Dr Ruth John Paul | కూలీ నుంచి డాక్టర్ వరకు..

Published: 29 Oct 2026 • 11:55 AM

* దేశంలోనే తొలి ట్రాన్స్‌జెండర్ పీజీ వైద్యురాలిగా రూత్ అరుదైన ఘనత
* రూత్‌ను సత్కరించిన సీనియర్ ఐపీఎస్ అధికారి సజ్జనార్..
* సనత్‌నగర్ ESI ఆసుపత్రిలో రోగులకు సేవలందిస్తున్న డాక్టర్ రూత్

ఆకేరు న్యూస్, హైదరాబాద్ : అడ్డంకులు ఎంత పెద్దవైనా, సాధించాలనే పట్టుదల మరియు కఠిన శ్రమ ఉంటే విజయం ఖాయమని నిరూపించారు డాక్టర్ కొయ్యల రూత్ జాన్ పాల్. సమాజంలో ఎదురైన తీవ్రమైన వివక్ష, అవమానాలు, పేదరికాన్ని జయించి దేశంలోనే ఎమర్జెన్సీ మెడిసిన్‌లో ఎండీ (MD) పూర్తిచేసిన మొట్టమొదటి ట్రాన్స్‌జెండర్ వైద్యురాలిగా చరిత్ర సృష్టించారు. తాజాగా ఆమె అకుంఠిత దీక్షను, అసాధారణ పోరాట పటిమను అభినందిస్తూ సీనియర్ ఐపీఎస్ అధికారి వి.సి. సజ్జనార్ ఆమెను ప్రత్యేకంగా కలిసి సత్కరించారు. దీనికి సంబంధించిన వివరాలను ఆయన తన సోషల్ మీడియా ఖాతా ద్వారా పంచుకుంటూ ఆమె జీవన ప్రయాణం సమాజానికి ఎంతో స్ఫూర్తిదాయకమని కొనియాడారు.

* పట్టుదలే ఆయుధంగా..

ఖమ్మం జిల్లాకు చెందిన రూత్ జాన్ పాల్ ది అత్యంత సాధారణమైన, పేద కుటుంబం. చిన్నతనంలోనే తనలో వచ్చిన శారీరక, మానసిక మార్పుల కారణంగా సమాజం నుంచి తీవ్ర వివక్షను, హేళనలను ఎదుర్కొన్నారు. కుటుంబ ఆర్థిక పరిస్థితులు దృష్ట్యా ఒకానొక దశలో పొలాల్లో వ్యవసాయ కూలీగా కూడా పనులు చేశారు. అయినా సరే చదువుపై ఉన్న శ్రద్ధను ఎప్పుడూ వదులుకోలేదు. పట్టుదలతో చదివి మల్లేపల్లిలోని ఉస్మానియా మెడికల్ కాలేజీలో సీటు సాధించి ఎంబీబీఎస్ (MBBS) విజయవంతంగా పూర్తిచేశారు.

* న్యాయపోరాటం చేసి పీజీ సీటు సాధన..

ఎంబీబీఎస్ పూర్తయిన తర్వాత ఉన్నత చదువుల కోసం పీజీ (NEET PG) ప్రవేశ పరీక్ష రాశారు. అయితే నీట్ ప్రవేశ పరీక్షా నిబంధనల్లో ట్రాన్స్‌జెండర్ కేటగిరీ ప్రత్యేకంగా లేకపోవడం, రిజర్వేషన్లు అమల్లోకి రాకపోవడంతో తీవ్ర అన్యాయం జరిగింది. దీనిపై వెనకడుగు వేయకుండా డాక్టర్ రూత్ న్యాయపోరాటానికి దిగారు. తెలంగాణ హైకోర్టును ఆశ్రయించి తన హక్కుల కోసం పోరాడారు. హైకోర్టు ఇచ్చిన చారిత్రాత్మక తీర్పుతో ఆమెకు మెడికల్ పీజీ సీటు దక్కింది. ఆ తర్వాత ఎమర్జెన్సీ మెడిసిన్‌లో పీజీ పూర్తిచేసి దేశంలోనే ఈ ఘనత సాధించిన తొలి ట్రాన్స్ మహిళగా నిలిచారు.

* సనత్‌నగర్ ఈఎస్ఐ ఆసుపత్రిలో అత్యవసర సేవలు..

ప్రస్తుతం డాక్టర్ రూత్ జాన్ పాల్ హైదరాబాద్‌లోని సనత్‌నగర్ ఈఎస్ఐ (ESI) ఆసుపత్రి అత్యవసర విభాగంలో (Emergency Medicine Department) వైద్యురాలిగా బాధ్యతలు నిర్వర్తిస్తున్నారు. రోజూ ప్రాణాపాయ స్థితిలో వచ్చే ఎంతో మంది రోగులకు అత్యవసర వైద్యం అందిస్తూ వారి ప్రాణాలను కాపాడుతున్నారు. ఏ సమాజమైతే ఒకప్పుడు ఆమెను దూరం పెట్టిందో, అదే సమాజంలో ఒక బాధ్యతాయుతమైన డాక్టర్‌గా నిలబడి ప్రాణదాతగా సేవలందిస్తున్నారు.

* సజ్జనార్ అభినందనలు..

డాక్టర్ రూత్ జాన్ పాల్ సాధించిన విజయాన్ని, ఆమె పట్టుదలను అభినందిస్తూ సీనియర్ ఐపీఎస్ అధికారి సజ్జనార్ ఆమెను కలవడం జరిగింది. అన్ని అవరోధాలను అధిగమించి నిలిచిన రూత్ జీవన ప్రయాణం ప్రతి ఒక్కరికీ ఆదర్శమని కొనియాడారు. ఆమె భవిష్యత్తు మరింత ఉజ్వలంగా ఉండాలని, తను అనుకున్న లక్ష్యాలను చేరుకోవాలని ఆకాంక్షిస్తూ సోషల్ మీడియా వేదికగా ఆమె పోరాటాన్ని అభినందించారు. ఒక సాధారణ కూలీ స్థాయి నుంచి దేశంలోనే అరుదైన ఘనత సాధించిన డాక్టర్ రూత్ జాన్ పాల్ ప్రయాణం, వివక్షను ఎదుర్కొంటున్న వేలాది మందికి కొత్త ఆశలను, నమ్మకాన్ని నూరిపోస్తోంది.