Akash Kolluru | ఎమ్మెల్సీ బరిలో సీనియర్ జర్నలిస్ట్

Published: 30 Oct 2026 • 11:18 AM

* హైదరాబాద్ స్థానానికి ఆకాశ్ కొల్లూరు..
* కల్వకుంట్ల కవిత కీలక ప్రకటన
* పట్టభద్రుల ఎమ్మెల్సీ ఎన్నికల్లో ‘తెలంగాణ రక్షణ సేన’ నిర్ణయం

ఆకేరు న్యూస్, హైదరాబాద్ : తెలంగాణలో త్వరలో జరగనున్న పట్టభద్రుల (గ్రాడ్యుయేట్స్) ఎమ్మెల్సీ ఎన్నికలకు సంబంధించి రాజకీయ సమీకరణాలు వేగంగా మారుతున్నాయి. పట్టభద్రుల స్థానాలను కైవసం చేసుకోవడమే లక్ష్యంగా తెలంగాణ రక్షణ సేన అధినేత్రి కల్వకుంట్ల కవిత కీలక నిర్ణయం తీసుకున్నారు.

ఉమ్మడి హైదరాబాద్ – రంగారెడ్డి – మహబూబ్ నగర్ పట్టభద్రుల ఎమ్మెల్సీ స్థానానికి పార్టీ అభ్యర్థిగా జాతీయ స్థాయిలో గుర్తింపు పొందిన సీనియర్ జర్నలిస్ట్ ఆకాశ్ కొల్లూరు అభ్యర్థిత్వాన్ని ఖరారు చేస్తూ మంగళవారం సంచలన ప్రకటన చేశారు. విద్యావంతులు, మేధావులు, ఉద్యోగ-ఉపాధ్యాయ వర్గాలు ఎక్కువగా ఉండే ఈ నియోజకవర్గంలో ఒక సీనియర్ జర్నలిస్ట్, ఓయూ గోల్డ్ మెడలిస్ట్‌ను బరిలోకి దించడం ద్వారా విజయావకాశాలను మెరుగుపరచుకోవచ్చని పార్టీ భావిస్తోంది.

* రెండు స్థానాల్లోనూ బీసీ వర్గాలకే..

పట్టభద్రుల ఎన్నికల్లో సామాజిక న్యాయానికి పెద్దపీట వేస్తున్నట్లు పార్టీ వర్గాలు వెల్లడించారు.

హైదరాబాద్ – రంగారెడ్డి – మహబూబ్ నగర్ : జాతీయ మీడియాలో 20 ఏళ్లకు పైగా అనుభవం ఉన్న బీసీ వర్గానికి చెందిన సీనియర్ జర్నలిస్ట్ ఆకాశ్ కొల్లూరును అభ్యర్థిగా ఖరారు చేశారు.

వరంగల్ – ఖమ్మం – నల్గొండ : ఈ స్థానం నుంచి ఇప్పటికే బీసీ సామాజిక వర్గానికి చెందిన నలమాస శ్రీకాంత్ గౌడ్‌కు అవకాశం ఇచ్చారు.దీంతో రెండు ప్రధాన పట్టభద్రుల స్థానాల్లోనూ బీసీ అభ్యర్థులకే అవకాశమిచ్చి, బీసీ ఓటు బ్యాంకును ఆకట్టుకోవడంతో పాటు గ్రాడ్యుయేట్లలో పార్టీ పట్టును బిగించేందుకు కవిత వ్యూహాత్మకంగా వ్యవహరిస్తున్నారు.

* ఎలక్షన్ వార్ రూమ్ & కో-ఆర్డినేటర్ల నియామకం..

ఎన్నికల ప్రచారం, మైక్రో లెవెల్ మేనేజ్‌మెంట్ కోసం సమర్థవంతమైన నాయకులకు బాధ్యతలు అప్పగించారు.

ఎన్నికల అబ్జర్వర్ & కో-ఆర్డినేటర్ : హైదరాబాద్ స్థానానికి పార్టీ సీనియర్ నాయకులు డాక్టర్ చిట్నేని రఘును ఎలక్షన్ అబ్జర్వర్ మరియు కో-ఆర్డినేటర్‌గా నియమించారు.

వార్ రూమ్ & స్ట్రాటజీ ఇన్ ఛార్జి : రెండు ఎమ్మెల్సీ స్థానాల ఎన్నికల వ్యూహాలు, డేటా విశ్లేషణ, వార్ రూమ్ నిర్వహణ బాధ్యతలను ప్రముఖ న్యాయవాది రామ్ కల్యాణ్ చల్లాకు అప్పగించారు.

* ఉమ్మడి జిల్లాల వారీగా ఇన్ ఛార్జీలు..

ఎన్నికల ప్రచారాన్ని క్షేత్రస్థాయికి తీసుకెళ్లేందుకు, ఓటర్ల నమోదు మరియు సమన్వయం కోసం ఉమ్మడి జిల్లాల వారీగా కీలక నాయకులను ఇన్ ఛార్జీలుగా నియమించారు.

హైదరాబాద్ జిల్లా : సురభి, మతీన్, బండారి మహేందర్ ముదిరాజ్
రంగారెడ్డి జిల్లా : అర్చనా సేనాపతి
మహబూబ్ నగర్ జిల్లా : రంజిత్ గొంగళ్ల
నల్గొండ జిల్లా : సుజిత్
ఖమ్మం జిల్లా : గట్టు కరుణ
వరంగల్ జిల్లా : మాడుగుల రాజిరెడ్డి

* ఎవరీ ఆకాశ్ కొల్లూరు..

హైదరాబాద్ పట్టభద్రుల స్థానం నుంచి పోటీ చేయనున్న ఆకాశ్ కొల్లూరుకు సమాజం మరియు విద్యార్థి రంగంలో సుదీర్ఘ అనుభవం ఉంది.

విద్యాభ్యాసం : హైదరాబాద్‌లోని ప్రసిద్ధ బేగంపేట్ ‘హైదరాబాద్ పబ్లిక్ స్కూల్’ (HPS) లో పాఠశాల విద్యను పూర్తి చేశారు.
విద్యా ప్రతిభ : ఉస్మానియా విశ్వవిద్యాలయం (OU) నుంచి గ్రాడ్యుయేషన్ పూర్తి చేసి, ప్రతిష్టాత్మక గోల్డ్ మెడల్ సాధించారు.
వృత్తిపరమైన అనుభవం : నేషనల్/జాతీయ ప్రింట్ మరియు ఎలక్ట్రానిక్ మీడియాలో దాదాపు రెండు దశాబ్దాల పాటు (20 ఏళ్లు) సీనియర్ జర్నలిస్టుగా సేవలందించారు. ప్రజా సమస్యలు, పాలనాంశాలు, విద్యా వ్యవస్థలపై ఆయనకు సమగ్ర అవగాహన ఉంది.

* పట్టభద్రుల మద్దతే లక్ష్యం..

జర్నలిజంలో సుదీర్ఘ అనుభవం, ఉన్నత విద్యాభ్యాసం ఉన్న ఆకాశ్ కొల్లూరు అభ్యర్థిత్వం వైపు విద్యావంతులు, ఐటీ నిపుణులు, నిరుద్యోగ యువత మరియు పట్టభద్రులు మొగ్గు చూపుతారని పార్టీ నాయకత్వం ధీమా వ్యక్తం చేస్తోంది. రాబోయే రోజుల్లో జిల్లాల వారీగా విస్తృత స్థాయి సమావేశాలు ఏర్పాటు చేసి ప్రచారాన్ని వేగవంతం చేయాలని ఇన్ ఛార్జీలను ఆదేశించారు.