PM Narendra Modi | క్రీడలపై యువత ఫోకస్..

Published: 27 Aug 2026 • 12:29 PM

* 2036 ఒలింపిక్స్‌కు ఇప్పటి నుంచే సిద్ధం కావాలి

* జాతీయ క్రీడా దినోత్సవం–2026 సందర్భంగా ప్రధాని మోదీ పిలుపు..

* 1,500కుపైగా కాలేజీల్లో ‘ఖేలో ఇండియా సంవాద్’

* జాతీయ క్రీడా దినోత్సవం–2026

అకేరు న్యూస్ ఢిల్లీ :దేశవ్యాప్తంగా క్రీడా స్ఫూర్తిని పెంపొందించేలా ‘ఖేలో ఇండియా సంవాద్’ కార్యక్రమాన్ని నిర్వహించారు. దేశంలోని 1,500కుపైగా కళాశాలల్లో జరిగిన ఈ కార్యక్రమంలో ప్రధాని నరేంద్ర మోదీ యువత, క్రీడాకారులు, అథ్లెట్లతో వర్చువల్‌గా ముచ్చటించారు. క్రీడలు, ఫిట్‌నెస్‌తో పాటు దేశ క్రీడా భవిష్యత్‌పై యువతకు దిశానిర్దేశం చేశారు.

* క్రీడలు జీవితంలో భాగం కావాలి

యువత చదువు, ఉద్యోగాలతో పాటు క్రీడలు, ఫిట్‌నెస్‌కు కూడా ప్రాధాన్యం ఇవ్వాలని మోదీ సూచించారు. క్రీడలు కేవలం పతకాలు సాధించేందుకు మాత్రమే కాకుండా ఆరోగ్యకరమైన జీవనశైలికి కూడా ఎంతో ముఖ్యమని పేర్కొన్నారు. దేశంలోని ప్రతి యువకుడిలో ఉన్న క్రీడా ప్రతిభను వెలికితీయాల్సిన అవసరం ఉందన్నారు.

* 2012 ఒలింపిక్స్‌ను గుర్తుచేసిన మోదీ

భారత్‌ గతంలో కొన్ని క్రీడలకే పరిమితమైందని ప్రధాని పేర్కొన్నారు. 2012 ఒలింపిక్స్‌లో భారత్‌కు 12 క్రీడల్లోనే పతకాలు వచ్చాయని గుర్తుచేశారు. 20కుపైగా క్రీడల్లో భారత్‌ పాల్గొనలేదని తెలిపారు. ఈ పరిస్థితిని మార్చాల్సిన అవసరం ఉందని, ఇకపై అన్ని రకాల క్రీడలపై దృష్టి పెట్టాలని పిలుపునిచ్చారు.

* 2036 ఒలింపిక్స్‌ లక్ష్యంగా

2036 ఒలింపిక్స్‌ కోసం ఇప్పటి నుంచే సన్నద్ధం కావాలని ప్రధాని మోదీ యువతకు పిలుపునిచ్చారు. భవిష్యత్‌లో అంతర్జాతీయ వేదికలపై భారత్‌ మరిన్ని పతకాలు సాధించాలంటే చిన్న వయసు నుంచే క్రీడాకారులను గుర్తించి ప్రోత్సహించాల్సిన అవసరం ఉందన్నారు. ఇందుకోసం యువతలో క్రీడల పట్ల ఆసక్తి పెంచడంతో పాటు ఫిట్‌నెస్‌ సంస్కృతిని బలోపేతం చేయాలని సూచించారు.

* తెలంగాణలో ఖేలో ఇండియా యూత్ గేమ్స్‌

ఇదిలా ఉంటే తెలంగాణకు ఈ ఏడాది ఖేలో ఇండియా క్రీడలు ప్రత్యేక ప్రాధాన్యం సంతరించుకోనున్నాయి. డిసెంబర్‌లో 8వ ఖేలో ఇండియా యూత్ గేమ్స్‌ తెలంగాణలో నిర్వహించనున్నారు. హైదరాబాద్‌, వరంగల్‌, కరీంనగర్‌, మహబూబ్‌నగర్‌ నగరాలు ఈ పోటీలకు వేదికలు కానున్నాయి. దేశవ్యాప్తంగా యువ క్రీడాకారులు తెలంగాణకు రానుండటంతో రాష్ట్రంలో క్రీడా రంగానికి మరింత ఊతం లభించే అవకాశం ఉంది.

* యువతే క్రీడా భవిష్యత్‌

దేశ క్రీడా రంగాన్ని అంతర్జాతీయ స్థాయిలో మరింత బలోపేతం చేయాలంటే యువత పాత్ర కీలకమని ప్రధాని స్పష్టం చేశారు. ఒకటి రెండు క్రీడలకు మాత్రమే పరిమితం కాకుండా అథ్లెటిక్స్‌, స్విమ్మింగ్‌, రెజ్లింగ్‌, బాక్సింగ్‌, హాకీ, షూటింగ్‌ తదితర విభాగాల్లో ప్రతిభను వెలికితీయాలని సూచించారు.
2036 ఒలింపిక్స్‌ను లక్ష్యంగా పెట్టుకుని.. ఈరోజు నుంచే వివిధ క్రీడలపై ఫోకస్‌ పెట్టాలన్న ప్రధాని పిలుపు.. దేశ క్రీడా భవిష్యత్‌పై కొత్త ఆశలు రేకెత్తిస్తోంది.