Bhatti Vikramarka| భట్టి కాళ్లపై పడ్డ NHM మహిళా ఉద్యోగులు

Published: 11 Nov 2026 • 06:47 PM

* ఉద్యోగ భద్రత కల్పించాలని వేడుకోలు

* సమస్యలు పరిష్కరించాలని డిమాండ్

Bhatti Vikramarka| ఆకేరు న్యూస్, హనుమకొండ: తమ ఉద్యోగ సమస్యలను పరిష్కరించి, భవిష్యత్తుకు భరోసా కల్పించాలని కోరుతూ జాతీయ ఆరోగ్య మిషన్ (NHM) మహిళా ఉద్యోగులు తెలంగాణ ఉప ముఖ్యమంత్రి మల్లు భట్టి విక్రమార్కను కలిసి తమ ఆవేదనను వ్యక్తం చేశారు. ఈ క్రమంలో కొందరు మహిళా ఉద్యోగులు ఆయన కాళ్లపై పడి తమ సమస్యలను పరిష్కరించాలని వేడుకోవడం అక్కడ భావోద్వేగానికి దారితీసింది.

బుధవారం (నవంబర్ 11) హనుమకొండ జిల్లాలో పర్యటించిన డిప్యూటీ సీఎం భట్టి విక్రమార్క ఓ ప్రైవేట్ కార్యక్రమానికి హాజరయ్యారు. ఈ సందర్భంగా ఆయనను కలిసిన NHM మహిళా ఉద్యోగులు తమ సమస్యలను వివరించారు. ఎన్నో ఏళ్లుగా వైద్య ఆరోగ్య శాఖలో సేవలందిస్తున్నప్పటికీ ఉద్యోగ భద్రత లేకుండా పోయిందని ఆవేదన వ్యక్తం చేశారు. తమ సమస్యలను ప్రభుత్వం దృష్టికి తీసుకెళ్లి న్యాయం చేయాలని విజ్ఞప్తి చేశారు.

ఉద్యోగ భద్రత కల్పించాలి

తెలంగాణలో జాతీయ ఆరోగ్య మిషన్ పరిధిలో సుమారు 17,541 మంది ఉద్యోగులు వివిధ విభాగాల్లో పనిచేస్తున్నారు. వీరిలో అధిక సంఖ్యలో మహిళా ఉద్యోగులు ఉన్నారు. కాంట్రాక్టు, ఔట్‌సోర్సింగ్ విధానాల్లో పనిచేస్తున్న తమను క్రమబద్ధీకరించాలని వారు కోరుతున్నారు. సమాన పనికి సమాన వేతనం, పూర్తిస్థాయి వేతనాలు, ఆరోగ్య బీమా, జీవిత బీమా, ఉద్యోగ భద్రత కల్పించాలని డిమాండ్ చేస్తున్నారు. మహిళా ఉద్యోగులకు 180 రోజుల వేతనంతో కూడిన ప్రసూతి సెలవులు ఇవ్వాలని విజ్ఞప్తి చేస్తున్నారు.

ఆందోళన బాటలో ఉద్యోగులు

తమ డిమాండ్ల పరిష్కారం కోసం తెలంగాణవ్యాప్తంగా NHM ఉద్యోగులు అక్టోబర్ 13 నుంచి నిరవధిక ఆందోళన చేపట్టినట్లు సమాచారం. ఈ నేపథ్యంలో హనుమకొండ పర్యటనకు వచ్చిన డిప్యూటీ సీఎంను కలిసి తమ గోడును వెళ్లబోసుకున్నారు. తమ సమస్యల పరిష్కారం కోసం మహిళా ఉద్యోగులు ఆయన కాళ్లపై పడి వేడుకున్న ఘటన చర్చనీయాంశంగా మారింది.

దీర్ఘకాలంగా వైద్య ఆరోగ్య రంగంలో సేవలందిస్తున్న NHM ఉద్యోగులు తమ ఉద్యోగ భవిష్యత్తుపై ఆందోళన వ్యక్తం చేస్తున్నారు. వారి డిమాండ్లపై ప్రభుత్వం ఎలాంటి నిర్ణయం తీసుకుంటుంది? ఉద్యోగులకు భద్రత కల్పించే దిశగా చర్యలు చేపడుతుందా? అన్నది వేచి చూడాలి.