Graduate MLC Elections | ఎమ్మెల్సీ ఎన్నికలపై కాంగ్రెస్ ఫోకస్..!

Published: 23 Oct 2026 • 11:20 AM

* నేడు ప్రజాభవన్‌లో కాంగ్రెస్ కీలక భేటీ..
* రేవంత్‌రెడ్డి, భట్టి విక్రమార్క ఆధ్వర్యంలో సమావేశం..
* ఓటరు నమోదు వేగవంతంపై ప్రధానంగా చర్చ

ఆకేరు న్యూస్, హైదరాబాద్ : తెలంగాణ కాంగ్రెస్‌లో కీలక సమావేశానికి ప్రజాభవన్ వేదిక కానుంది. ముఖ్యమంత్రి రేవంత్‌రెడ్డి, ఉప ముఖ్యమంత్రి భట్టి విక్రమార్క ఆధ్వర్యంలో నేడు కాంగ్రెస్ పార్టీకి చెందిన మంత్రులు, ఎమ్మెల్యేలు, ఎమ్మెల్సీలతో సమావేశం నిర్వహించనున్నారు. రాష్ట్రంలో ఎల్‌నినో ప్రభావం, ఇతర కీలక రాజకీయ అంశాలతో పాటు పట్టభద్రుల ఎమ్మెల్సీ ఎన్నికల కార్యాచరణపై ఈ భేటీలో చర్చించనున్నట్లు సమాచారం.

* పట్టభద్రుల ఓటరు నమోదుపై కార్యాచరణ..

పట్టభద్రుల ఎమ్మెల్సీ ఎన్నికలను దృష్టిలో పెట్టుకుని ఓటరు నమోదు ప్రక్రియను వేగవంతం చేయడంపై ముఖ్యమంత్రి ప్రత్యేకంగా దృష్టి సారించనున్నారు. నవంబర్ 6తో ఓటరు నమోదు గడువు ముగియనున్న నేపథ్యంలో అర్హులైన పట్టభద్రులు పెద్ద సంఖ్యలో ఓటర్లుగా నమోదు అయ్యేలా చర్యలు తీసుకోవాలని ప్రజాప్రతినిధులకు సూచించనున్నారు. క్షేత్రస్థాయిలో పార్టీ నాయకులు, కార్యకర్తలను సమన్వయం చేసుకుంటూ నమోదు ప్రక్రియను పూర్తి చేయాలని దిశానిర్దేశం చేయనున్నట్లు తెలుస్తోంది.

* ఆరు ఉమ్మడి జిల్లాల నేతలతో భేటీ

ఆరు ఉమ్మడి జిల్లాలకు చెందిన ప్రజాప్రతినిధులతో సీఎం సమావేశమై ఎన్నికల సన్నద్ధత, పార్టీ బలోపేతం, క్షేత్రస్థాయి కార్యాచరణపై చర్చించనున్నారు. పట్టభద్రుల ఓటర్లను గుర్తించడం, అర్హులైన వారికి నమోదు ప్రక్రియపై అవగాహన కల్పించడం, గడువులోగా నమోదు పూర్తయ్యేలా చూడటం వంటి అంశాలపై నేతలకు సూచనలు చేయనున్నారు.

* నవంబర్ 1న ఢిల్లీలో ఇండియా కూటమి ర్యాలీ

మరోవైపు, నవంబర్ 1న ఢిల్లీలో ఇండియా కూటమి ఆధ్వర్యంలో నిర్వహించనున్న ర్యాలీకి కాంగ్రెస్ నేతల హాజరుపైనా సమావేశంలో చర్చించే అవకాశం ఉంది. రాష్ట్రం నుంచి ముఖ్య నేతలంతా ర్యాలీలో పాల్గొనేలా సమన్వయం చేసుకోవాలని సీఎం సూచించనున్నట్లు సమాచారం.

మొత్తంగా, పట్టభద్రుల ఎమ్మెల్సీ ఎన్నికలకు ముందస్తు సన్నద్ధత, ఓటరు నమోదు వేగవంతం, పార్టీ రాజకీయ కార్యాచరణ, జాతీయ స్థాయి కార్యక్రమాల్లో నేతల భాగస్వామ్యం వంటి అంశాలు నేటి సమావేశంలో కీలకంగా మారనున్నాయి.