GorreKunta | చేపల వ్యర్థాలతో సంపద సృష్టి!

Published: 14 Nov 2026 • 06:16 PM

* గొర్రెకుంట మహిళల వినూత్న ప్రయోగం..

ఆకేరు న్యూస్, వరంగల్: వ్యర్థాలే సంపదగా మారుతున్నాయి.. సంప్రదాయ మత్స్య వృత్తికి కొత్త ఆదాయ మార్గాలు తోడవుతున్నాయి. వరంగల్ జిల్లా గొర్రెకుంటకు చెందిన మత్స్యకార మహిళలు వినూత్న ఆలోచనతో చేపలు, రొయ్యల వ్యర్థాలతో సేంద్రియ ఎరువులు తయారు చేస్తూ స్వయం ఉపాధి దిశగా అడుగులు వేస్తున్నారు. ఈ ప్రయత్నాన్ని పరకాల ఎమ్మెల్యే రేవూరి ప్రకాశ్ రెడ్డి, జిల్లా కలెక్టర్ డాక్టర్ సత్య శారద అభినందించారు.

శనివారం వీరిద్దరూ గొర్రెకుంటలోని మత్స్య పారిశ్రామిక సహకార సంఘాన్ని సందర్శించారు. ఈ సందర్భంగా మహిళా సంఘం సభ్యులు తయారు చేస్తున్న వర్మీ కంపోస్ట్ (Organic Fertilizer) ఎరువును పరిశీలించారు. చేపలు, రొయ్యల వ్యర్థాల సేకరణ నుంచి ఎరువుల తయారీ, వినియోగం వరకు అనుసరిస్తున్న విధానాలను అడిగి తెలుసుకున్నారు.

చేపలు, రొయ్యల వ్యర్థాలను వృథా చేయకుండా వాటితో సేంద్రియ ఎరువులు తయారు చేయడం అభినందనీయమని ఎమ్మెల్యే పేర్కొన్నారు. దీనివల్ల పర్యావరణ పరిరక్షణకు తోడ్పడటంతో పాటు మత్స్యకార కుటుంబాలకు అదనపు ఆదాయం లభిస్తుందని అన్నారు. ఇలాంటి వినూత్న కార్యక్రమాలను మరింత విస్తరించాలని సూచించారు. మహిళలు ఆర్థికంగా స్వావలంబన సాధించేందుకు ప్రభుత్వం తరఫున, తనవంతుగా పూర్తి సహకారం అందిస్తామని హామీ ఇచ్చారు.
పచ్చళ్ల తయారీలోనూ మహిళల ప్రతిభ
అనంతరం మహిళా మత్స్య పారిశ్రామిక సహకార సంఘం సభ్యులు తయారు చేసిన చేపల పచ్చళ్లు, రొయ్యల పచ్చళ్లను ఎమ్మెల్యే, కలెక్టర్ పరిశీలించారు. వాటి తయారీ విధానం, ఉపయోగిస్తున్న ముడి పదార్థాలు, నాణ్యత, విక్రయ అవకాశాల గురించి మహిళలను అడిగి తెలుసుకున్నారు.

సంప్రదాయ మత్స్య వృత్తితో పాటు విలువ ఆధారిత ఉత్పత్తుల (Value Added Products) తయారీపై మహిళలు దృష్టి సారించడం ప్రశంసనీయమని ఎమ్మెల్యే అన్నారు. ఉత్పత్తుల నాణ్యత, పరిశుభ్రత, నిల్వ, ప్యాకేజింగ్, మార్కెటింగ్ అంశాల్లో తగిన శిక్షణ కల్పిస్తే మరింత ఆదాయం పొందే అవకాశం ఉంటుందని అభిప్రాయపడ్డారు. మార్కెట్లో డిమాండ్ ఉన్న మరిన్ని ఆహార ఉత్పత్తులను తయారు చేయాలని సూచించారు.

ఐదు ఎకరాల భూమి కోసం విజ్ఞప్తి

మహిళా, పురుష మత్స్య పారిశ్రామిక సహకార సంఘాల సభ్యుల విజ్ఞప్తి మేరకు ఎమ్మెల్యే, కలెక్టర్ గుండ్లకుంటను సందర్శించారు. అక్కడి ప్రభుత్వ భూమిలో ఐదు ఎకరాలు కేటాయించాలని సంఘం సభ్యులు కోరారు. ఈ భూమి అందుబాటులోకి వస్తే చేపలు, రొయ్యల వ్యర్థాలతో పెద్ద ఎత్తున సేంద్రియ ఎరువులు తయారు చేయవచ్చని వివరించారు.

ప్రస్తుతం పరిమిత స్థాయిలో కొనసాగుతున్న ఎరువుల తయారీని విస్తరించడంతో పాటు మరింతమంది మత్స్యకార కుటుంబాలకు ఉపాధి కల్పించేందుకు అవకాశం ఉంటుందని తెలిపారు.

మహిళల ఆర్థిక అభివృద్ధికి సహకారం

ఈ సందర్భంగా ఎమ్మెల్యే రేవూరి ప్రకాశ్ రెడ్డి మాట్లాడుతూ.. మత్స్యకార సంఘాల అభివృద్ధికి, సభ్యుల ఆర్థిక పురోగతికి అవసరమైన సహకారం అందిస్తామని తెలిపారు. మహిళలు స్వయం ఉపాధి అవకాశాలను సద్వినియోగం చేసుకుని ఆర్థికంగా ఎదగాలని పిలుపునిచ్చారు. మహిళా సంఘాలు తయారు చేస్తున్న ఉత్పత్తులకు మార్కెట్లో గుర్తింపు, విక్రయ అవకాశాలు కల్పించేలా సంబంధిత అధికారులు చర్యలు తీసుకోవాలని సూచించారు.

కోటి మంది మహిళలను కోటీశ్వరులుగా చేయాలన్నదే ముఖ్యమంత్రి రేవంత్ రెడ్డి లక్ష్యమని, ఆ దిశగా ప్రభుత్వం మహిళలకు వివిధ అవకాశాలు కల్పిస్తోందని పేర్కొన్నారు. మత్స్యకార మహిళలు కూడా ఈ అవకాశాలను అందిపుచ్చుకుని స్వయం ఉపాధి రంగంలో ముందుకు సాగాలని అన్నారు.

సంఘాల బలోపేతానికి అవసరమైన అవకాశాలను పరిశీలించాలని, మహిళలు తయారు చేస్తున్న ఉత్పత్తులకు మార్కెటింగ్ సదుపాయాలు కల్పించేలా వివిధ శాఖల అధికారులు సమన్వయంతో పనిచేయాలని సూచించారు.

ఈ కార్యక్రమంలో అడిషనల్ కలెక్టర్ (లోకల్ బాడీస్) వై.వి. గణేష్, డీఆర్‌డీఓ ప్రాజెక్టు డైరెక్టర్ నాగ పద్మజ, జిల్లా మత్స్యశాఖ అధికారి పిల్లి శ్రీపతి, తహసీల్దార్ రాజ్ కుమార్, డిప్యూటీ మున్సిపల్ కమిషనర్ ప్రసన్న రాణి, మెప్మా డీఎంసీ రేణుక, జిల్లా మత్స్య పారిశ్రామిక సహకార సంఘం ప్రతినిధి చొప్పరి సోమయ్య, రెవెన్యూ ఇన్‌స్పెక్టర్ మధుచంద్ర, మహిళా సంఘం అధ్యక్షురాలు కళావతి, మత్స్య పారిశ్రామిక సహకార సంఘం అధ్యక్షుడు అశోక్, సంఘం సభ్యులు పాల్గొన్నారు.