Actor Ajith Kumar | థాంక్స్ విజయ్!

Published: 04 Sep 2026 • 05:33 PM

* తమిళనాడు సీఎం కు అజిత్ కుమార్‌ థాంక్స్

* చెన్నైలో ప్రత్యేక మోటార్‌స్పోర్ట్స్ సిటీ ప్రకటన

అకేరు న్యూస్,హైదరాబాద్: చెన్నైలో ప్రత్యేకంగా మోటార్‌స్పోర్ట్స్ సిటీ ఏర్పాటు చేయనున్నట్లు తమిళనాడు ముఖ్యమంత్రి సి. జోసెఫ్ విజయ్ ప్రకటించడాన్ని నటుడు అజిత్ కుమార్ స్వాగతించారు. ఈ ప్రతిపాదిత మౌలిక సదుపాయాల అభివృద్ధి భారతదేశంలో మోటార్‌స్పోర్ట్స్‌కు ఒక ముఖ్యమైన ముందడుగు అని ఆయన పేర్కొన్నారు.గత కొన్నేళ్లుగా తన సినీ కెరీర్‌తో పాటు మోటార్‌స్పోర్ట్స్‌లోనూ కొనసాగుతున్న అజిత్ కుమార్, క్రీడలపై .. యువ ప్రతిభను అభివృద్ధి చేయడంపై తమిళనాడు ప్రభుత్వం మరింత దృష్టి సారిస్తున్నందుకు కృతజ్ఞతలు తెలిపారు.

* విజయవంతం కావాలని కోరుకుంటున్నా

“యువతను క్రీడల వైపు ప్రోత్సహించడం, వారిలోని ప్రతిభను గుర్తించడం, అలాగే మౌలిక సదుపాయాలను అభివృద్ధి చేసేందుకు కొత్త కార్యక్రమాలను ప్రకటించడం ద్వారా క్రీడలకు ఎంతో అవసరమైన దృష్టిని అందిస్తున్నందుకు గౌరవనీయులైన తమిళనాడు ముఖ్యమంత్రికి, తమిళనాడు ప్రభుత్వానికి నా కృతజ్ఞతలు.” “ప్రస్తుతం నేను మోటార్‌స్పోర్ట్స్‌లో భాగంగా ఉన్నందున, వ్యోమగామి నీల్ ఆర్మ్‌స్ట్రాంగ్ చెప్పిన మాటలను కొద్దిగా మార్చి చెప్పాలనుకుంటున్నాను.. ‘తమిళనాడు ప్రభుత్వం వేసిన ఒక చిన్న అడుగు, భారతదేశంలోని మోటార్‌స్పోర్ట్స్‌కు ఒక భారీ ముందడుగు’ గౌరవనీయులైన ముఖ్యమంత్రి సి. జోసెఫ్ విజయ్ కు ఆయన చేపట్టే అన్ని కార్యక్రమాల్లో నా శుభాకాంక్షలు. తమిళనాడు ప్రభుత్వం చేపట్టబోయే అన్ని కొత్త క్రీడా కార్యక్రమాలు విజయవంతం కావాలని కోరుకుంటున్నాను.” అని పేర్కొన్నారు.

* 2013లో ఫార్ములా 1 గ్రాండ్ ప్రీకి ఆతిథ్యం

భారతదేశంలో ఫార్ములా 1ను తిరిగి నిర్వహించాలనే చర్చలు మళ్లీ ఊపందుకున్న సమయంలో ఈ ప్రకటన రావడం గమనార్హం. అంతర్జాతీయ రేసింగ్ క్యాలెండర్‌లో భారత్ స్థానాన్ని తిరిగి తీసుకురావడానికి ఉన్న అవకాశాలను పరిశీలించేందుకు జాతీయ స్థాయిలో ఒక టాస్క్‌ఫోర్స్ కూడా పనిచేస్తోంది. భారత్ చివరిసారిగా 2013లో ఫార్ములా 1 గ్రాండ్ ప్రీకి ఆతిథ్యం ఇచ్చింది. తమిళనాడు అసెంబ్లీలో చేసిన ప్రకటనలో సీఎం విజయ్ తమిళనాడు ఒలింపిక్ సిటీతో పాటు చెన్నైలో ప్రత్యేక మోటార్‌స్పోర్ట్స్ సిటీని ఏర్పాటు చేయనున్నట్లు ప్రకటించారు. ప్రతిపాదిత మోటార్‌స్పోర్ట్స్ సిటీలో ఫార్ములా 1, ఫార్ములా 2, ఫార్ములా 3, ఫార్ములా 4 రేసులను నిర్వహించగల సదుపాయాలతో పాటు, రాష్ట్రంలోని యువ మోటార్‌స్పోర్ట్స్ ప్రతిభను గుర్తించి, వారికి శిక్షణ అందించే మౌలిక సదుపాయాలు ఉండనున్నాయి.

అజిత్‌కు ఈ ప్రకటనకు ప్రత్యేక ప్రాధాన్యత ఉంది. ఎందుకంటే ఆయన స్వయంగా రేసింగ్‌లో చురుకుగా పాల్గొంటున్నారు. గతంలో ఆయన అంతర్జాతీయ మోటార్‌స్పోర్ట్స్ ఈవెంట్లలో పోటీ పడ్డారు. తన నటనా బాధ్యతలతో పాటు రేసింగ్‌పై ఉన్న ఆసక్తిని కూడా కొనసాగిస్తున్నారు. అజిత్ కుమార్ మోటార్‌స్పోర్ట్స్ ప్రయాణం త్వరలో ‘గ్లాడియేటర్స్’ అనే డాక్యుమెంటరీకి ప్రధాన అంశంగా మారనుంది. ఆయన రేసింగ్ ప్రయాణాన్ని ఈ డాక్యుమెంటరీలో చూపించనున్నారు. ఈ ప్రాజెక్ట్‌ను ఆయన భార్య షాలిని అజిత్‌కుమార్ నిర్మిస్తున్నారు.