Digital Governance | డిజిటల్ పాలనతో మరింత పారదర్శకత..

Published: 01 Nov 2026 • 11:30 AM

* అధికారులకు సీఎస్ సంజయ్ జాజు సూచన
* ఈ-హెచ్‌ఆర్‌ఎంఎస్, ఈ-శాంక్షన్స్‌పై శిక్షణ..
* ప్రభుత్వ సేవలను వేగవంతం చేయాలని ఆదేశం

ఆకేరు న్యూస్, హైదరాబాద్ : ప్రభుత్వ పాలనలో డిజిటల్ సాంకేతికతను విస్తృతంగా వినియోగిస్తూ పరిపాలనలో పారదర్శకత, సామర్థ్యాన్ని మరింత పెంచాలని తెలంగాణ ప్రభుత్వ ప్రధాన కార్యదర్శి (CS) సంజయ్ జాజు అధికారులకు సూచించారు. ప్రభుత్వ శాఖల్లో డిజిటల్ విధానాలను సమర్థవంతంగా అమలు చేయడం ద్వారా పాలనా ప్రక్రియలను వేగవంతం చేయడంతో పాటు ప్రజలకు మెరుగైన సేవలు అందించవచ్చని పేర్కొన్నారు.

హైదరాబాద్‌లోని డాక్టర్ మర్రి చెన్నారెడ్డి మానవ వనరుల అభివృద్ధి సంస్థ (MCRHRDI)లో శనివారం ఈ-హెచ్‌ఆర్‌ఎంఎస్ (e-HRMS), ఈ-శాంక్షన్స్ (e-Sanctions), WAMIS తదితర డిజిటల్ పాలనా అంశాలపై అధికారులకు శిక్షణా కార్యక్రమం నిర్వహించారు. ఈ కార్యక్రమంలో పాల్గొన్న సీఎస్ సంజయ్ జాజు మాట్లాడుతూ ప్రభుత్వ శాఖలన్నీ ఆధునిక సాంకేతిక పరిజ్ఞానాన్ని అందిపుచ్చుకోవాలని సూచించారు.

* డిజిటల్ విధానాలతో పాలనలో వేగం..

ప్రభుత్వ కార్యాలయాల్లో సాంకేతిక పరిజ్ఞానాన్ని విస్తృతంగా వినియోగించడం ద్వారా పరిపాలనా ప్రక్రియల్లో జాప్యాన్ని తగ్గించవచ్చని సీఎస్ వివరించారు. వివిధ శాఖల్లో డిజిటల్ వ్యవస్థలను సమర్థవంతంగా అమలు చేస్తే పనుల్లో పారదర్శకత పెరగడంతో పాటు అధికారుల జవాబుదారీతనం కూడా మెరుగుపడుతుందన్నారు.

* ప్రజాకేంద్రక పాలనకు ప్రాధాన్యత..

ప్రజలకు వేగవంతమైన, నాణ్యమైన సేవలు అందించడమే ప్రభుత్వ పరిపాలనలో ప్రధాన లక్ష్యంగా ఉండాలని సంజయ్ జాజు పేర్కొన్నారు. సమర్థమైన, జవాబుదారీతనంతో కూడిన ప్రజాకేంద్రక పాలన అందించేందుకు అధికారులు కృషి చేయాలని సూచించారు. డిజిటల్ విధానాల అమలులో ఎదురయ్యే సమస్యలను గుర్తించి పరిష్కరించుకోవాలని తెలిపారు. ఈ శిక్షణా కార్యక్రమంలో వివిధ ప్రభుత్వ శాఖల కార్యదర్శులు, సీనియర్ పోలీసు అధికారులు, ప్రభుత్వ విభాగాల అధిపతులు (HODs) పాల్గొన్నారు.