట్టం చేశారని వ్యాపారులు వాపోతున్నారు.
* రోడ్డున పడ్డ కుటుంబాలు
అర్ధరాత్రి జరిగిన ఈ హఠాత్పరిణామంతో తమ కుటుంబాల బతుకుదెరువు ప్రశ్నార్థకంగా మారిందని బాధితులు కన్నీరుమున్నీరవుతున్నారు. వ్యాపారం చేసుకునేందుకు వేరే ప్రత్యామ్నాయం చూపకుండా, ఉన్నఫలంగా షాపులు తొలగించడం వల్ల తాము తీవ్ర ఆర్థిక నష్టాన్ని చవిచూశామని ఆవేదన వ్యక్తం చేస్తున్నారు. అప్పులు చేసి తెచ్చిన సరుకంతా బూడిదపాలైందని, ఇప్పుడు కుటుంబాన్ని ఎలా పోషించుకోవాలో అర్థం కావడం లేదని వారు ఆందోళన చెందుతున్నారు.
* న్యాయం చేయాలని డిమాండ్
రోడ్డు విస్తరణ లేదా ఇతర అభివృద్ధి పనుల పేరిట తమ పొట్టకొట్టడం ఎంతవరకు సమంజసమని వ్యాపారులు ప్రశ్నిస్తున్నారు. ఇప్పటికైనా జిల్లా కలెక్టర్ మరియు మున్సిపల్ కార్పొరేషన్ అధికారులు స్పందించి, నష్టపోయిన చిరు వ్యాపారులను ఆదుకోవాలని.. వారికి తగిన నష్టపరిహారంతో పాటు ప్రత్యామ్నాయ ఉపాధి కల్పించాలని వారు డిమాండ్ చేస్తున్నారు.
About the Author
Please tell us what is wrong. Your report will be sent to the website team.
