Sunil| ఆకేరు న్యూస్, సినిమా: విలక్షణ నటుడు సునీల్‌ మరో విభిన్న పాత్రతో ప్రేక్షకులను అలరించేందుకు సిద్ధమవుతున్నారు. లోమేష్‌ పుడిపెద్ది హీరోగా, జయశ్రీ హీరోయిన్‌గా నటిస్తున్న ‘డ్యూ డేట్‌’ చిత్రంలో ఆయన పవర్‌ఫుల్‌ లాయర్‌ పాత్రలో కనిపించనున్నారు. ఈ సినిమాలో శేఖర్‌ చంద్ర అనే న్యాయవాది పాత్రను సునీల్‌ పోషిస్తున్నారు. ఆయన పాత్ర సినిమాకు ప్రత్యేక ఆకర్షణగా నిలుస్తుందని చిత్ర బృందం చెబుతోంది.
వరిష్‌ స్టూడియోస్‌ పతాకంపై పవన్‌ తరిగోపుల, ఏలూరు శ్రీను నిర్మిస్తున్న ఈ చిత్రానికి ఆనంద్‌.కె దర్శకత్వం వహిస్తున్నారు. ఇటీవల పూజా కార్యక్రమాలతో ప్రారంభమైన ఈ సినిమా రెగ్యులర్‌ షూటింగ్‌ హైదరాబాద్‌లో కొనసాగుతోంది. ప్రస్తుతం కీలక సన్నివేశాలను చిత్రీకరిస్తున్నారు.
కీలక పాత్రల్లో ప్రముఖ నటులు
ఈ చిత్రంలో ప్రణీత పట్నాయక్‌, విజ్ఞాని, కృష్ణ భగవాన్‌, అక్షర గౌడ తదితరులు ముఖ్య పాత్రల్లో నటిస్తున్నారు. ఇటీవల కమెడియన్‌ కృష్ణ భగవాన్‌ షూటింగ్‌లో పాల్గొన్నారు. చాలా కాలం విరామం తర్వాత ఆయన ఓ ప్రత్యేక పాత్రలో కనిపించనుండటంతో ప్రేక్షకుల్లో ఆసక్తి నెలకొంది.
ఆసక్తికరంగా కోర్టు రూమ్‌ డ్రామా
ప్రస్తుత సమాజంలోని ఓ కీలక సమస్యను ఆధారంగా చేసుకుని ఈ సినిమాను రూపొందిస్తున్నట్లు నిర్మాతలు తెలిపారు. కోర్టు రూమ్‌ డ్రామాగా తెరకెక్కుతున్న ఈ చిత్రంలో వాణిజ్య అంశాలతో పాటు ఉత్కంఠభరితమైన కథనం ఉంటుందని పేర్కొన్నారు. ప్రతి నెలా ప్రతి ఒక్కరూ గుర్తుంచుకునే ‘డ్యూ డేట్‌’ చుట్టూ కథను ఆసక్తికరంగా అల్లినట్లు వెల్లడించారు.
టైటిల్‌ నుంచి కథ, కథనం వరకు ప్రతి అంశం ప్రేక్షకులకు కొత్త అనుభూతిని అందిస్తుందని, వినోదంతో పాటు ఆలోచింపజేసేలా సినిమా ఉంటుందని నిర్మాతలు ఆశాభావం వ్యక్తం చేశారు. సునీల్‌ పోషిస్తున్న శేఖర్‌ చంద్ర పాత్ర ఈ కోర్టు రూమ్‌ డ్రామాలో ఎలాంటి ప్రభావం చూపుతుందో తెలియాలంటే సినిమా విడుదలయ్యే వరకు వేచి చూడాల్సిందే.
సాంకేతిక బృందం: ఈ చిత్రానికి ఆర్ట్‌ డైరెక్టర్‌గా జవ్వాడి నాయుడు, మాటల రచయితగా హరీష్‌ మీనన్‌, ఎడిటర్‌గా సత్య గిడుటూరి, సినిమాటోగ్రాఫర్‌గా చెంచు జింక పనిచేస్తున్నారు. నిర్మాతలు పవన్‌ తరిగోపుల, ఏలూరు శ్రీను కాగా, దర్శకత్వ బాధ్యతలను ఆనంద్‌.కె నిర్వహిస్తున్నారు.
About the Author
Please tell us what is wrong. Your report will be sent to the website team.
