Dussehra Celebrations | ఘనంగా విజయదశమి వేడుకలు

Published: 21 Oct 2026 • 08:50 AM

* రావణ దహనాన్ని తిలకించేందుకు తరలివచ్చిన ప్రజలు

* చివరి నిమిషంలో పనిచేయని రిమోట్‌

* కాగడాలతో దిష్టిబొమ్మలకు నిప్పంటించిన నిర్వాహకులు

ఆకేరు న్యూస్, రాజస్థాన్ : రాజస్థాన్‌లోని బలోత్రా పట్టణంలో విజయదశమి వేడుకలు ఘనంగా జరిగాయి. రావణ దహనాన్ని తిలకించేందుకు పట్టణంతోపాటు చుట్టుపక్కల గ్రామాల నుంచి పెద్ద సంఖ్యలో ప్రజలు తరలివచ్చారు. అయితే, రిమోట్‌ కంట్రోల్‌ ద్వారా దిష్టిబొమ్మలను దహనం చేసేందుకు చేసిన ఏర్పాట్లు సాంకేతిక లోపంతో విఫలమయ్యాయి. దీంతో నిర్వాహకులు కాగడాలతో నిప్పంటించి దహన కార్యక్రమాన్ని పూర్తి చేశారు.

* భారీగా తరలివచ్చిన ప్రజలు

చెడుపై మంచి సాధించిన విజయానికి ప్రతీకగా నిర్వహించిన ఈ వేడుకల్లో చిన్నారులు, యువతతోపాటు అన్ని వయసులవారు ఉత్సాహంగా పాల్గొన్నారు. ట్రాక్టర్లు, ద్విచక్ర వాహనాలు, ఇతర వాహనాల్లో ప్రజలు వేడుకల ప్రాంగణానికి చేరుకున్నారు. అవాంఛనీయ ఘటనలు జరగకుండా నిర్వాహకులు, అధికారులు భద్రతా ఏర్పాట్లు చేశారు. ‘జై శ్రీరామ్‌’ నినాదాలతో ప్రాంగణం మార్మోగింది.

* రిమోట్‌ పనిచేయక ఆలస్యం

రావణ దహనాన్ని రిమోట్‌ కంట్రోల్‌ ద్వారా ప్రారంభించాలని నిర్వాహకులు ఏర్పాట్లు చేశారు. చివరి నిమిషంలో అది పనిచేయకపోవడంతో కార్యక్రమానికి కొంతసేపు అంతరాయం కలిగింది. రిమోట్‌ ద్వారా దహన ప్రక్రియను ప్రారంభించేందుకు ప్రయత్నించినప్పటికీ ఫలితం లేకపోయింది.

కార్యక్రమం మరింత ఆలస్యం కాకుండా నిర్వాహకులు సంప్రదాయ పద్ధతిలో దహనం చేపట్టారు. ప్రజాప్రతినిధులు, నిర్వాహకులు కాగడాలతో రావణ, కుంభకర్ణ, మేఘనాథుల దిష్టిబొమ్మలకు నిప్పంటించారు. దిష్టిబొమ్మలు దహనమవుతుండగా ప్రజలు చప్పట్లు, కేరింతలతో సందడి చేశారు. అనంతరం బాణసంచా కాల్చి వేడుకలను ముగించారు.