IRCTC Refund Case
* ప్రయాణికుడికి అనుకూలంగా కోర్టు తీర్పు
* ఐఆర్‌సీటీసీకి రూ.3,100 చెల్లించాలని ఆదేశం
ఆకేరు న్యూస్, డెస్క్ : ఒక్క రూపాయి కోసం ఓ ప్రయాణికుడు ఏకంగా ఐఆర్‌సీటీసీపై న్యాయపోరాటం చేశాడు. టికెట్‌ రద్దు చేసుకున్న తర్వాత తనకు రావాల్సిన రీఫండ్‌లో ఒక్క రూపాయి తక్కువగా రావడంతో వినియోగదారుల కమిషన్‌ను ఆశ్రయించాడు. ఈ కేసును విచారించిన కేరళలోని కాసరగోడ్‌ జిల్లా వినియోగదారుల కమిషన్‌ ప్రయాణికుడికి అనుకూలంగా తీర్పునిచ్చింది.
సేవలో లోపం జరిగినందుకు పరిహారంగా రూ.100, న్యాయపోరాటానికి అయిన ఖర్చుల కింద రూ.3,000 కలిపి మొత్తం రూ.3,100 చెల్లించాలని ఐఆర్‌సీటీసీని ఆదేశించింది. కేరళలోని కాసరగోడ్‌ జిల్లాకు చెందిన ఓ ప్రయాణికుడు 2024 ఆగస్టు 11న తన ఆగస్టు 20 ప్రయాణం కోసం రూ.553 చెల్లించి ఏసీ త్రీ టైర్‌ రైలు టికెట్‌ బుక్‌ చేసుకున్నాడు. అయితే కొన్ని కారణాలతో ప్రయాణాన్ని రద్దు చేసుకోవాలని నిర్ణయించుకున్నాడు. ప్రయాణ తేదీకి 48 గంటల కంటే ముందుగానే.. అంటే ఆగస్టు 17న టికెట్‌ను క్యాన్సిల్‌ చేసుకున్నాడు.
టికెట్‌ రద్దు నిబంధనల ప్రకారం ఐఆర్‌సీటీసీ రూ.180 క్యాన్సిలేషన్‌ ఛార్జీతో పాటు దానిపై రూ.9 జీఎస్టీ మినహాయించింది. మొత్తం రూ.189 కట్‌ చేసిన తర్వాత ప్రయాణికుడికి రూ.364? కాదు, రూ.341 రీఫండ్‌ రావాల్సి ఉంది. కానీ అతడి ఖాతాలో మాత్రం రూ.340 మాత్రమే జమ అయింది. దీంతో తనకు రావాల్సిన మొత్తంలో ఒక్క రూపాయి తక్కువగా ఎందుకు చెల్లించారంటూ ఐఆర్‌సీటీసీని ప్రశ్నించాడు.
* వినియోగదారుల కమిషన్‌ను ఆశ్రయించిన ప్రయాణికుడు
తనకు రావాల్సిన ఒక్క రూపాయి ఇవ్వకపోవడంపై ప్రయాణికుడు కాసరగోడ్‌ జిల్లా వినియోగదారుల కమిషన్‌ను ఆశ్రయించాడు. ఈ కారణంగా తనకు మానసిక వేదన కలిగిందని, సంస్థ సేవల్లో లోపం ఉందని ఫిర్యాదు చేశాడు. బకాయి ఉన్న రూపాయితో పాటు నష్టపరిహారం, కోర్టు ఖర్చులు చెల్లించాలని కోరాడు.
* ఐఆర్‌సీటీసీ వాదనను తిరస్కరించిన కమిషన్‌..
విచారణ సందర్భంగా ఐఆర్‌సీటీసీ తన వాదనను సమర్పించడంలో జాప్యం చేసింది. గడువు దాటిన తర్వాత దాఖలు చేసిన వాదనను కమిషన్‌ పరిగణనలోకి తీసుకోలేదు. అంతేకాకుండా ప్రయాణికుడికి రావాల్సిన రీఫండ్‌లో ఒక్క రూపాయి ఎందుకు తగ్గించారో సంస్థ సరైన వివరణ ఇవ్వలేకపోయింది. నిబంధనల ప్రకారం చెల్లించాల్సిన మొత్తాన్ని పూర్తిగా తిరిగి ఇవ్వకపోవడం సేవలో లోపంగా కమిషన్‌ పరిగణించింది.
* ఐఆర్‌సీటీసీకి రూ.3,100 చెల్లించాలని ఆదేశం
ఈ కేసును విచారించిన కమిషన్‌ అధ్యక్షుడు కృష్ణన్‌ కె, సభ్యురాలు బీనా కెజీ ప్రయాణికుడికి అనుకూలంగా తీర్పునిచ్చారు. బకాయి ఉన్న ఒక్క రూపాయిని 2024 ఆగస్టు 17 నుంచి 9 శాతం వార్షిక వడ్డీతో చెల్లించాలని ఆదేశించారు. అలాగే సేవలో లోపం, మానసిక వేదనకు పరిహారంగా రూ.100, న్యాయపోరాటానికి అయిన ఖర్చుల కింద రూ.3,000 కలిపి మొత్తం రూ.3,100ను 30 రోజుల్లోగా చెల్లించాలని ఐఆర్‌సీటీసీని ఆదేశించారు. ఒక్క రూపాయి చిన్న మొత్తమే అయినప్పటికీ వినియోగదారుడికి రావాల్సిన సొమ్మును పూర్తిగా చెల్లించాల్సిందేనని ఈ తీర్పు స్పష్టం చేసింది. వినియోగదారుల హక్కుల పరిరక్షణలో ఈ కేసు ఆసక్తికరంగా నిలిచింది.
About the Author
Please tell us what is wrong. Your report will be sent to the website team.
