కలెక్టర్ బోర్ఖడే హేమంత్ సహదేవరావు
* చెరువుల సర్వేను వేగవంతం చేయాలి..
* సంయుక్తంగా హద్దుల నిర్ధారణ
ఆకేరు న్యూస్, ములుగు: జిల్లాలో చిత్తడి నేలలకు (Wetlands) సంబంధించిన చెరువుల సర్వే, హద్దుల నిర్ధారణ ప్రక్రియను వేగవంతం చేసి, సమగ్ర నివేదికలు సమర్పించాలని జిల్లా కలెక్టర్ బోర్ఖడే హేమంత్ సహదేవరావు అధికారులను ఆదేశించారు.
మంగళవారం సమీకృత జిల్లా కలెక్టరేట్లోని మినీ సమావేశ మందిరంలో జిల్లా అటవీ అధికారి వికాస్ మీనాతో కలిసి సంబంధిత శాఖల అధికారులతో చిత్తడి నేలల సర్వేపై సమీక్షా సమావేశం నిర్వహించారు.
ఈ సందర్భంగా కలెక్టర్ మాట్లాడుతూ.. ప్రభుత్వం గుర్తించిన చెరువులకు సంబంధించిన సర్వే పనులను త్వరితగతిన పూర్తి చేయాలని సూచించారు. సుప్రీంకోర్టు మార్గదర్శకాలకు (Supreme Court Guidelines) అనుగుణంగా చెరువుల పరిధిని గుర్తించి, హద్దులను నిర్ధారించడంతో పాటు సరిహద్దు గుర్తులను ఏర్పాటు చేయాలని స్పష్టం చేశారు. చెరువుల పూర్తిస్థాయి నీటిమట్టం (Full Reservoir Level – FRL), గరిష్ఠ వరద నీటిమట్టం (Maximum Flood Level – MFL) ఆధారంగా సరిహద్దులను ఖరారు చేయాలని తెలిపారు.
రెవెన్యూ, అటవీ, నీటిపారుదల శాఖల అధికారులు సమన్వయంతో సంయుక్త సర్వే (Joint Survey) చేపట్టాలని ఆదేశించారు. అవసరమైన ప్రాంతాల్లో వ్యవసాయ, ఇతర సంబంధిత శాఖల సహకారం తీసుకోవాలని సూచించారు. సంబంధిత ఎగ్జిక్యూటివ్ ఇంజినీర్లు (EE), డిప్యూటీ ఎగ్జిక్యూటివ్ ఇంజినీర్లు (DEE), జూనియర్ ఇంజినీర్లు (JE) రెవెన్యూ సర్వేయర్లతో సమన్వయం చేసుకుంటూ క్షేత్రస్థాయిలో సర్వే పనులను వేగవంతం చేయాలని కలెక్టర్ పేర్కొన్నారు.
ఈ సమావేశంలో ఆర్డీవో కృష్ణవేణి, డీఐఓ అప్పలనాయుడు, ఈఈ నారాయణ, సంబంధిత శాఖల డీఈలు, ఇంజినీరింగ్, రెవెన్యూ, అటవీ శాఖల అధికారులు, క్షేత్రస్థాయి సిబ్బంది పాల్గొన్నారు.
Also Read: ప్రజా సమస్యలపై ఎస్పీకి 24 ఫిర్యాదులు

Please tell us what is wrong. Your report will be sent to the website team.

