GWMC Water Fine | వరంగల్‌లో నీటి వృథాపై కొరడా..!

Published: 25 Oct 2026 • 11:05 AM

* నీటి వృథాపై జీడబ్ల్యూఎంసీ కఠిన నిర్ణయం

అకేరు న్యూస్, వరంగల్ : ఎల్‌నినో ప్రభావంతో ఎండల తీవ్రత పెరిగి నీటి కొరత ఏర్పడే అవకాశాల నేపథ్యంలో గ్రేటర్ వరంగల్ మున్సిపల్ కార్పొరేషన్ (GWMC) కీలక నిర్ణయం తీసుకుంది. తాగునీటిని వృథా చేస్తే రూ.5 వేల జరిమానా విధించాలని నిర్ణయించింది. నీటి వినియోగంపై నియంత్రణ విధిస్తూ, అందుబాటులో ఉన్న నీటి వనరులను పొదుపుగా వినియోగించుకునేలా కఠిన చర్యలకు సిద్ధమవుతోంది.

* నీటిని పొదుపుగా వాడండి.. లేదంటే రూ.5 వేలు కట్టాల్సిందే..!

వేసవి పరిస్థితులు, ఎల్‌నినో ప్రభావం కారణంగా నీటి అవసరాలు పెరిగే అవకాశం ఉండటంతో నీటి వృథాను అరికట్టడంపై అధికారులు దృష్టి సారించారు. ఇళ్లలో, వాణిజ్య సముదాయాల్లో తాగునీటిని అనవసరంగా వృథా చేయకుండా చర్యలు చేపట్టాలని నిర్ణయించినట్లు సమాచారం. నిబంధనలు ఉల్లంఘించిన వారికి రూ.5 వేల జరిమానా విధించే అంశాన్ని ముందుకు తీసుకొచ్చారు.

* వాటర్ ట్యాంకర్లకూ వర్తించే ఆంక్షలు

నీటి వినియోగంపై విధించే ఆంక్షలు వాటర్ ట్యాంకర్లకు కూడా వర్తించనున్నాయి. నీటి సరఫరా, వినియోగంలో వృథాను నియంత్రించడంతో పాటు ప్రజలకు తాగునీరు సక్రమంగా అందేలా చర్యలు తీసుకోవడమే లక్ష్యంగా ఈ నిర్ణయం తీసుకున్నట్లు తెలుస్తోంది. రాష్ట్ర జలమండలి సూచనల మేరకు GWMC ఈ చర్యలకు ఉపక్రమించింది.

* ప్రజలు సహకరించాలి..

నీటి వృథాను అరికట్టడం కేవలం అధికారుల బాధ్యత మాత్రమే కాదు.. ప్రజలందరి బాధ్యత కూడా. కుళాయిలను నిర్లక్ష్యంగా వదిలేయడం, అవసరానికి మించి నీటిని వినియోగించడం వంటి అలవాట్లను మానుకోవాలి. నీటిని పొదుపుగా వినియోగిస్తేనే భవిష్యత్తులో తలెత్తే నీటి ఇబ్బందులను కొంతవరకు నివారించవచ్చు.