Nepal Floods | యాత్రికులు మిస్సింగ్..

Published: 27 Aug 2026 • 04:38 PM

* వరదల్లో చిక్కుకున్న ఈశా ఫౌండేషన్ బాధ్యులు

* 400 మంది భారతీయులతో సహా గల్లంతు

* బాధితుల ర‌క్ష‌ణ కోసం యుద్ధ‌ప్రాతిప‌దిక‌న చ‌ర్య‌లు

ఆకేరు న్యూస్, డెస్క్:

పవిత్ర కైలాస మానససరోవర యాత్రకు వెళ్లిన భక్తులకు ఊహించని విపత్తు ఎదురైంది. చైనా-టిబెట్ మరియు నేపాల్ సరిహద్దు ప్రాంతాల్లో అకస్మాత్తుగా సంభవించిన ప్రకృతి వైపరీత్యం వల్ల యాత్ర కాస్త విషాదాంతంగా మారింది. హిమానీనదం (Glacier Break) పగలడం లేదా కొండ చరియలు విరిగిపడడంతో భోటేకోశి, త్రిశూలి నదులు ఒక్కసారిగా ఉగ్రరూపం దాల్చాయి. ఈ క్రమంలో నేపాల్‌లోని రసువా జిల్లా పరిసర ప్రాంతాలతో పాటు టిబెట్ సరిహద్దులోని కీలకమైన ‘గైరాంగ్’ (Gyirong) పట్టణాన్ని భారీ వరద నీరు ముంచెత్తింది. ఈ ప్రమాదంలో 400 మందికి పైగా భారతీయ యాత్రికులు ఆచూకీ లేకుండా పోగా, పదుల సంఖ్యలో స్థానికులు, యాత్రికులు ప్రాణాలు కోల్పోయినట్లు కథనాలు వెలువడుతున్నాయి.

* కాన‌రాని ఈశా ఫౌండేషన్ యాత్రికుల జాడ‌

యాత్రను ముగించుకుని తిరుగు ప్రయాణమైన ఈశా ఫౌండేషన్ యాత్రికులు టిబెట్‌లోని గైరాంగ్ ఇమ్మిగ్రేషన్ కార్యాలయం వద్ద లాంఛనాలు పూర్తి చేసుకుంటుండ‌గా ఆక‌స్మాత్తుగా వ‌ర‌ద విరుచుకుపడింది. ఆ ఉధృతికి కొద్ది నిమిషాల్లోనే ఇమ్మిగ్రేషన్ భవనం పూర్తిగా మునిగిపోయింది. తమ బృందానికి చెందిన 80 మంది (77 మంది యాత్రికులు, 3 వాలంటీర్లు, 1 వైద్యుడు) వరద నీటిలో గల్లంతయ్యారని ఈశా ఫౌండేషన్ వ్యవస్థాపకుడు, ఆధ్యాత్మిక వేత్త సద్గురు జగ్గీ వాసుదేవ్ ఆవేదన వ్యక్తం చేశారు. గల్లంతైన వారిలో భారతీయులతో పాటు అమెరికా, కెనడా, ఆస్ట్రేలియా, బ్రిటన్‌తో సహా 19 దేశాలకు చెందిన విదేశీ పౌరులూ ఉన్నారు.

* బాధితుల‌ను కాపాడాల‌ని జగ్గీ వాసుదేవ్ విజ్ఞప్తి

ప్రస్తుతం సురక్షిత ప్రాంతమైన ‘సాగా’ (Saga)లో ఉన్న సద్గురు జగ్గీ వాసుదేవ్ ఒక వీడియో సందేశాన్ని విడుదల చేశారు. విపత్తులో చిక్కుకున్న బాధితుల కుటుంబాలకు ఆసరాగా నిలిచేందుకు, సహాయక చర్యల్లో ప్రత్యక్షంగా పాలుపంచుకునేందుకు తమ బృందాన్ని గైరాంగ్ ప్రాంతానికి వెళ్లేందుకు అనుమతించాలని ఆయన చైనా ప్రభుత్వాన్ని విజ్ఞప్తి చేశారు.

* సురక్షితంగా DRDO మాజీ చైర్మన్ దంపతులు..

హైదరాబాద్‌కు చెందిన 31 మంది యాత్రికుల బృందం ఈ విపత్తులో చిక్కుకున్నారు. రక్షణ పరిశోధన, అభివృద్ధి సంస్థ (DRDO) మాజీ చైర్మన్ జి. సతీష్ రెడ్డి దంపతులు మాత్రం త్రుటిలో ప్రాణాపాయం నుంచి బయటపడ్డారు. వరద ప్రభావం తీవ్రంగా ఉన్న గైరాంగ్ ప్రాంతాన్ని సతీష్ రెడ్డి దంపతుల బృందం కొద్ది గంటల ముందే దాటి వ‌చ్చారు. వారు ఆ మార్గాన్ని దాటిన కొద్దిసేపటికే కొండ చరియలు విరిగిపడి, నదులు పొంగిపొర్లాయి. ప్రస్తుతం సతీష్ రెడ్డి దంపతులతో పాటు వారి బృందం ‘సాగా’ ప్రాంతంలో క్షేమంగా ఉన్నట్లు తెలుస్తోంది.

* సహాయక చర్యలు చేప‌ట్టిన నేపాల్‌, చైనా అధికారులు

ప్రమాద సమాచారం అందుకున్న నేపాల్ ఆర్మీ, విపత్తు నిర్వహణ దళాలు ఘటనా స్థలానికి చేరుకుని హెలికాప్టర్ల ద్వారా గాలింపు చర్యలను ముమ్మరం చేశాయి. సరిహద్దు ప్రాంతంలో రహదారులు, వంతెనలు కొట్టుకుపోవడంతో ల్యాండ్ మార్గాలు పూర్తిగా నిలిచిపోయాయి. నేపాల్‌లోని భారత రాయబార కార్యాలయం (Indian Embassy) నేపాల్, చైనా అధికారులతో నిరంతరం సంప్రదింపులు జరుపుతోంది. చిక్కుకున్న యాత్రికుల క్షేమ సమాచారం తెలుసుకునేందుకు వారి కుటుంబ సభ్యులకు సమాచారం అందించేందుకు ప్రత్యేక హెల్ప్‌లైన్ నంబర్లను అందుబాటులోకి తెచ్చారు.
భారీ వరదలు, దెబ్బతిన్న మార్గాల కారణంగా నిలిచిపోయిన హైదరాబాద్ యాత్రికులతో పాటు మిగిలిన భక్తులను సురక్షితంగా బయటకు తీసుకురావడానికి రెస్క్యూ టీమ్‌లు తీవ్రంగా శ్రమిస్తున్నాయి. బాధితుల కుటుంబాలు తమ వారి క్షేమ సమాచారం కోసం ఆందోళనతో ఎదురుచూస్తున్నాయి.