TELANGANA SPORTS ACADEMY ADMISSIONS | జూలై 20 నుంచి ట్రయల్స్

ఆకేరు న్యూస్, హైదరాబాద్: తెలంగాణలోని ప్రతిభావంతులైన యువ క్రీడాకారులకు తెలంగాణ క్రీడా ప్రాధికార సంస్థ (SATG) ఒక అద్భుతమైన అవకాశాన్ని కల్పించింది. 2026–27 విద్యా సంవత్సరానికి గానూ రాష్ట్రంలోని వివిధ క్రీడా అకాడమీలు, ప్రాంతీయ క్రీడా వసతి గృహాల్లో (స్పోర్ట్స్ హాస్టల్స్) ప్రవేశాల కోసం ఎంపిక పరీక్షలు నిర్వహించనున్నట్లు సంస్థ ప్రకటించింది. ఈ ఎంపికలు జూలై 20 నుంచి జూలై 28 వరకు రాష్ట్రవ్యాప్తంగా వివిధ కేంద్రాల్లో జరగనున్నాయి. అర్హులైన బాలురు, బాలికలకు వివిధ క్రీడా విభాగాల్లో అత్యుత్తమ శిక్షణ ఇచ్చేందుకు ఈ ట్రయల్స్ చేపడుతున్నారు

* ఈ ఎంపికల షెడ్యూల్ విషయానికి వస్తే..
జూలై 20న హైదరాబాద్ ఉస్మానియా యూనివర్సిటీలోని సైక్లింగ్ వెలోడ్రోమ్‌లో సైక్లింగ్, రెజ్లింగ్ (బాలురు మాత్రమే) ఎంపికలు జరుగుతాయి. అదే రోజున సరూర్‌నగర్ వాలీబాల్ అకాడమీలో బాలురు, బాలికలకు వాలీబాల్ ట్రయల్స్ నిర్వహిస్తారు. జూలై 20, 21 తేదీల్లో గచ్చిబౌలి స్పోర్ట్స్ కాంప్లెక్స్‌లో హాకీ ఎంపికలు, ఎల్.బి. స్టేడియంలో అథ్లెటిక్స్, హ్యాండ్‌బాల్ (బాలురు), ఫుట్‌బాల్ (బాలురు) విభాగాలకు ఎంపికలు ఉంటాయి. జూలై 21న ఖమ్మంలోని సర్దార్ పటేల్ స్టేడియంలో అథ్లెటిక్స్ (బాలురు) ట్రయల్స్ జరగనున్నాయి.

మరోవైపు జిల్లాల వారీగా చూస్తే.. జూలై 22, 23 తేదీల్లో సిద్ధిపేట వాలీబాల్ అకాడమీలో వాలీబాల్ ఎంపికలు, జూలై 25, 26 తేదీల్లో మహబూబ్‌నగర్ ప్రధాన స్టేడియంలో వాలీబాల్ మరియు కబడ్డీ (బాలురు) ట్రయల్స్ నిర్వహిస్తారు. చివరగా జూలై 27, 28 తేదీల్లో హనుమకొండలోని జేఎన్ స్టేడియంలో ప్రాంతీయ క్రీడా వసతి గృహం ప్రవేశాల కోసం జిమ్నాస్టిక్స్, స్విమ్మింగ్ (బాలురు), అథ్లెటిక్స్, హ్యాండ్‌బాల్ (బాలురు), రెజ్లింగ్ (బాలురు) విభాగాలకు ఎంపికలు జరగనున్నాయి.

ఈ ప్రవేశాలకు సంబంధించి వేర్వేరు వయోపరిమితులను నిర్ణయించారు. జిమ్నాస్టిక్స్, స్విమ్మింగ్ విభాగాలకు అండర్-10 నుంచి అండర్-12 (01-07-2014 నుంచి 30-06-2016 మధ్య జన్మించిన వారు) అర్హులు. అథ్లెటిక్స్, వాలీబాల్, హాకీ, హ్యాండ్‌బాల్, ఫుట్‌బాల్, సైక్లింగ్, రెజ్లింగ్, కబడ్డీ విభాగాలకు అండర్-14 నుంచి అండర్-16 (01-07-2010 నుంచి 30-06-2012 మధ్య జన్మించిన వారు) దరఖాస్తు చేసుకోవచ్చు. అయితే సరూర్‌నగర్ వాలీబాల్ అకాడమీలో మాత్రం ప్రత్యేకంగా అండర్-16 నుంచి అండర్-18 (01-07-2008 నుంచి 30-06-2010 మధ్య జన్మించిన వారు) విభాగానికి కూడా ఎంపికలు జరగనున్నాయి.

ఈ ఎంపిక ప్రక్రియను అత్యంత పారదర్శకంగా నిర్వహించేందుకు ఉప సంచాలకులు, జిల్లా యువజన క్రీడాధికారులు, సీనియర్ కోచ్‌లు, క్రీడా సంఘాల ప్రతినిధులు మరియు అంతర్జాతీయ క్రీడాకారులతో కూడిన ప్రత్యేక ఎంపిక కమిటీలను SATG ఏర్పాటు చేసింది. ట్రయల్స్ ముగిసిన వెంటనే ఎంపికైన క్రీడాకారుల జాబితాతో పాటు వెయిటింగ్ లిస్ట్‌ను కూడా కన్వీనర్లు సమర్పించాల్సి ఉంటుంది. క్రీడల్లో రాణించాలనుకునే అర్హులైన యువతీ యువకులు ఈ అవకాశాన్ని సద్వినియోగం చేసుకోవాలని, నిర్ణీత తేదీల్లో ఆయా వేదికలకు సకాలంలో హాజరుకావాలని తెలంగాణ క్రీడా ప్రాధికార సంస్థ కోరింది.