Ranga Reddy Collector | కలెక్టర్‌కు జైలు శిక్ష

Published: 10 Nov 2026 • 10:58 AM

* 6 నెలల జైలు.. రూ.2 వేల జరిమానా

* హైకోర్టు సంచలన తీర్పు

ఆకేరు న్యూస్, రంగారెడ్డి : తెలంగాణలో సంచలనం సృష్టించిన కోర్టు ధిక్కరణ కేసులో రంగారెడ్డి జిల్లా కలెక్టర్ సి. నారాయణరెడ్డికి హైకోర్టు ఆరు నెలల సాధారణ జైలు శిక్ష విధించింది. హైకోర్టు ఇచ్చిన ఆదేశాలను ఉద్దేశపూర్వకంగా అమలు చేయకపోవడాన్ని తీవ్రంగా పరిగణించిన న్యాయస్థానం.. రూ.2 వేల జరిమానా కూడా విధించింది. జస్టిస్ కె. లక్ష్మణ్ నేతృత్వంలోని ఏకసభ్య ధర్మాసనం ఈ మేరకు తీర్పు వెలువరించింది. అయితే తీర్పుపై అప్పీల్ చేసుకునేందుకు అవకాశం కల్పిస్తూ జైలు శిక్ష అమలును నాలుగు వారాల పాటు నిలిపివేసింది.

అసలేం జరిగింది

రంగారెడ్డి జిల్లా అబ్దుల్లాపూర్‌మెట్ మండలం తుర్కయాంజల్ పరిధిలోని మన్నె ముత్యాలమ్మ కుంట ప్రాంతంలో ఉన్న కొన్ని భూములకు సంబంధించి ఈ వివాదం మొదలైంది. రిజిస్ట్రేషన్ చట్టం-1908లోని సెక్షన్ 22-A ప్రకారం నిషేధిత ఆస్తుల జాబితాలో ఉన్న ప్లాట్లను తొలగించాలని భూ యజమానులు అధికారులను ఆశ్రయించారు. ఈ క్రమంలో తమకు చెందిన ప్లాట్ నంబర్ 59, ప్లాట్ నంబర్ 62లోని తూర్పు భాగాన్ని నిషేధిత ఆస్తుల జాబితా నుంచి తొలగించాలని బాధితులు కోరారు. ఇందుకోసం 2024 మార్చి 14న కలెక్టర్‌కు వినతిపత్రం సమర్పించారు.

60 రోజుల్లో నిర్ణయం తీసుకోవాలని ఆదేశం

బాధితుల వినతిపై నిర్ణయం తీసుకోవాలని కోరుతూ హైకోర్టును ఆశ్రయించారు. దీంతో 2025 ఆగస్టు 5న హైకోర్టు కీలక ఆదేశాలు జారీ చేసింది. పిటిషనర్లు సమర్పించిన వినతిని పరిశీలించి, 60 రోజుల్లోగా నిర్ణయం తీసుకోవాలని కలెక్టర్‌ను ఆదేశించింది. ఒకవేళ వినతిని తిరస్కరిస్తే అందుకు గల కారణాలను స్పష్టంగా పేర్కొంటూ ఉత్తర్వులు జారీ చేయాలని సూచించింది. అయితే కోర్టు నిర్దేశించిన గడువు ముగిసినా కలెక్టర్ నుంచి ఎలాంటి నిర్ణయం వెలువడలేదు. దీంతో బాధితులు 2025 అక్టోబర్ 15న హైకోర్టులో కోర్టు ధిక్కరణ పిటిషన్ దాఖలు చేశారు.

కోర్టు నోటీసుల తర్వాతే స్పందన

కోర్టు ధిక్కరణ పిటిషన్ దాఖలైన తర్వాత జిల్లా యంత్రాంగం స్పందించింది. 2026 ఫిబ్రవరి 26న బాధితుల వినతిని తిరస్కరిస్తూ కలెక్టర్ ఉత్తర్వులు జారీ చేశారు. అనంతరం జూలై 8న మరోసారి తిరస్కరణ ఉత్తర్వులు ఇచ్చారు. అయితే కోర్టు నిర్దేశించిన 60 రోజుల గడువులోగా నిర్ణయం తీసుకోకుండా, కోర్టు ధిక్కరణ పిటిషన్ దాఖలైన తర్వాత స్పందించడంపై హైకోర్టు అభ్యంతరం వ్యక్తం చేసింది.

ఒకే లేఅవుట్‌లో భిన్నమైన నిర్ణయాలపై అభ్యంతరం

ఇదే లేఅవుట్‌లోని పక్కనున్న కొన్ని ప్లాట్లను గతంలోనే నిషేధిత ఆస్తుల జాబితా నుంచి తొలగించిన విషయాన్ని కూడా హైకోర్టు పరిశీలించింది. ఒకే లేఅవుట్‌లో ఉన్న ప్లాట్ల విషయంలో భిన్నమైన వైఖరి అవలంబించడానికి సరైన కారణాలు చూపలేదని న్యాయస్థానం అభిప్రాయపడింది. గతంలో ఇచ్చిన కోర్టు ఉత్తర్వులు తప్పని భావిస్తే సంబంధిత అధికారులు అప్పీల్ లేదా ఇతర చట్టబద్ధ మార్గాలను ఆశ్రయించాలి తప్ప, వాటిని అమలు చేయకుండా నిర్లక్ష్యం చేయకూడదని స్పష్టం చేసింది.

ఆరు నెలల జైలు.. రూ.2 వేల జరిమానా

కలెక్టర్ సమర్పించిన వివరణను పరిశీలించిన అనంతరం ఆయన చర్యలు ఉద్దేశపూర్వకంగా కోర్టు ఉత్తర్వులను ధిక్కరించినట్లుగా హైకోర్టు నిర్ధారించింది. దీంతో కోర్టు ధిక్కరణ పిటిషన్‌ను అనుమతిస్తూ ఆరు నెలల సాధారణ జైలు శిక్షతో పాటు రూ.2 వేల జరిమానా విధించింది. అయితే ఈ తీర్పును ఉన్నత న్యాయస్థానంలో సవాలు చేసుకునేందుకు కలెక్టర్‌కు అవకాశం కల్పిస్తూ జైలు శిక్ష అమలును నాలుగు వారాల పాటు నిలిపివేసింది. జరిమానా చెల్లింపునకు కూడా నాలుగు వారాల గడువు ఇచ్చింది.

అధికారులకూ తప్పని చట్టబద్ధ బాధ్యత

ప్రభుత్వంలో కీలక బాధ్యతలు నిర్వహించే అధికారులు సైతం న్యాయస్థానాల ఆదేశాలను తప్పనిసరిగా పాటించాల్సిందే. కోర్టు ఉత్తర్వులపై అభ్యంతరాలు ఉంటే చట్టబద్ధంగా అప్పీల్ చేసుకోవాలి తప్ప, వాటిని నిర్లక్ష్యం చేయడానికి వీల్లేదనే విషయాన్ని ఈ తీర్పు మరోసారి స్పష్టం చేసింది. ఉన్నతాధికారులైనా న్యాయస్థానాల ఆదేశాలకు లోబడి వ్యవహరించాల్సిందేనని ఈ పరిణామం చర్చనీయాంశంగా మారింది.