* అభిమాన త‌న్మ‌య‌త్వంలో చిరు-పవన్
ఆకేరు న్యూస్‌, సినిమా డెస్క్ : మెగాస్టార్ చిరంజీవి పుట్టినరోజు సంద‌ర్భంగా ఈరోజు మెగా అభిమానులు పండ‌గ చేసుకుంటున్నారు. మెగా అభిమానులే కాదు.. చిరంజీవి కుటుంబ స‌భ్యులు కూడా ఆయ‌న‌తో ఆనందాన్ని పంచుకుంటున్నారు. ఏపీ ఉప ముఖ్య‌మంత్రి, సినీ హీరో, చిరంజీవి త‌మ్ముడు పవన్ కల్యాణ్ కూడా అన్న‌య్య పుట్టినరోజు సంద‌ర్భంగా నిన్న‌టి నుంచీ మెసేజ్ ల ద్వారా అన్న‌కు శుభాకాంక్షలు చెబుతూ ఆనందాన్ని పంచుకుంటున్నారు. విశ్వంభరునికి జన్మదిన శుభాకాంక్షలు అంటూ నిన్న ఎక్స్ లో మెసేజ్ పెట్టిన పవన్ కల్యాణ్.. ఈరోజు చిన్ననాటి వయసులో జరుపుకున్న పుట్టినరోజు ఫోటోలను పంపించి అన్నయ్యకు శుభాకాంక్షలు తెలిపారు. తమ్ముడి పంపిన ఫోటోలను చూసి మురిసిపోయిన చిరంజీవి తమ్ముడిని ఆప్యాయంగా ఆశీర్వదిస్తూ సంతోషం వ్యక్తం చేశారు. ఆయ‌న‌కు ఓ మెసేజ్ ఫార్వ‌ర్డ్ చేశారు.
తమ్ముడిని ప్ర‌శంసిస్తూ చిరంజీవి ఏమ‌న్నారంటే..
జ‌న సైన్యాధ్య‌క్షుడికి విజ‌యోస్తు!
త‌మ్ముడు కల్యాణ్..
ప్రేమ‌తో పంపిన పుట్టిన రోజు శుభాకాంక్షలు అందాయి. ప్ర‌తీ మాట.. ప్ర‌తీ అక్ష‌రం నా హృద‌యాన్ని తాకింది. అన్న‌య్య‌గా న‌న్ను చూసి నువ్వెంత గ‌ర్విస్తున్నావో.. ఓ త‌మ్ముడిగా నీ విజ‌యాల్ని, నీ పోరాటాన్ని నేను అంత‌గా ఆస్వాదిస్తున్నాను. నీ కార్య‌దీక్ష‌త, ప‌ట్టుద‌ల చూసి ప్ర‌తీ క్ష‌ణం గ‌ర్వ‌ప‌డుతూనే ఉన్నా. నిన్ను న‌మ్మిన‌వాళ్ల‌కు ఏదో చేయాల‌న్న త‌ప‌నే నీకు ఎప్ప‌టిక‌ప్పుడు కొత్త శ‌క్తిని ఇస్తుంది. ఈ రోజు నీ వెనుక కోట్లాదిమంది జన‌సైనికులు ఉన్నారు. ఆ సైన్యాన్ని ఓ రాజువై న‌డిపించు. వాళ్ల ఆశ‌లకు, క‌ల‌ల‌కు కొత్త శ‌క్తినివ్వు. అభిమానుల ఆశీర్వాదం, ప్రేమ నీకు మెండుగా ల‌భిస్తూనే ఉండాలి. ఓ అన్న‌య్య‌గా నా ఆశీర్వ‌చ‌నాలు ఎప్పుడూ నీతోనే ఉంటాయి. నీ ప్ర‌తీ అడుగులోనూ విజ‌యం నిన్ను వ‌రించాల‌ని ఆ భ‌గ‌వంతుడ్ని కోరుకొంటున్నాను.
ఇట్లు
నీ అన్న‌య్య.. అంటూ త‌మ్ముడు ప‌వ‌న్‌క‌ల్యాణ్ కు చిరంజీవి ఇచ్చిన మెసేజ్ వైర‌ల్ అవుతోంది.
…………………………………………………………..
