DNK Movie Mouli
* ఫ్యామిలీతో కలిసి హాయిగా నవ్వుకుంటారు – మౌళి తనూజ్ ప్రశాంత్
* గ్యాంబ్లింగ్, అప్పులు, దొంగతనం చుట్టూ క్రైమ్ కామెడీ కథ..
* నవంబర్ 13న థియేటర్లలోకి సినిమా
ఆకేరు న్యూస్, సినిమా: ‘DNK’ సినిమా ఆద్యంతం వినోదాన్ని పంచుతుందని హీరో మౌళి తనూజ్ ప్రశాంత్ తెలిపారు. ఇందులో క్రైమ్ ఎలిమెంట్స్ ఉన్నప్పటికీ ప్రేక్షకులు హాయిగా నవ్వుకునేలా కథ సాగుతుందని చెప్పారు. కుటుంబంతో కలిసి థియేటర్లలో ఎంజాయ్ చేసే చిత్రమిదని పేర్కొన్నారు. మైత్రీ మూవీ మేకర్స్ నిర్మిస్తున్న ఈ క్రైమ్ కామెడీ ఎంటర్‌టైనర్‌తో శ్రీను కంబాల దర్శకుడిగా పరిచయమవుతున్నారు. నవంబర్ 13న సినిమా ప్రేక్షకుల ముందుకు రానుంది. ఈ సందర్భంగా మౌళి విలేకరులతో సినిమా విశేషాలను పంచుకున్నారు.
* టైటిల్ మార్పునకు కారణం అదే!
మొదట ఈ సినిమాకు ‘దొంగ నా కొడకా’ అనే టైటిల్‌ను అనుకున్నామని మౌళి తెలిపారు. అయితే సెన్సార్ అభ్యంతరాలు ఎదురవుతాయని భావించి ‘DNK’గా మార్చినట్లు చెప్పారు. సినిమా ట్రైలర్‌ను రవితేజ విడుదల చేయడం చాలా సంతోషంగా అనిపించిందన్నారు. ప్రమోషన్స్‌లో భాగంగా ఆంధ్రప్రదేశ్‌లో పర్యటించినప్పుడు ప్రేక్షకుల నుంచి మంచి స్పందన లభించిందని వెల్లడించారు.
* ఈజీ మనీ కోసం గ్యాంబ్లింగ్.. ఆ తర్వాత ఏమైంది?
‘DNK’ కథ గురించి మాట్లాడుతూ.. ఇందులో ఒక యువకుడు సులభంగా డబ్బు సంపాదించాలనే ఆశతో గ్యాంబ్లింగ్‌కు అలవాటు పడతాడని మౌళి చెప్పారు. ఆ ప్రయత్నంలో అప్పుల్లో కూరుకుపోయి, వాటి నుంచి బయటపడేందుకు దొంగతనానికి పాల్పడతాడని వివరించారు. ఆ తర్వాత అతను ఎలాంటి సమస్యలను ఎదుర్కొన్నాడు? ఎలాంటి పరిస్థితుల్లో చిక్కుకున్నాడు? అనేదే సినిమా కథ అని తెలిపారు.
ఇందులో క్రైమ్ అంశాలు ఉన్నప్పటికీ వాటిని వినోదాత్మకంగా చూపించామని చెప్పారు. సినిమా ప్రారంభం నుంచి చివరి వరకు ప్రేక్షకులను నవ్వించేలా ఉంటుందని, ట్విస్టులు కూడా ఆకట్టుకుంటాయని అన్నారు.
* ప్రొడక్షన్‌లో భాగం కావడంపై..
ఈ సినిమా నిర్మాణంలో మౌళి కూడా భాగస్వామ్యం కావడం వల్ల నిర్మాణ ఖర్చులు తగ్గాయని నిర్మాత రవి చెప్పిన విషయంపై ఆయన స్పందించారు. అది నిర్మాత రవి మంచితనమని పేర్కొన్నారు. మైత్రీ అనిల్‌తో కలిసి పనిచేసినట్లు తెలిపారు. “ప్రొడక్షన్ గురించి నేర్చుకోవాలనే ఉద్దేశంతోనే ఇందులో ఇన్వాల్వ్ అయ్యాను. అనిల్ గారే అన్ని విషయాలు చూసుకున్నారు. నేను కేవలం నేర్చుకోవడానికి మాత్రమే ఇందులో భాగమయ్యాను” అని మౌళి వివరించారు. సినిమా నిర్మాణం కూడా ప్రత్యేకమైన నైపుణ్యం కోరుకునే పని అని, తనకు ఈ ప్రాజెక్ట్ ద్వారా నేర్చుకునే అవకాశం లభించిందని చెప్పారు.
* ఆలీతో నటించడం మంచి అనుభవం
సినిమాలో ఆలీతో కలిసి పనిచేయడం చాలా సంతోషంగా అనిపించిందని మౌళి తెలిపారు. ఆయన ఉండటం వల్ల తన పాత్రకు మరింత బలం వచ్చిందన్నారు. ఈ సినిమాలో ఆలీకి సంబంధించిన సన్నివేశాలు అద్భుతంగా వచ్చాయని చెప్పారు. సంగీతం గురించి మాట్లాడుతూ.. సింజిత్ మంచి పాటలు అందించారని, థియేటర్లలో ప్రేక్షకులు వాటిని ఎంజాయ్ చేస్తారని పేర్కొన్నారు. బ్యాక్‌గ్రౌండ్ స్కోర్ కూడా కొత్తగా ఉంటుందని తెలిపారు.
* డాన్స్ నేర్పించిన సందీప్ మాస్టర్
ఈ సినిమాలో ఒక డాన్స్ నంబర్ చేశానని, గతంలో తనకు డాన్స్ అలవాటు లేదని మౌళి చెప్పారు. అయితే సందీప్ మాస్టర్ ఎంతో సహకరించి డాన్స్ నేర్పించారని తెలిపారు. ఆ పాట చాలా బాగా వచ్చిందని, ప్రేక్షకులు థియేటర్లలో తప్పకుండా ఎంజాయ్ చేస్తారని అన్నారు. ఇక సినిమాలోని బబ్లూ పాత్ర చాలా ఆసక్తికరంగా ఉంటుందని చెప్పారు. ఆ పాత్ర వైజాగ్‌కు చెందినదని, కథ కూడా వైజాగ్ నేపథ్యంలోనే సాగుతుందని వివరించారు.
* దర్శకత్వంపై ఆసక్తి ఉంది.. కానీ ఇప్పుడే కాదు!
భవిష్యత్తులో దర్శకత్వం చేసే ఆలోచన ఉందా అనే ప్రశ్నకు మౌళి స్పందిస్తూ.. దర్శకత్వం చాలా పెద్ద బాధ్యత అని అన్నారు. తనకు దర్శకత్వం చేయాలనే ఆసక్తి ఉన్నప్పటికీ, అందుకు ఇంకా సమయం పడుతుందని చెప్పారు. భవిష్యత్తులో కొత్త కథలు, వినోదాత్మక చిత్రాల్లో నటించాలని ఉందని, ఇప్పటికే కొన్ని కథలు విన్నానని వెల్లడించారు.
విశ్వక్ సేన్, శ్రీనాథ్ మాగంటి, అభినవ్ గోమఠం, వెంకటేష్ కాకుమాను నటిస్తున్న ఈ చిత్రంలో మౌళి తనూజ్ ప్రశాంత్ ప్రధాన పాత్ర పోషిస్తున్నారు. నవంబర్ 13న విడుదల కానున్న ‘DNK’ ప్రేక్షకులను ఎంతవరకు నవ్విస్తుందో చూడాలి.
About the Author
Please tell us what is wrong. Your report will be sent to the website team.
