Milk Price Hike | అమూల్, మదర్ డెయిరీ షాక్..

Published: 12 Nov 2026 • 08:22 PM

* పాల ధరలు పెరిగాయ్

* లీటర్‌పై రూ.4 వరకు పెంపు

* సామాన్యుల జేబుకు చిల్లు..

* పశుగ్రాసం ధరల ప్రభావం..

ఆకేరు న్యూస్, డెస్క్: నిత్యావసర వస్తువుల ధరల పెరుగుదలతో ఇబ్బందులు పడుతున్న సామాన్య ప్రజలకు మరో షాక్ తగిలింది. దేశవ్యాప్తంగా ప్రముఖ పాల ఉత్పత్తి సంస్థలు అమూల్, మదర్ డెయిరీ పాల ధరలను పెంచాయి. లీటరు పాలపై రూ.2 నుంచి రూ.4 వరకు ధరలు పెంచుతూ నిర్ణయం తీసుకున్నాయి. పెరిగిన ధరలు నవంబర్ 12 నుంచి అమల్లోకి వచ్చాయి. పశుగ్రాసం, పశువుల దాణా, ప్యాకేజింగ్ మెటీరియల్, రవాణా, ఇంధన ఖర్చులు పెరగడంతో ఈ నిర్ణయం తీసుకున్నట్లు కంపెనీలు వెల్లడించాయి.

* అమూల్ పాల ధరలు ఎంత పెరిగాయంటే..

గుజరాత్ కో-ఆపరేటివ్ మిల్క్ మార్కెటింగ్ ఫెడరేషన్ (GCMMF) అమూల్ బ్రాండ్‌పై విక్రయించే పాలు ధరలను పెంచింది. తాజా నిర్ణయంతో అమూల్ తాజా టోన్డ్ మిల్క్ లీటరుపై రూ.2, అమూల్ గోల్డ్ పాలపై రూ.4 పెంచింది. మొత్తంగా వివిధ రకాల ప్యాకెట్ పాల ధరలను 4 నుంచి 5 శాతం వరకు పెంచినట్లు సంస్థ ప్రకటించింది. కొత్త ధరల ప్రకారం అమూల్ తాజా పాలు లీటరు రూ.62కు, అమూల్ గోల్డ్ పాలు లీటరు రూ.80కు చేరాయి. ఈ పెంపు నవంబర్ 12 నుంచి దేశవ్యాప్తంగా అమల్లోకి వచ్చింది.

* మదర్ డెయిరీ కూడా అదే బాటలో..

మరో ప్రముఖ పాల ఉత్పత్తి సంస్థ మదర్ డెయిరీ కూడా పాల ధరలను పెంచింది. వివిధ రకాల పాలపై లీటరుకు రూ.2 నుంచి రూ.4 వరకు పెంచుతూ నిర్ణయం తీసుకుంది. ముఖ్యంగా ఢిల్లీ-ఎన్‌సీఆర్ ప్రాంతంలో కొత్త ధరలు అమల్లోకి వచ్చాయి. కొత్త ధరల ప్రకారం టోన్డ్ మిల్క్ (బల్క్) లీటరు రూ.58 నుంచి రూ.60కి, ఫుల్ క్రీమ్ పౌచ్ మిల్క్ రూ.72 నుంచి రూ.76కి పెరిగింది. టోన్డ్ పౌచ్ మిల్క్ రూ.60 నుంచి రూ.62కి, డబుల్ టోన్డ్ మిల్క్ రూ.54 నుంచి రూ.56కి చేరింది. ఆవు పాలు లీటరు రూ.62 నుంచి రూ.65కు పెరిగాయి.

* పెంపునకు కారణాలివే..

పాల ఉత్పత్తి, సేకరణ, ప్రాసెసింగ్ ఖర్చులు భారీగా పెరగడంతో ధరలు పెంచాల్సి వచ్చిందని కంపెనీలు చెబుతున్నాయి. ముఖ్యంగా పచ్చి, ఎండు పశుగ్రాసం ధరలు పెరగడం, మొక్కజొన్న, నూనెగింజల పిండి వంటి పశువుల దాణా పదార్థాల ఖర్చులు అధికం కావడం పాల ఉత్పత్తి వ్యయాన్ని పెంచాయి. అనిశ్చిత వర్షపాతం కారణంగా పశుగ్రాసం లభ్యత తగ్గిందని మదర్ డెయిరీ తెలిపింది. పశుగ్రాసం ధరలు గత ఏడాదిలో 20 శాతం వరకు, పశువుల దాణా ధరలు సుమారు 10 శాతం పెరిగాయని పేర్కొంది. మరోవైపు పాల ప్యాకేజింగ్, రవాణా, ఇంధన ఖర్చులు కూడా పెరిగాయని కంపెనీలు వెల్లడించాయి.

* రైతులకు మెరుగైన ధరలు చెల్లించేందుకే..

పాల సేకరణ ధరలను కూడా పెంచాల్సి వచ్చిందని అమూల్ సంస్థ తెలిపింది. గత ఏడాది కాలంలో తమ అనుబంధ పాల సహకార సంఘాలు రైతులకు చెల్లించే పాల సేకరణ ధరలను 4 నుంచి 5 శాతం వరకు పెంచాయని వెల్లడించింది. వినియోగదారుల నుంచి వచ్చే ఆదాయంలో 80 శాతం వాటా 36 లక్షల మంది పాల ఉత్పత్తిదారులకు చేరుతుందని వివరించింది. పెరిగిన ధరల ద్వారా రైతులకు మెరుగైన చెల్లింపులు అందించడంతో పాటు పాల ఉత్పత్తిని ప్రోత్సహించవచ్చని సంస్థ పేర్కొంది.

* సామాన్యుల బడ్జెట్‌పై భారం

ఇప్పటికే నిత్యావసర వస్తువులు, కూరగాయలు, వంటగ్యాస్ ధరలతో ఇబ్బందులు పడుతున్న కుటుంబాలకు పాల ధరల పెంపు అదనపు భారంగా మారనుంది. ప్రతిరోజూ పాలు వినియోగించే కుటుంబాలు, హోటళ్లు, టీ దుకాణాలు, స్వీట్ల తయారీదారులపై కూడా ఈ పెంపు ప్రభావం చూపే అవకాశం ఉంది. పాల ధరలు పెరగడంతో పాల ఉత్పత్తులతో తయారయ్యే పెరుగు, మజ్జిగ, ఇతర ఉత్పత్తుల ధరలపైనా ప్రభావం పడుతుందా అన్నది చూడాల్సి ఉంది.