Konduru | పదో తరగతి తర్వాత ఏం చేయాలి?

Published: 13 Nov 2026 • 07:11 PM

* కొండూరు పాఠశాలలో కెరీర్ గైడెన్స్ సదస్సు

ఆకేరు న్యూస్, రాయపర్తి: విద్యార్థి దశ నుంచే ఉన్నత లక్ష్యాలను నిర్దేశించుకుని, వాటి సాధనకు ప్రణాళికాబద్ధంగా కృషి చేసినప్పుడే ఉజ్వల భవిష్యత్తు సాధ్యమవుతుందని ప్రముఖ సైకాలజిస్ట్ (Psychologist) పల్లె నాగేశ్వరరావు అన్నారు. వరంగల్ జిల్లా రాయపర్తి మండలం కొండూరు గ్రామంలోని పీఎం శ్రీ జిల్లా పరిషత్ ఉన్నత పాఠశాలలో శుక్రవారం విద్యార్థులకు కెరీర్ గైడెన్స్ (Career Guidance) అవగాహన సదస్సు నిర్వహించారు. పాఠశాల ప్రధానోపాధ్యాయురాలు కొణతం పద్మలత ఆధ్వర్యంలో ఈ కార్యక్రమం జరిగింది.

ఈ సదస్సుకు ముఖ్య అతిథిగా హాజరైన పల్లె నాగేశ్వరరావు విద్యార్థులకు పదో తరగతి అనంతరం అందుబాటులో ఉన్న వివిధ కోర్సులు, ఉన్నత విద్యావకాశాలు, ఉపాధి మార్గాలపై అవగాహన కల్పించారు. ఇతరుల ఒత్తిడికి లోనుకాకుండా తమ అభిరుచులు, ఆసక్తులు, సామర్థ్యాలకు అనుగుణంగా కోర్సులను ఎంపిక చేసుకోవాలని సూచించారు. ముందుగానే లక్ష్యాన్ని నిర్దేశించుకుని దాని కోసం నిరంతరం శ్రమించాలని పిలుపునిచ్చారు.

పరీక్షల భయాన్ని అధిగమించాలి

చదివిన పాఠ్యాంశాలను సులభంగా గుర్తుంచుకోవడం, జ్ఞాపకశక్తిని పెంపొందించుకోవడం, పరీక్షల ఒత్తిడిని అధిగమించడం, చదువుపై ఏకాగ్రత సాధించడం వంటి అంశాలపై పలు మెళకువలను (Memory Tips) వివరించారు. ప్రతిరోజూ ఉదయం 4 నుంచి 6 గంటల వరకు రెండు గంటల పాటు క్రమం తప్పకుండా చదివి, 120 రోజులపాటు క్రమశిక్షణతో సాధన చేస్తే మంచి ఫలితాలు సాధించవచ్చని విద్యార్థులకు సూచించారు.

విద్యార్థుల అభివృద్ధే లక్ష్యం

ఈ సందర్భంగా ప్రధానోపాధ్యాయురాలు కొణతం పద్మలత మాట్లాడుతూ.. పీఎం శ్రీ పథకం (PM SHRI Scheme)లో భాగంగా విద్యార్థుల సర్వతోముఖాభివృద్ధిని లక్ష్యంగా చేసుకుని ఇలాంటి అవగాహన కార్యక్రమాలు నిర్వహిస్తున్నట్లు తెలిపారు. నిపుణులు అందించిన సూచనలను విద్యార్థులు ఆచరణలో పెట్టాలని, ఇప్పటి నుంచే తమ భవిష్యత్తు ప్రణాళిక (Career Planning) రూపొందించుకుని ఉన్నత శిఖరాలను అధిరోహించాలని ఆకాంక్షించారు.

ఈ కార్యక్రమంలో పాఠశాల సీనియర్ ఉపాధ్యాయులు వి.వి.ఆర్. ఆచార్య, ఉపాధ్యాయులు కేసోజు సత్యనారాయణ, కటకం రఘు, శ్యాంసుందర్, నాగరాజు, అనితారాణి, అమర స్వర్ణ, శివకృష్ణ, రాజు, రమ, వీరస్వామి, నరేష్, స్వరూప తదితరులు పాల్గొన్నారు.