* ఆస‌క్తిక‌ర అంశాల ప్ర‌స్తావ‌న
ఆకేరు న్యూస్‌, డెస్క్ : భారత రాజ్యాంగ దినోత్స‌వాన్ని పుర‌స్క‌రించుకుని ప్ర‌ధాన‌మంత్రి న‌రేంద్ర మోదీ దేశ పౌరుల‌కు బ‌హిరంగ లేఖ రాశారు. 75 ఏళ్ల రాజ్యాంగ చ‌రిత్ర‌లో దాటిన మైలురాళ్ల‌ను, సాధించిన విజ‌యాల‌ను, వాటి నుంచి పొందిన ప్రేర‌ణ‌ను తెలియ‌జేశారు. రాజ్యాంగం ఓ పవిత్ర పత్రం అని పేర్కొన్నారు. నా తోటి భారతీయుడా.. నమస్తే.. అంటూ లేఖ ప్రారంభించిన మోదీ రాజ్యాంగ విశేషాల‌ను అందులో పొందిప‌రిచారు. నవంబర్ 26 అనేది ప్రతీ భారతీయుడికి ఎంతో గర్వకారణమైన రోజ‌ని, 1949లో ఇదే రోజున రాజ్యాంగ సభ భారత రాజ్యాంగాన్ని ఆమోదించింద‌ని తెలిపారు. రాజ్యాంగం అనేది నిరంతరం మార్గనిర్దేశం చేస్తున్న పవిత్ర పత్రం అన్నారు. అందుకే, దాదాపు దశాబ్దం క్రితం 2015లో NDA ప్రభుత్వం నవంబర్ 26ని రాజ్యాంగ దినోత్సవంగా గుర్తించాలని నిర్ణయించిన‌ట్లు ఈ సందర్భంగా పేర్కొన్నారు. ఆర్థికంగా వెనుక‌బ‌డిన కుటుంబం నుంచి వ‌చ్చిన తాను రాజ్యాంగం ఇచ్చిన శ‌క్తి వ‌ల్లే 24 సంవత్సరాలకు పైగా నిరంతరం ప్రభుత్వ అధిపతిగా సేవ చేయగలుగుతున్నా తెలిపారు. 2014లో తాను మొదటిసారి పార్లమెంటుకు వచ్చి, ప్రజాస్వామ్యానికి గొప్ప దేవాలయమైన పార్ల‌మెంట్‌ మెట్లను తాకి నమస్కరించిన క్షణాలు ఇప్పటికీ గుర్తున్నాయ‌న్నారు. మళ్ళీ, 2019లో, ఎన్నికల ఫలితాల తర్వాత, నేను సంవిధాన్ సదన్ సెంట్రల్ హాల్‌లోకి ప్రవేశించినప్పుడు, నేను నమస్కరించి, భక్తి చిహ్నంగా నా నుదిటిపై రాజ్యాంగాన్ని ఉంచుకున్నాన్నారు. రాజ్యాంగం 75 సంవత్సరాలు పూర్తి చేసుకున్న సందర్భంగా, ఇది భారత ప్రజలకు అసాధారణమైన మైలురాయి అని, ఈ సందర్భంగా దేశ వ్యాప్తంగా కార్యక్రమాలను ప్రారంభించే అవకాశం త‌మ‌కు ల‌భించింద‌న్నారు. ఈ కార్యక్రమాలలో ప్రజల భాగస్వామ్యం విశేషంగా ఉంద‌న్నారు. ఈ సంవత్సరం మనం వందేమాతరం 150వ వార్షికోత్సవాన్ని కూడా జరుపుకుంటామని గుర్తు చేశారు. ఈ రాజ్యాంగ దినోత్సవం రోజున ఈ దేశం యొక్క గొప్ప పౌరులుగా మన విధులను నిర్వర్తించాలనే మన ప్రతిజ్ఞను పునరుద్ఘాటిద్దామ‌ని, అలా చేయడం ద్వారా, అభివృద్ధి చెందిన, సాధికారత పొందిన విక్షిత్ భారత్ నిర్మాణానికి మనమందరం అర్థవంతంగా దోహదపడవచ్చ‌ని ప్ర‌ధాన‌మంత్రి మోదీ పిలుపునిచ్చారు.
………………………………………………….
