Diwali Scam | రూ.1,000 అంటూ కొత్త స్కామ్..!

Published: 06 Nov 2026 • 02:50 PM

* దీపావళి కానుక పేరుతో దోపిడీ
* లింక్ క్లిక్ చేస్తే ఖాతా ఖాళీ
* ప్రజలారా.. తస్మాత్ జాగ్రత్త

ఆకేరు న్యూస్, డెస్క్ : దీపావళి పండుగను ఆసరాగా చేసుకుని సైబర్ నేరగాళ్లు కొత్త మోసాలకు తెరలేపుతున్నారు. ప్రజలకు దీపావళి కానుకగా రూ.1,000 ఇస్తామంటూ నకిలీ సందేశాలు, లింకులు పంపిస్తూ మోసాలకు పాల్పడే అవకాశం ఉందని హెచ్చరికలు వెలువడుతున్నాయి. పండుగ కానుక పేరుతో వచ్చే ఇలాంటి అనుమానాస్పద లింకులను క్లిక్ చేయవద్దని సూచిస్తున్నారు.

దీపావళి కానుకగా రూ.1,000 అందిస్తామంటూ కొందరికి మొబైల్ ఫోన్లకు సందేశాలు రావచ్చు. అందులో ఇచ్చిన లింకును క్లిక్ చేసి బహుమతి పొందాలని నమ్మించే ప్రయత్నం చేస్తారు. అయితే ఇలాంటి నకిలీ లింకుల ద్వారా సైబర్ నేరగాళ్లు వ్యక్తిగత, బ్యాంకింగ్ వివరాలను సేకరించే ప్రమాదం ఉంది.

* బ్యాంకు ఖాతాలు ఖాళీ అయ్యే ప్రమాదం..

అనుమానాస్పద లింకులను క్లిక్ చేసి బ్యాంకు వివరాలు, ఓటీపీ, పాస్‌వర్డ్‌లు లేదా ఇతర రహస్య సమాచారాన్ని నమోదు చేస్తే ఆర్థిక మోసాలకు గురయ్యే అవకాశం ఉంది. కొన్నిసార్లు నకిలీ వెబ్‌సైట్ల ద్వారా ఫోన్‌లోని వ్యక్తిగత సమాచారాన్ని కూడా సేకరించేందుకు ప్రయత్నిస్తారు.

ఈ జాగ్రత్తలు తప్పనిసరి..

* దీపావళి కానుక పేరుతో వచ్చే గుర్తుతెలియని లింకులను క్లిక్ చేయవద్దు.

* బ్యాంకు వివరాలు, ఏటీఎం కార్డు సమాచారం ఎవరికీ వెల్లడించవద్దు.

* ఓటీపీ, యూపీఐ పిన్, పాస్‌వర్డ్‌లను ఎవరితోనూ పంచుకోవద్దు.

* అనుమానాస్పద వెబ్‌సైట్లలో వ్యక్తిగత వివరాలు నమోదు చేయవద్దు.

* ఉచిత బహుమతులు, నగదు ఆఫర్లను అధికారిక వెబ్‌సైట్లలో మాత్రమే ధృవీకరించుకోండి.

అప్రమత్తతే అసలైన రక్షణ..

పండుగ వేళ ఉచిత కానుకలు, నగదు బహుమతుల పేరుతో వచ్చే సందేశాలను గుడ్డిగా నమ్మవద్దు. చిన్న నిర్లక్ష్యం కూడా బ్యాంకు ఖాతాలోని డబ్బును కోల్పోయేలా చేయవచ్చు. ఏదైనా సైబర్ మోసానికి గురైతే వెంటనే 1930 సైబర్ క్రైమ్ హెల్ప్‌లైన్‌కు ఫిర్యాదు చేయాలి. అలాగే cybercrime.gov.in వెబ్‌సైట్‌లోనూ ఫిర్యాదు చేయవచ్చు. దీపావళి ఆనందంగా జరుపుకోండి.. సైబర్ మోసాల పట్ల జాగ్రత్తగా ఉండండి.