Palakurthi| పండుగ సాయన్న జయంతి

Published: 22 Oct 2026 • 05:32 PM

* విగ్రహ ప్రతిష్ఠకు శంకుస్థాపన

ఆకేరు న్యూస్, పాలకుర్తి: పండుగ సాయన్న 174వ జయంతి వేడుకలను జనగామ జిల్లా పాలకుర్తి నియోజకవర్గ కేంద్రంలో ఘనంగా నిర్వహించారు. పండుగ సాయన్న విగ్రహ ప్రతిష్ఠ కమిటీ ఆధ్వర్యంలో జరిగిన ఈ కార్యక్రమంలో జయంతి వేడుకలతో పాటు ఆయన కాంస్య విగ్రహ ప్రతిష్ఠకు శంకుస్థాపన చేశారు. వివిధ సామాజిక వర్గాల ప్రతినిధులు, ప్రజాప్రతినిధులు, నాయకులు పెద్ద సంఖ్యలో పాల్గొని సాయన్న సేవలను, పోరాట స్ఫూర్తిని స్మరించుకున్నారు.

యువతకు స్ఫూర్తి

కార్యక్రమానికి మామిండ్ల సోమయ్య (ఎంఎస్) నాయకత్వం వహించారు. ఈ సందర్భంగా ఆయన మాట్లాడుతూ పండుగ సాయన్న ఒక సామాజిక వర్గానికే పరిమితమైన వ్యక్తి కాదని, ఆయన పోరాట స్ఫూర్తి సమాజంలోని ప్రతి ఒక్కరికీ ఆదర్శమని పేర్కొన్నారు. చరిత్రలో గుర్తింపు పొందిన మహనీయుల జీవితాలను భావితరాలకు పరిచయం చేయాల్సిన బాధ్యత అందరిపైనా ఉందన్నారు. సాయన్న చరిత్రను విస్తృతంగా ప్రచారం చేయడం ద్వారా యువతలో పట్టుదల, సేవాభావం పెంపొందుతాయని తెలిపారు.

చారిత్రక ఘట్టం

పాలకుర్తి కేంద్రంలో పండుగ సాయన్న కాంస్య విగ్రహ ప్రతిష్ఠకు శంకుస్థాపన చేయడం కీలక ఘట్టమని పలువురు వక్తలు అభిప్రాయపడ్డారు. మహనీయుల విగ్రహాలు కేవలం స్మారక చిహ్నాలు మాత్రమే కాకుండా, వారి ఆశయాలు, పోరాటాలను గుర్తుచేసే ప్రేరణ కేంద్రాలని పేర్కొన్నారు. విగ్రహ ప్రతిష్ఠతో రాబోయే తరాలకు పండుగ సాయన్న జీవితం, వీరగాథ గురించి తెలుసుకునే అవకాశం కలుగుతుందని హర్షం వ్యక్తం చేశారు.

పలువురి పాల్గొనడం

ఈ కార్యక్రమంలో సొసైటీ అధ్యక్షుడు మామిండ్ల శ్రీనివాస్, కార్యదర్శి జీడి నిరంజన్, వార్డు సభ్యులు కవిత శోభన్, దాసరి అనూష మధు, కత్తి దస్తగిరి, సొసైటీ మాజీ కార్యదర్శి మామిండ్ల యాకయ్య, మామిండ్ల తమ్మ యాకయ్య, జీడి మనోహర్, సోమేశ్వర్, సమ్మయ్య, ముద్దులబోయిన నరసయ్య, మామిండ్ల సొమ్మల్లు, రేగుల కృష్ణ, అంబటి సోమయ్య, సేరు సమ్మయ్య, వెంకన్న, సోమయ్య, ఎల్లబోయిన ఎల్లయ్య తదితరులు పాల్గొన్నారు.