Ration Card Holders | రేషన్ కార్డుదారులకు గుడ్ న్యూస్..!

Published: 28 Oct 2026 • 12:55 PM

* ఇక బియ్యంతోపాటు నిత్యావసరాలు..!
* ప్రభుత్వం సూపర్ ప్లాన్

ఆకేరు న్యూస్, డెస్క్ : రాష్ట్రంలోని రేషన్ కార్డుదారుల కుటుంబాలకు తెలంగాణ ప్రభుత్వం తీపి కబురు అందించేందుకు సన్నాహాలు చేస్తోంది. పెరుగుతున్న నిత్యావసర సరుకుల ధరలతో ఇబ్బందులు పడుతున్న పేద, మధ్యతరగతి కుటుంబాలకు ఆర్థిక ఊరట కల్పించే దిశగా పౌరసరఫరాల శాఖ కీలక అడుగులు వేస్తోంది.

* ఎల్‌నినో ప్రభావం.. ఆకాశాన్నంటుతున్న ధరలు..

ప్రపంచవ్యాప్తంగా ఎల్‌నినో (El Nino) ప్రభావం వల్ల వర్షాభావ పరిస్థితులు ఏర్పడి, వ్యవసాయ దిగుబడులు గణనీయంగా తగ్గాయి. దీని ఫలితంగా బహిరంగ మార్కెట్‌లో నిత్యావసర సరుకుల ధరలు విపరీతంగా పెరిగిపోయాయి. రోజువారీ వంటకాల్లో వాడే ప్రాథమిక సరుకుల ధరలు ఆకాశాన్నంటడంతో సాధారణ, పేద కుటుంబాల నెలవారీ బడ్జెట్ తలకిందులై తీవ్ర ఇబ్బందులు ఎదుర్కొంటున్నారు.

* రేషన్ షాపుల ద్వారా సబ్సిడీ సరుకులు..

ఈ పరిస్థితిని తీవ్రంగా పరిగణించిన తెలంగాణ ప్రభుత్వం, ప్రజలపై పడుతున్న ఆర్థిక భారాన్ని తగ్గించేందుకు విస్తృత ప్రణాళికను సిద్ధం చేస్తోంది. ప్రస్తుతం ఉచిత లేదా చవక ధరలో ఇస్తున్న బియ్యంతో పాటు మరికొన్ని అత్యవసర సరుకులను అత్యంత తక్కువ సబ్సిడీ ధరలకే పంపిణీ చేయాలని ఆలోచిస్తోంది.

రేషన్ దుకాణాల ద్వారా పంపిణీ చేయడానికి ప్రతిపాదించిన నిత్యావసర సరుకుల జాబితా కందిపప్పు , గోధుమ పిండి, పంచదార (చక్కెర), పామాయిల్, చింతపండు, కారంపొడి.

* పౌరసరఫరాల శాఖ కసరత్తు..

ఏయే సరుకులను ఎంత పరిమాణంలో పంపిణీ చేయాలి, ఎంత మేర సబ్సిడీ కల్పించాలనే అంశాలపై పౌరసరఫరాల శాఖ అధికారులు క్షుణ్ణంగా అధ్యయనం చేస్తున్నారు. భవిష్యత్తులో రాబోయే పండుగల సీజన్ లేదా రాబోయే నెలల నుండి ఈ నూతన విధానాన్ని అమలు చేయడానికి సమగ్ర కార్యాచరణను రూపొందిస్తున్నారు. ప్రభుత్వం నుండి అధికారిక ప్రకటన వెలువడితే రాష్ట్రంలోని లక్షలాది మంది లబ్ధిదారులకు ఎంతో మేలు చేకూరనుంది.