MLA NAINI RAJENDAR | భవానీ నగర్‌లో పనులు ప్రారంభం..

Published: 06 May 2026 • 07:15 AM

*గ్రేటర్ వరంగల్ 59వ డివిజన్‌లో ముమ్మరంగా 1.10 కోట్లతో అభివృద్ధి పనులు ప్రారంభం

*నాణ్యత విషయంలో రాజీ లేదు..

*అధికారులకు ఎమ్మెల్యే నాయిని స్ట్రాంగ్ వార్నింగ్

ఆకేరు న్యూస్, హన్మకొండ:
గ్రేటర్ వరంగల్ మున్సిపల్ కార్పొరేషన్ పరిధిలోని 59వ డివిజన్ భవానీ నగర్‌లో అభివృద్ధి పనుల జాతర మొదలైంది. బుధవారం వరంగల్ పశ్చిమ ఎమ్మెల్యే నాయిని రాజేందర్ రెడ్డి నియోజకవర్గ పర్యటనలో భాగంగా భవానీ నగర్‌లో పర్యటించారు. ఈ సందర్భంగా సుమారు రూ.1.10 కోట్ల వ్యయంతో నూతనంగా నిర్మించనున్న అంతర్గత సి.సి. రోడ్లు (CC Roads) మరియు సైడ్ డ్రైనేజీ (Side Drainage) పనులకు స్థానిక కార్పొరేటర్ గుజ్జుల వసంతతో కలిసి ఆయన శంకుస్థాపన చేశారు.

*నాణ్యత ఉంటేనే బిల్లులు:
ఈ సందర్భంగా ఏర్పాటు చేసిన సమావేశంలో ఎమ్మెల్యే మాట్లాడుతూ.. కాలనీల సర్వతోముఖాభివృద్ధికి ప్రభుత్వం కట్టుబడి ఉందని స్పష్టం చేశారు. ముఖ్యంగా వర్షాకాలం దృష్ట్యా ప్రజలకు ఇబ్బందులు కలగకుండా డ్రైనేజీ వ్యవస్థను మెరుగుపరుస్తున్నట్లు తెలిపారు. పనుల నాణ్యత విషయంలో ఏమాత్రం రాజీ పడకూడదని, నిబంధనల ప్రకారం పనులు జరగాలని అధికారులను ఆదేశించారు. నాణ్యత లోపిస్తే కఠిన చర్యలు తప్పవని హెచ్చరించారు.

*ప్రజల భాగస్వామ్యం అవసరం:
అభివృద్ధి పనులను కాలనీవాసులు నిరంతరం పర్యవేక్షించాలని, ప్రజా సొమ్ముతో జరుగుతున్న పనులు పటిష్టంగా ఉండేలా చూడాలని ఆయన కోరారు. ఈ కార్యక్రమంలో స్థానిక నాయకులు, మున్సిపల్ అధికారులు మరియు పెద్ద సంఖ్యలో కాలనీ ప్రజలు పాల్గొన్నారు.