Odisha Twin Babies Death | ఒడిశాలో విషాదం..

Published: 19 Oct 2026 • 11:30 AM

* జన్మించిన వారం రోజులకే కవల శిశువుల మృతి
* అరుదైన వైద్య పరిస్థితితో జననం..
* కాపాడేందుకు వైద్యుల ప్రయత్నాలు విఫలం

ఆకేరు న్యూస్, డెస్క్ : ఒడిశాలో అరుదైన శారీరక పరిస్థితితో జన్మించిన కవల శిశువులు వారం రోజులకే మృతి చెందారు. బెర్హంపూర్‌లోని ఎంకేసీజీ మెడికల్ కాలేజ్ అండ్ హాస్పిటల్‌లో చికిత్స పొందుతున్న శిశువులు శనివారం ప్రాణాలు కోల్పోయినట్లు ఆసుపత్రి వర్గాలు వెల్లడించాయి.

వైద్యుల వివరాల ప్రకారం, అక్టోబర్ 11న జన్మించిన ఈ శిశువులకు రెండు తలలు, రెండు మెడలు ఉన్నప్పటికీ శరీరం మాత్రం ఒక్కటే ఉంది. వైద్య పరిభాషలో ఈ అరుదైన పరిస్థితిని డైసెఫాలిక్ పారాపాగస్ (Dicephalic Parapagus) అంటారు. పుట్టినప్పటి నుంచే శిశువుల ఆరోగ్య పరిస్థితి విషమంగా ఉండటంతో వారిని ప్రత్యేక నవజాత శిశు సంరక్షణ విభాగంలో ఉంచి వైద్యులు నిరంతరం పర్యవేక్షించారు.

అయితే, జననం తర్వాత శ్వాస సంబంధిత సమస్యలు తలెత్తడంతో పరిస్థితి మరింత క్లిష్టంగా మారింది. శిశువులను కాపాడేందుకు అవసరమైన చికిత్స అందించినప్పటికీ, సంక్లిష్టమైన ఆరోగ్య సమస్యల కారణంగా వారిని రక్షించలేకపోయామని ఆసుపత్రి అధికారులు తెలిపారు.

* అవయవాల నిర్మాణంతో చికిత్స మరింత క్లిష్టం

శిశువులకు రెండు తలలు, రెండు వెన్నెముకలు ఉండగా, గుండె, కాలేయం వంటి కీలక అవయవాలు ఉమ్మడిగా ఉన్నట్లు వైద్యులు వెల్లడించారు. శరీర నిర్మాణం, అంతర్గత అవయవాల అమరికలో ఉన్న సంక్లిష్టతల కారణంగా శస్త్రచికిత్స చేయడం సాధ్యం కాలేదని వైద్యులు వివరించారు. ఈ శిశువులు కంధమాల్ జిల్లాకు చెందిన 22 ఏళ్ల మహిళకు జన్మించారు. ఇది ఆమెకు మొదటి కాన్పు. అరుదైన వైద్య పరిస్థితి కారణంగా శిశువుల మనుగడకు తీవ్ర సవాళ్లు ఎదురయ్యాయని వైద్యులు పేర్కొన్నారు.

* తల్లిదండ్రులకు తీరని విషాదం

శిశువుల మృతితో తల్లిదండ్రులు తీవ్ర విషాదంలో మునిగిపోయారు. ఈ ఘటనతో కుటుంబం శోకసంద్రంలో మునిగిపోగా, వారికి అవసరమైన సహాయం అందించేందుకు జిల్లా యంత్రాంగం జోక్యం చేసుకున్నట్లు వార్తా నివేదికలు వెల్లడించాయి. HB అరుదైన శారీరక పరిస్థితులతో జన్మించే శిశువుల విషయంలో వైద్యపరమైన సవాళ్లు ఎంత క్లిష్టంగా ఉంటాయో ఈ ఘటన మరోసారి తెలియజేస్తోంది.