CM REVANTH REDDY | మహిళలను కోటీశ్వరులను చేసే ప్లాన్

తెలంగాణ సామాజిక, ఆర్థిక ముఖచిత్రాన్ని సమూలంగా మార్చే దిశగా రాష్ట్ర ప్రభుత్వం సరికొత్త అధ్యాయాన్ని లిఖిస్తోంది. ముఖ్యమంత్రి ఎనుముల రేవంత్ రెడ్డి నేతృత్వంలో కేవలం సంక్షేమానికే పరిమితం కాకుండా, మహిళలను అంతర్జాతీయ స్థాయి పారిశ్రామికవేత్తలుగా, స్వయంసమృద్ధ ఆర్థిక శక్తులుగా తీర్చిదిద్దేందుకు ఒక బృహత్తర వ్యూహాత్మక ప్రణాళిక సిద్ధమైంది. 2034 నాటికి రాష్ట్రంలోని కోటి మంది స్వయం సహాయక సంఘాల (SHG) మహిళలను కోటీశ్వరులను చేయడమే పరమావధిగా ఈ సరికొత్త పారిశ్రామిక, ఆర్థిక విప్లవానికి నాంది పలికారు. డాక్టర్ బీఆర్ అంబేద్కర్ రాష్ట్ర సచివాలయం వేదికగా జరిగిన ఉన్నత స్థాయి సమీక్షా సమావేశంలో, ముఖ్యమంత్రి పలు విప్లవాత్మక నిర్ణయాలు ప్రకటించి, వాటిని తక్షణమే క్షేత్రస్థాయిలో అమలు చేయాలని అధికారులను, జిల్లా కలెక్టర్లను ఆదేశించారు.

* కార్పొరేట్ శక్తులకు దీటైన సవాల్

ప్రస్తుతం మార్కెట్‌లో ఏకఛత్రాధిపత్యం చలాయిస్తున్న ప్రైవేట్ కార్పొరేట్ చైన్ సూపర్ బజార్లకు గట్టి పోటీనిస్తూ, వినియోగదారులకు అంతకంటే అత్యంత నాణ్యమైన వస్తువులను సరసమైన ధరలకే అందించేందుకు ప్రభుత్వం సరికొత్త వ్యూహాన్ని రచించింది. మొదటి విడతగా రాష్ట్రంలోని 119 నియోజకవర్గ కేంద్రాలలో అత్యంత కీలకమైన, వాణిజ్యపరంగా అనుకూలమైన ప్రభుత్వ స్థలాలను గుర్తించి, మహిళా సంఘాలకు కేవలం నామినల్ అద్దె ప్రాతిపదికన 30 ఏళ్లపాటు లీజుకు ఇవ్వనున్నారు. ఈ సూపర్ బజార్ల స్థాపన, నిర్వహణ కోసం ప్రభుత్వం తరఫున భారీ మొత్తంలో కార్పస్ ఫండ్‌ను విడుదల చేయనున్నారు.
నిత్యావసర సరుకులు మొదలుకొని గ్రామీణ ఉత్పత్తుల వరకు అన్ని రకాల నాణ్యమైన వస్తువులకు ఈ ‘మహిళా శక్తి బజార్’ ఒక కేరాఫ్ అడ్రస్‌గా మారి, దేశంలోనే నంబర్ వన్ బ్రాండ్‌గా అవతరించాలని ముఖ్యమంత్రి ఆకాంక్షించారు.

దళారీ వ్యవస్థ నిర్మూలన… మహిళల చేతికే రైస్ మిల్లులు, భారీ గోడౌన్లు రైతులను, ప్రభుత్వాన్ని దశాబ్దాలుగా మోసం చేస్తున్న కొంతమంది మిల్లర్లు, దళారుల అక్రమాలకు శాశ్వతంగా అడ్డుకట్ట వేసేందుకు ముఖ్యమంత్రి సంచలన నిర్ణయం తీసుకున్నారు. ఇకపై ప్రతి మండలంలో స్వయం సహాయక సంఘాల మహిళల పూర్తి పర్యవేక్షణలోనే రైస్ మిల్లులు, పెద్ద ఎత్తున లాజిస్టిక్ సెంటర్లు ఏర్పాటవుతాయి. భవిష్యత్తులో ధాన్ని భద్రపరిచేందుకు ప్రతి మండలంలో రెండు నుండి నాలుగు అనుకూలమైన స్థలాలను గుర్తించి, పెద్ద గోడౌన్లు నిర్మించాలని కలెక్టర్లను ఆదేశించారు. ప్రభుత్వం సేకరించిన ధాన్యమంతటినీ ఈ గోడౌన్లలో భద్రపరిచే బాధ్యత, వాటిని మహిళల దగ్గర నుంచే మిల్లర్లు తీసుకెళ్లేలా పటిష్ట చర్యలు తీసుకోనున్నారు. వీటికి అవసరమైన బ్యాంక్ రుణాలను జీరో వడ్డీ (సున్నా వడ్డీ) తో ఇప్పించే బాధ్యతను ప్రభుత్వమే పూర్తిగా స్వీకరిస్తుంది.

* దేశంలోనే సరికొత్త రికార్డు…

ప్రజాపాలన ప్రగతి ప్రణాళికలో భాగంగా ముఖ్యమంత్రి సచివాలయం నుండి వర్చువల్ పద్ధతిలో రాష్ట్రవ్యాప్తంగా ఒకేసారి 8,000 ఇందిరా స్త్రీ శక్తి భవనాలకు శంకుస్థాపన చేసి దేశంలోనే సరికొత్త రికార్డు సృష్టించారు. ఈ చారిత్రాత్మక కార్యక్రమంలో ఉప ముఖ్యమంత్రి మల్లు భట్టి విక్రమార్క, ఐటీ, పరిశ్రమల శాఖ మంత్రి, పంచాయతీ రాజ్ గ్రామీణాభివృద్ధి శాఖ మంత్రి ధనసరి అనసూయ సీతక్క, రెవెన్యూ శాఖ మంత్రి పొంగులేటి శ్రీనివాసరెడ్డి సహా పలువురు ఉన్నతాధికారులు పాల్గొన్నారు. ఇదే వేదికపై మహిళలకు ప్రభుత్వం పంపిణీ చేయనున్న ప్రతిష్టాత్మక ఇందిరమ్మ చీరల సరికొత్త డిజైన్లను కూడా ముఖ్యమంత్రి ఆవిష్కరించారు.

* రవాణా రంగంలో భాగస్వామ్యం…

మహిళా సంఘాలకు కేవలం సాంప్రదాయ వ్యాపార రంగాల్లోనే కాకుండా రవాణా రంగంలోనూ భారీ భాగస్వామ్యం కల్పిస్తూ ప్రభుత్వం 1,000 ఆర్టీసీ బస్సులను కేటాయించనుంది. దీని ద్వారా ప్రతి సంఘానికి నెలకు కనీసం ₹70,000 స్థిర ఆదాయం సమకూరనుంది. ఇప్పటికే మొదటి విడత పూర్తికాగా, రాబోయే జూన్ 5వ తేదీన హైదరాబాద్ పరేడ్ గ్రౌండ్స్ వేదికగా మరో 553 బస్సులను మహిళా సంఘాలకు సీఎం రేవంత్ రెడ్డి చేతుల మీదుగా పంపిణీ చేయనున్నారు. ఆర్టీసీ బస్సుల్లో మహిళలకు ఉచిత ప్రయాణ సౌకర్యం కల్పించిన నాటి నుండి గడిచిన 29 నెలల్లో ప్రభుత్వం సంస్థకు ఏకంగా ₹10,000 కోట్ల రూపాయలకు పైగా నిధులను చెల్లించిందని ముఖ్యమంత్రి ఈ సందర్భంగా గుర్తుచేశారు.

* ఆర్థిక పటిష్టత మరియు వీ హబ్ (WE Hub) ద్వారా ఉచిత బిజినెస్ శిక్షణ…

మహిళలకు ఆర్థికంగా మరింత స్వేచ్ఛను, నిర్ణయాధికారాన్ని ఇచ్చేందుకు బ్యాంకు రుణాల పరిమితిని గతంలో ఉన్న ₹5 లక్షల రూపాయల నుండి ఏకంగా ₹10 లక్షల రూపాయలకు పెంచుతూ ప్రభుత్వం నిర్ణయం తీసుకుంది. మహిళా సంఘాల రుణాలపై జీరో వడ్డీ కింద రాష్ట్ర ప్రభుత్వమే స్వయంగా ₹1,390 కోట్ల రూపాయలను బ్యాంకులకు చెల్లించింది. రుణాల రికవరీలో 100 శాతం ఉత్తమ ప్రతిభ కనబరిచిన నిర్మల్ జిల్లా మహిళలను ముఖ్యమంత్రి ప్రత్యేకంగా అభినందించారు.

ఉచిత ఇంక్యుబేటర్ ప్రోగ్రామ్… కేవలం రుణాలు ఇవ్వడమే కాకుండా, మహిళలు ఎంచుకున్న వ్యాపారాలలో నష్టపోకుండా ఉండేందుకు ఈ నెల మే 29న వీ హబ్ (WE Hub) ద్వారా ప్రత్యేక ఇంక్యుబేటర్ ప్రోగ్రామ్‌ను ప్రారంభించనున్నారు. దీని ద్వారా బిజినెస్ ప్లానింగ్, ఫైనాన్షియల్ మేనేజ్‌మెంట్, ఆధునిక మార్కెటింగ్ మెళకువలను నిపుణుల ద్వారా ఉచితంగా అందిస్తారు. ఇవే కాకుండా రాబోయే రోజుల్లో ఇందిరాగాంధీ స్త్రీ శక్తి అంగన్ వాడీ భవనాలు, గ్రామీణ ప్రాంతాల్లో సోలార్ విద్యుత్ ప్లాంట్ల ఏర్పాటు వంటి బృహత్తర కార్యక్రమాలను ఈ వారంలోనే ప్రారంభించబోతున్నట్లు ముఖ్యమంత్రి వెల్లడించారు.

* సాంప్రదాయ సాగు నుండి లాభసాటి పంటల వైపు..

వీడియో కాన్ఫరెన్స్ ద్వారా రాష్ట్రంలోని అన్ని జిల్లాల కలెక్టర్లు, వేలాది మంది మహిళలతో ముఖాముఖి మాట్లాడిన ముఖ్యమంత్రి, వ్యవసాయ రంగంలో సాంప్రదాయ పంటలకు భిన్నంగా అధిక లాభాలను ఇచ్చే పంటల మార్పిడి (Crop Diversification) పై మహిళా సంఘాలు గ్రామీణ ప్రాంతాల్లో విస్తృత ప్రచారం చేయాలని పిలుపునిచ్చారు. రాష్ట్ర మంత్రిమండలి మొత్తం తెలంగాణలోని ఆడబిడ్డలందరినీ తమ సొంత సోదరీమణులుగా భావిస్తోందని, 2034 నాటికి కోటి మందిని కోటీశ్వరులను చేసే ఈ చారిత్రాత్మక ఆర్థిక యజ్ఞంలో ప్రభుత్వం వెన్నంటి ఉండి నడిపిస్తుందని సీఎం రేవంత్ రెడ్డి పునరుద్ఘాటించారు.