* ఏకే-47లు, ఎస్ఎల్ఆర్లతో పోలీసుల ముందుకు మావోయిస్టులు…
* ఒకేసారి 30 మంది కేడర్తో లొంగిపోయిన కీలక నేతలు
ఆకేరు న్యూస్, హైదరాబాద్:
తెలంగాణలో మావోయిస్టు కార్యకలాపాలకు గట్టి దెబ్బ తగిలింది. మావోయిస్టు పార్టీలో అత్యంత కీలక నేతగా ఉన్న పీఎల్జీఏ (PLGA) డిప్యూటీ కమాండర్ సోది కేశాలు అలియాస్ మల్లా ఆదివారం పోలీసుల ఎదుట లొంగిపోయారు. మల్లాతో పాటు మరో 30 మంది మావోయిస్టు కేడర్ కూడా ఆయుధాలను వదిలి జనజీవన స్రవంతిలోకి వచ్చారు. ఈ పరిణామం మావోయిస్టు పార్టీకి రాష్ట్రంలో పెద్ద ఎదురుదెబ్బగా భావిస్తున్నారు.
* భారీగా ఆయుధాల స్వాధీనం:
లొంగిపోయిన సమయంలో మావోయిస్టులు తమ వద్ద ఉన్న అత్యాధునిక ఆయుధాలను పోలీసులకు అప్పగించారు. ఇందులో ఏకే-47 (AK-47), ఎస్.ఎల్.ఆర్ (SLR) రైఫిళ్లతో పాటు సుమారు 50కి పైగా ఆయుధాలను పోలీసులు స్వాధీనం చేసుకున్నట్లు సమాచారం. గడిచిన కొద్ది కాలంగా తెలంగాణ-ఛత్తీస్గఢ్ సరిహద్దుల్లో మల్లా నేతృత్వంలోని దళం చురుగ్గా సాగుతోంది.
* అమిత్ షా డెడ్లైన్ ఎఫెక్ట్?
కేంద్ర హోంశాఖ మంత్రి అమిత్ షా ఇటీవల మావోయిస్టులకు విధించిన మార్చి 31 డెడ్లైన్ ముగియడంతో, పోలీసులు మరియు భద్రతా బలగాలు గాలింపు చర్యలను తీవ్రతరం చేశాయి. ఈ నేపథ్యంలోనే లొంగుబాట్లు పెరిగినట్లు విశ్లేషకులు భావిస్తున్నారు. లొంగిపోయిన వారిలో ఆంధ్రప్రదేశ్, తెలంగాణ రాష్ట్రాలకు చెందిన పలువురు కీలక నేతలు ఉండటం గమనార్హం.
* ప్రజా సేవకే అంకితం:
లొంగుబాటు అనంతరం మావోయిస్టు పార్టీ కేంద్ర కమిటీ సభ్యుడు మల్లా రాజిరెడ్డి అలియాస్ సత్తన్న (సంగ్రామ్) మాట్లాడుతూ.. ఇకపై తాము అజ్ఞాత జీవితానికి స్వస్తి పలుకుతున్నట్లు ప్రకటించారు. ప్రజల మధ్యే ఉండి ప్రజా సమస్యలపై పోరాటం చేస్తామని, మిగిలిన జీవితాన్ని ప్రజా ఉద్యమాలకే అంకితం చేస్తామని స్పష్టం చేశారు. మళ్ళీ అజ్ఞాతంలోకి వెళ్లే ఆలోచన లేదని ఆయన తేల్చి చెప్పారు.
ఈ భారీ లొంగుబాటుకు సంబంధించిన పూర్తి వివరాలను తెలంగాణ పోలీస్ ఉన్నతాధికారులు త్వరలోనే అధికారికంగా వెల్లడించే అవకాశం ఉంది.
About the Author
