* ప్రభుత్వ తీరుపై హరీష్ రావు ఫైర్!
* ప్రోటోకాల్ ఎక్కడ? ప్రజాప్రతినిధుల ఫొటోలు ఏవి? – సిద్దిపేటలో ఫ్లెక్సీల వివాదం.
* ఇది ప్రభుత్వ కార్యక్రమమా? పార్టీ ప్రోగ్రామా? – కాంగ్రెస్ సర్కార్ను ప్రశ్నించిన హరీష్ రావు.
ఆకేరు న్యూస్, సిద్దిపేట: సిద్దిపేట జిల్లాలో ప్రతిష్టాత్మకంగా నిర్మించిన ఆయిల్ పామ్ ఫ్యాక్టరీ ప్రారంభోత్సవ కార్యక్రమం రాజకీయ వివాదానికి దారితీసింది. ప్రభుత్వ ప్రోటోకాల్ను తుంగలో తొక్కారంటూ స్థానిక ఎమ్మెల్యే, మాజీ మంత్రి హరీష్ రావు తీవ్ర ఆగ్రహం వ్యక్తం చేశారు. ప్రభుత్వ నిబంధనలకు విరుద్ధంగా వ్యవహరిస్తున్నారని ఆరోపిస్తూ ఆయన ఈ కార్యక్రమానికి వెళ్లడం లేదని స్పష్టం చేశారు.
ప్రోటోకాల్ ఉల్లంఘనపై విమర్శలు
ప్రభుత్వం ఏర్పాటు చేసిన అధికారిక ఫ్లెక్సీలలో స్థానిక ప్రజాప్రతినిధుల ఫొటోలు కనీసం గౌరవార్థం కూడా ముద్రించకపోవడంపై హరీష్ రావు మండిపడ్డారు. ఇది కేవలం ఒక పార్టీ కార్యక్రమంలా సాగుతోందని, ప్రభుత్వ కార్యక్రమంలా కనిపించడం లేదని ఆయన విమర్శించారు. నియోజకవర్గ అభివృద్ధిలో భాగస్వాములైన వారిని విస్మరించడం ప్రజాస్వామ్య స్ఫూర్తికి విరుద్ధమని హరీష్ రావు పేర్కొన్నారు.
అసలు క్రెడిట్ మాదే..
ఈ ప్రాజెక్టు నేపథ్యాన్ని గుర్తు చేస్తూ, ఆయిల్ పామ్ ఫ్యాక్టరీ ఏర్పాటుకు గత ప్రభుత్వ హయాంలోనే అడుగులు పడ్డాయని ఆయన వివరించారు.ఆయిల్ పామ్ సాగు కోసం తాము 2021లోనే పనులు ప్రారంభించామని వెల్లడించారు.
ఈ ప్రాజెక్టులో భాగంగా మొదటి మొక్కను తామే నాటామని, అప్పట్లోనే భూసేకరణ మరియు మౌలిక వసతుల కల్పన పూర్తి చేశామని గుర్తు చేశారు.నేటి ప్రారంభోత్సవం గత ప్రభుత్వం చేసిన కష్టానికి ఇప్పుడు కేవలం రిబ్బన్ కటింగ్ మాత్రమే చేస్తున్నారని, ఆ క్రెడిట్ కాంగ్రెస్ ప్రభుత్వం తీసుకోవడం హాస్యాస్పదమని వ్యాఖ్యానించారు.
రాజకీయ రంగు పులుముకున్న అభివృద్ధి….
ప్రభుత్వ నిధులతో నిర్వహించే కార్యక్రమాలను రాజకీయ లబ్ధి కోసం వాడుకోవడం సరికాదని హరీష్ రావు హితవు పలికారు. ప్రజల కోసం చేపట్టిన ప్రాజెక్టుల విషయంలో రాజకీయాలు చేయడం కంటే, అందరినీ కలుపుకొని వెళ్లడమే సరైన పద్ధతి అని ఆయన అభిప్రాయపడ్డారు. ప్రస్తుతం ఈ వ్యవహారం సిద్దిపేట జిల్లా రాజకీయాల్లో చర్చనీయాంశంగా మారింది.
About the Author
